2 Vakorinte 10:1-18
10 Inini kamare Pauro, ndinomudeketerera ngo kupfava no unyasha hwa Kristu, asi imwimwi munondivona inga ndicina simba pandinonga na imwimwi, asi ndakacunga kwamuri pandinonga ndicipo.
2 Ndinokumbira kuti pandinonga na imwimwi nditame kuva no ushungu, zvondiitisa kuti ndiite zviro ngo hasha, inga zvandinorangarira kuzoita kuna vaya vanotivona kuti tiri kufamba mukuzwirana no nyama.
3 Pikija tecifamba mukuzwirana no nyama, itusu atihwi mukuzwirana no zvatiri pa nyama.
4 Zvijito zvatinohwa ndizvona asipi zvo kunyama, asi Mwari anozvipa simba kuti zviphwanye mapiravira akavanga.
5 Ngokuti tinophwanya murangariro no biravira rinoimiswa kuti rihwisane no zivo ya Mwari, tecidira muuranda murangariro jese kuti jizwire Kristu;
6 Takanasirira kuti tipanice mundhu anokhombijira kutama kuzwira kuri kwese, kudari kuzwira kwenyu kukava kwakakwana.
7 Imwimwi munovona zviro mukuzwirana no mugariro wazvo wo kunja. Kudari kuno mundhu anojivona inga wa Kristu, iyena anodikana kurangarira ciro ici: Zvecivoneka kuti iyena ngo wa Kristu, itusu tirivo vake.
8 Pikija ndikadada padoko ngo pamusoro po simba ratakapuwa ndi Mambo, kuti timuvangise kuciripi kumurembesa, inini andicaizopserukepi.
9 Andidi kuti zvivoneke inga ndinoda kumuthusa ngo karata jangu.
10 Ngokuti vandhu vamweni vanoti: “Karata jake jinobhuya zvinosisira pomwe no simba, asi iyena akava pano, aabesi ciro. Asi paanonga aripano, anonga acina simba, kuvereketa kwake akureremejwi.
11 Mundhu wondhowo ngaazive kuti zvatakatara pa karata tinozozviita kudari tikagumeyo.
12 Ngokuti atingajidiri pamwepo kana kuezana na vaya vanojikuja. Asi pavanojipopora vecishandisa mavonero avo kamare, vojiezanisa vega, ivona vanovonesa kuti avazwisisi.
13 Itusu atidadi ngo zvinoitihwa kunja ko mugano wedu, asi tinodada ngo zvatinoita mukati mo mugano mo ndima yotakatemehwa ndi Mwari inobatanijavo imwimwi.
14 Zvokadi itusu atiripi kupindirija mugano, inga muciripi vo mundima yedu, ngokuti ndisu takatanga kumugumira no masoko akanaka ngo pamusoro pa Kristu.
15 Itusu atijikuji kupindirija ndima yedu yotakagajwa ngo mabasa o vandhu vamweni, tinovetera kuti rutendo hwenyu paunoenderera mberi wecikura, mabasa edu anoendereravo mberi ecikura, mukati mo ndima yedu. Perapo, basa redu rokucumaira rinozowanda,
16 kuti ticumaire masoko akanaka ku ndau jiri ndhambo na imwimwi, tikadaro, atizojikuji ngo mabasa akaithwa mu ndima yo vamweni.
17 “Asi wiya anojikuja, ngaajikuje ndi Jehovha.”*
18 Ngokuti mundhu anosimbwa, asipi wiya anojikuja ega, asi ndi wiya anokujwa ndi Jehovha.*
