1 VaTesaronika 4:1-18
4 Hama, inga zvamakaashira ndhungamiriro jinovha kwatiri, ngo pamusoro po mufambiro wamunodikana kuita kuti mudakajise Mwari, inga zvamuri kufamba, tinomukumbira no kumudeketerera ndi Mambo Jesu kuti muenderere mberi meciengejera kuita kudaro.
2 Ngokuti imwimwi munojiziva ndhungamiriro jotakamupa ngo zina ra Mambo Jesu.
3 Ngokuti kuda ka Mwari nga uku: Kuti muve makacena moregera kuita uhure.*
4 Umwe na umwe wenyu anodikana kungwarira muviri wake mu uceni no nderemejo,
5 acikaiti makaro no kudisisa maningi zvo vatano, inga vandhu vo nyika vacikazivi Mwari.
6 Apana anodikana kupindirija mugano, wokhuvaza hama yake pa shwiro iyi. Ngokuti Jehovha* anozotonga zviro izvi inga zvotakamuvhunja kare, no zvatiri kundomuvangisa.
7 Ngokuti Mwari aazivi kutidanijira kutama kucena, asi wakatidanijira uceni.
8 Mundhu anoshora zviro izvi, aashori mundhu, asi anoshora Mwari, wakamupaya mujimu mucena wake.
9 Asi ngo pamusoro po rudo ku hama, andidikani kumutarira, ngokuti imwimwi kamare munojijiswa kudisana ngo cenyu ndi Mwari.
10 Ngo kudaro, imwimwi muri kuita izvi ku hama jese jo mu Masedhoniya mwese, asi itusu tinomuvangisa kuti muenderere meciengejera kuita kudaro.
11 Ivanyi no cinangwa cokugara mu runyararo, kusiyana no shwiro jiciripi jenyu, no kubata basa ngo nyara jenyu inga zvatakamujijisa,
12 kuti muve no mufambiro unoemuhwa ngo vandhu vo kunja, mutame kuva no camunotama.
13 Kusiyapo izvo hama, tinoda kuti muzive ngo pamusoro po vandhu vakafa, kuti mutame kusuruvara inga zvinoithwa ngo vandhu vacina vetero.
14 Kudari tecitenda kuti Jesu wakafa womuka, tinotendavo kuti Mwari anozovamusa pamwepo naye, vaya vakafa vecitenda Jesu.
15 Itusu tinomuvhunja izvi ngo soko ra Jehovha,* itusu tinoraramari* topona mukuviya ka Mambo, atizotangiri vaya vakafa;
16 ngokuti Mambo anozoderuka kuvha kudenga ecidaninjira ngo izwi guru, izwi ra arkanjo no mbhayapaya ya Mwari, vaya vakafa mukubatana na Kristu, ndivona vanozotanga kumuswa.
17 Pasure po kuponeswa, itusu tiri kuraramari,* tinozotohwa pamwepo mu makore, toenda kosongana na Mambo mu mbhepo; ngo kudaro, tinozogara na Mambo mbhera narini.
18 Garanyi mecitondhojana ngo masoko aya.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “tinoponari.”
^ Kana: “tinoponari.”
