1 Vakorinte 7:1-40
7 Ngo pamusoro po zviro zvomakataraya, zviri nane kuti mwanarume atame kupsasa* mwanakaji;
2 asi ngo ndava yo kuwanda ko uhure,* mwanarume umwe na umwe ngaave no mukaji wake, mwanakaji umwe na umwe ngaave no mwamunake.
3 Mwamuna ngaape mukaji wake zvinodikana kwaari, mukaji ngaaitevo zvondhozvo ku mwamunake.
4 Mukaji andiyepi mune wo muviri wake, asi ngo wo mwamunake; mukufananavo, mwamuna andiyepi mune wo muviri wake, asi ngo wo mukaji wake.
5 Umwe aadikani kuramba kuvatana no umweni. Kudari mukaji no mwamuna mukazwirana nguva yo mucikavati mwese kuti muite mukumbiro, azvizivi kushata. Perapo munodikana kuvatazve mwese kuti Sathana atame kugara ecimueja ngo ndava yo kutama kujibata kwenyu.
6 Ndinomutendera kuti muite zvandiri kunangari, asi andiripi kugaja mutemo wamunodikana kubatisisa.
7 Asi ndaida kuti vandhu vese vaite inga ndini. Pikija zvakadaro, umwe na umwe wakapuwa cipo cake ndi Mwari, umwe ngo njira iyi, umweni ngo njira imweni.
8 Wari ndinovhunja vacizivi kucadha no noni kuti zviri nane kwavari kudari vakagara inga zvandiri wari.
9 Kudari vacikakwanisi kujibata, ngavacadhe, ngokuti zviri nane kucadha kuciripi kunyiswa ngo kuemura.*
10 Vakacadha ndinovapa ndhungamiriro inovha ka Mambo, iciripi yangu, yokuti mukaji aadikani kuparajana no mwamunake.
11 Kudari akaparajana, ngaagare acizivi kucadha. Kudari acikadi kugara acina mwamuna, ngaaviirane no mwamunake; mwamuna aadikani kusiya mukaji wake.
12 Asi vamweni inini ndinovavhunja kamare, kuciripi Mambo, kuti: Kudari hama iri yese ino mukaji acikatendi, asi ecidavira kugara nayo, hameyo aidikani kumusiya;
13 kudari mwanakaji ano mwamuna acikatendi, asi mwamunewo akadavira kugara naye, iyena aadikani kusiya mwamunake.
14 Ngokuti mwamuna acikatendi anoceneswa ngo mukaji wake, mukaji acikatendi anoceneswavo ngo hama iyi; nozvicaingepi zvondhozvo, vana venyu vaizova vacizivi kucena, asi wari ivona vakacena.
15 Asi kudari mundhu aciripi mutendi akasana kusiya mudoni wake, ngaaende. Hama nokuti hambzaji aisungihwi pa mugariro jakadari. Asi Mwari wakamudanijira runyararo.
16 Iwewe mukaji, unozvizivisa kudini kuti dangani unozoponesa mwamunako? Kana kuti, iwewe mwamuna, unozvizivisa kudini kuti dangani unozoponesa mukaji wako?
17 Umwe na umwe ngaararame* mukuzwirana no zvaakapuwa ndi Jehovha.* Ngaagare inga zvaainga paakadanijwa ndi Mwari. Ndiri kupa ndhungamiriro iyi ku ungano jese.
18 Aripo mundhu wainga akasokwa paakadanijwa? Ngaagare akadaro. Aripo mundhu ari wese wakadanijwa acizivi kusokwa? Aadikani kusokwa.
19 Kusokwa akurevi ciri cese, kutama kusokwa akurevivo ciri cese. Asi kuzwira mupango ja Mwari ndikona kunosisira.
20 Mugariro uri wese wainga no umwe na umwe paakadanijwa, ngaagare ano mugariro wondhowo.
21 Wakadanijwa uri muranda here? Ucakaya-kaya ndizvona; asi kudari wecikwanisa kuva wakasujunuka, shandisai mukana wondhowo.
22 Ngokuti wiya wakadanijwa ndi Mambo ari muranda, mundhu wondhowo, wari waamusujunuki wa Mambo. Mukufananavo, wiya wakadanijwa ndi Mambo ari mundhu wakasujunuka, wari ndiyena muranda wa Kristu.
23 Imwimwi makatengwa ngo mutengo mukuru; regeranyi kuva varanda vo vandhu.
24 Hama, umwe na umwe ngaagare ano mugariro wondhowo pamberi pa Mwari, ngo maitiro aakadanijwa ndiwona.
25 Wari andina mupango wondakapuwa ndi Mambo ngo pamusoro po mbhandwe, asi ndinonanga mavonero angu inga mundhu wakagondeka ngo usizi hwondakaitihwa ndi Mambo.
26 Asi, ndinorangarira kuti zviri nane kuti mundhu agare inga zvaari, ngo ndava yo matambujiko a wari.
27 Kunanga kuti iwewe uno mukaji? Ucapsaka kuparajana naye. Kunanga kuti iwewe auna mukaji? Ucapsaka mukaji.
28 Pikija ukacadha, auripi kuita cishaishi. Kudari mundhu ari mbhandwe akacadha, aaripi kuita cishaishi. Asi vaya vanocadha vanozova no dambujiko mu upenyu hwavo. Inini ndiri kupsaka kumujivirira pa matambujiko.
29 Asi hama, ndinomuvhunja kuti nguva yasara ishoma. Kuvhira wari, vaya vano vakaji ngavaite inga vacina vakaji,
30 vaya vanocema* ngavaite inga vacikacemi,* vaya vanodakara ngavaite inga vacikadakari, vaya vanotenga ngavaite inga vacina zvavanotenga,
31 vaya vanoshandisa nyika ino, ngavaite inga vacikanasi kuishandisa. Ngokuti zviri kuitika mu nyika ino zviri kucinja.
32 Zvandinoda ngo zvokuti mutame kuthimwa-thimwa. Mwanarume acizivi kucadha anothimwa-thimwa ngo zviro zva Mambo, ngokuti anoda kudakajisa Mambo.
33 Asi mwanarume wakacadha anothimwa-thimwa ngo zviro zvo nyika, ngokuti anoda kudakajisa mukaji wake,
34 murangariro wake wakaparajana. Kusiyapo izvo, mwanakaji acizivi kucadha, ari mbhandwe, anothimwa-thimwa ngo zviro zva Mambo, kuti ave wakacena mu muviri no mumurangariro wake. Asi mwanakaji wakacadha anothimwa-thimwa ngo zviro zvo nyika, ngokuti anoda kudakajisa mwamunake.
35 Inini ndiri kumuvhunja zviro izvi kuti mubesereke, andidi kumuphingaija, asi ndinoda kumubesera kuti muite zvinodikana no kushandira Mambo ngo mwoyo wese njiku jese mucina ciphingo.
36 Kudari ari wese ecirangarira kuti ari kuita zvicikafaneri ngo kugara acizivi kucadha, kudari apindirija makore o kuaruka, iyena ngaaite izvi: Muregerenyi acadhe kudari ecida kucadha. Iyena aaripi kushaisha ngokuita mucadho.
37 Kudari aripo wasunga mu mwoyo make, acingazvidi izvi, asi anokwanisa kungwarira zvido zvake, wotema civaringo mu mwoyo make co kugara acizivi kucadha, anoita zvakanaka.
38 Ngo kudarozve, wiya anocadha anoita zvakanaka, asi wiya anotama kucadha anozoita zvakanaka maningi.
39 Mukaji wakasungwa ngo mutemo, mwamunake paanonga ari penye. Kudari mwamunake akafa, iyena wasujunuka pa mutemo kuti acadhe no ari wese waanoda, basi kudari mwanarumewo ari muteveri wa Mambo.
40 Asi mavonero angu ngo okuti, iyena anozodakara kudari akagara inga zvaari waro. Inini ndinothemba kuti ndino mujimu wa Mwari.
Masoko o Pasi
^ Kana kuti, kutama kuvatana no.
^ Vonanyi Kudurujihwa ko Magama.
^ Kana: “kupsa mwoyo.”
^ Kana: “ngaapone.”
^ Vonanyi Kudurujihwa ko Magama.
^ Kana: “vanorira.”
^ Kana: “vacikariri.”
