1 Vakorinte 4:1-21
4 Vandhu vanodikana kutivona kuti tiri vabeseri va Kristu no vavonereri vo cakafisika ca Mwari.
2 Zvinovetehwa ku vavonereri ngo zvokuti vave vakagondeka.
3 Kondiri azvisisiri maningi kuti imwimwi mundipopore kana kuti ndipopohwe ngo utongi. Zvokadi, inini andijitongi ndega.
4 Ngokuti andikwanisi kuziva zvandakaposa. Asi andiripi kunanga kuti ndakarurama; Jehovha* ndiyena anondipopora.
5 Mucatonga ciri cese nguva yakagajwa icito yakwana, mbhera Mambo agume. Iyena anozodira pambhene zviro zvakafisika zviri mucidima, wozivisa murangariro iri mu mwoyo. Umwe na umwe wavo anozosimbhwa ndi Mwari.
6 Hama, ndashandisa masoko aya kwandiri na Aporo kuti zvimubesere, kuti ngo muezaniso wedu, mujije mutemo wokuti: “Mucapindirija zviro zvakatahwa,” kuti mutame kujikuja maningi, mozoparajana ngocenyu.
7 Ndiyani wakakuita kuti usiyane no vamweni? Ngocapi caunaco caucizivi kupuwa? Kudari wakaita ngo kucipuwa, waro ngenyi unojikuja zvoita inga kuti auzivi kucipuwa?
8 Waro makwana ngo zvamunazvo waro here? Maavakhupuki* kani? Mainga matanga kutonga inga majimambo itusu ticito here? Zvokadi, ndaitorangarira kuti imwimwi mototanga kutonga inga majimambo, kuti itusuvo titongevo pamwepo na imwimwi inga majimambo.
9 Ngokuti ndinovona kuti Mwari wakatiita kuti itusu vapostori tive vokupejisira kukhombijwa inga vandhu vakatongehwa kufa, ngokuti tiri kuita inga tiri pa civanje, teciita mutambo tecivoniwa ngo nyika, ngo ngirozi no vandhu.
10 Itusu tiri mapenji ngo ndava ya Kristu, asi imwimwi makangwara pamwepo na Kristu; itusu takaremba, asi imwimwi makavanga; imwimwi munokujwa, asi itusu atikujwi.
11 Mbhera wari, tino njara, tino nyota, atina zvokusimira zvinokwana, tinotakwa, atina pokugara.
12 Tinorembazve ngo ndava yokushanda ngo nyara jedu. Patinotukwa, tinokumbira kuti vakomborehwe; patinoteverehwa, tinocungirira;
13 patinonyepehwa, tinodavira takapfava. Itusu taita inga duru* ro nyika, svina inovhiswa pa zviro zvese, mbhera wari.
14 Ndiri kumutarira zviro izvi kuti ndimujijise inga vana vanodiwa ngokuti andidi kumupseruja.
15 Pikija imwimwi mungava no gumi ro zviuru* zvo vajijisi pamwepo na Kristu, asi amuna majibaba mazinji; ngokuti ndini ndakava baba wenyu mukuzwirana na Kristu Jesu ngo pamusoro po masoko akanaka.
16 Ngo ndava yazvo, ndinomuvhunja kuti ivanyi vatevejeri vangu.
17 Ngo zvinondiitisa kuti ndimutumire Timoti, ngokuti ndiyena mwana wangu anodiwa no anogondeka mubasa ra Mambo. Iyena anozomueujira maitiro angu mukuzwirana na Kristu Jesu, zviro zvandiri kujijisa mu ungano jese no mu mativi ese.
18 Vamweni vari kujikuja maningi, inga kuti inini andizivi kuzeyo kuzomuvona.
19 Asi kudari Jehovha* akada, ndinoviyeyo kuzomuvona ngo kukasika, kuti ndizive simba ravo. Asi andidi kuziva masoko o vandhu vanojikuja.
20 Ngokuti Umambo hwa Mwari, asipi shwiro yo kuvereketa, asi ishwiro yo simba.
21 Ngozvapi zvamunoda? Ndoviyeyo no mushakwe kana ndoviyeyo no rudo pomwe no kupfava?
Masoko o Pasi
^ Vonanyi Kudurujihwa ko Magama.
^ Kana: “maa vandhu vakaganya.”
^ Ndau inosvejehwa marota.
^ 10.000.
^ Vonanyi Kudurujihwa ko Magama.
