2 Vakorinte 12:1-21
12 Ndinodikana kujikuja. Izvi azvindibesi ciro, asi wari ndicabhuya ngo pamusoro po zvitatijo no zvondakavoneswa ndi Mambo.
2 Ndinozviziva kuti ndiri pamwepo na Kristu. Iyena wakatohwa kuendeswa ku denga rocitatu pa gumi ro makore no makore marongomuna akapera. Kharu dangani wakaenda ngo muviri, dangani aazivi kuenda ngo muviri, andizvizivi; asi Mwari ndiyena anozviziva.
3 Hina, ndinomuziva mundhu endhowo. Iyena wakaendeswa mu paradhiso. Kharu dangani wakaendeswa ngo muviri dangani aazivi kuendeswa ngo muviri, andizvizivi; Mwari ndiyena anozviziva.
4 Paainga mu paradhiso, iyena wakazwa masoko acikanangwi no masoko acikatendehwi kuvereketwa ngo mundhu.
5 Inini ndinojikuja ngo mundhu wakadari, andijikuji ngo pamusoro pangu, asi ndinojikuja ngo pamusoro po marembo angu.
6 Nee nondaijikuja azvicaizovepi zvo upenji, ngokuti ndiri kuvereketa zvokadi. Asi andizviiti ngo kuthya kuti vandhu vanozondisimba kupindirija zviya zvavanovona kwandiri no kundizwa ndecivereketa.
7 Ngo ndava yo kuashira zvivoniso izvi zvinoshamaisa maningi, apana anodikana kunditokotesa.
Kuti nditame kujitutumaja, ndakadihwa muzwa mu muviri wangu, ngirozi ya Sathana, kuti irambe yecinditaka kuti inini nditame kujitutumaja maningi.
8 Ndakadeketerera Mambo katatu, ndecikumbira kuti muzwa uwu uvhiswe mu muviri mangu.
9 Asi iyena wakandivhunja kuti: “Unyasha hwangu hucikaezaniswi hunokwana kwauri, ngokuti simba riri kuva rakakwana mu kurembejeka kwako.” Ndecidakara maningi, ndinojikuja ngo kurembejeka kwangu, kuti simba ra Kristu rigare panyezuru pangu inga tende.
10 Ngo kudaro, inini ndinodakara pandinonga ndakaremba, ndecitukwa, ndakakonyehwa, ndeciteverehwa no muzvineso, ngo pamusoro pa Kristu. Ngokuti pandinonga ndakaremba, ndipona pandinonga ndakavanga.
11 Ndiri kuita inga benji. Ndimwi makandivangirija kuti ndiite kudaro, ngokuti ndimwi maidikana kundikuja. Ngokuti apana pandakava ndakaderera ku vapostori venyu vakanakisisa, pikija kuti andiripi ciri cese.
12 Zvitatijo zvo upostori zvakavepo pakati penyu ngo kucungirira maningi, ngo zvitatijo, mushamaiso no mabasa o simba.
13 Ngozvapi zvandakaitira ungano jimweni zvandicizivi kumuitira, kuciripi kuti andizivi kuva mutoro kwamuri? Ndiregererenyivo cishaishi ici ngo mwoyo wese.
14 Vonanyi! Ndiri kuda kuza komuvona hwocitatu, inini andizovi muthwaro komuri. Ngokuti andiripi kupsaka zviro zvamunazvo, asi ndiri kupsaka imwimwi; ngokuti vana avavetehwi kuunganijira upfumi vabari vavo, asi vabari ndivona vanounganijira upfumi vana vavo.
15 Ngo divi rangu, ndinozopa zviro zvangu zvese, ndozojipira ngo ndava yenyu. Kudari ndinomuda maningi, inini andifaneri kudiwavo ndimwi?
16 Ngo maitiro ari ese, inini andizivi kuita mutoro kwamuri. Ngo kudaro, ivona vanonanga kuti ndakaita “mazano,” ndomubata “ngo ungwaru.”
17 Kunanga kuti ndakamutorera zviri zvese ndecishandisa vandhu vandakamutumira?
18 Ndakakumbira Tito kuti aviye kuzomuvona, ndomutumira no hama imweni. Kunanga kuti Tito wakamutorera ciri cese? Kunanga kuti atizivi kutatija kuti takabatana? Atizivi kuita ngo njira yondhoyo?
19 Muri kurangarira kuti pa mukuvo wese uwu tiri kunanga zvo kujijivirira pamberi penyu? Tiri kubhuya pamberi pa Mwari takabatana na Kristu. Asi hama jinodiwa, zvese zvatinoita zvinomuvaka.
20 Ngokuti ndinothya kuti pandinozogumeyo, andizomukhandi inga zvandaida, zvotama kuva inga zvomaida. Kusiyapo izvo, ndinozokhanda hasha, ushanje, ushungu, kutama kuzwana, kushorana, magumbu,* kujikuja no bope.
21 Kangaije pandinozoviyeyozve, Mwari wangu anozondidodokesa pamberi penyu, inini ndinozocema* maningi ngo pamusoro po vamweni venyu vacizivi kukhauya pa zvishaishi zvavo, pa kutama kucena kwavo, uhure* no mufambiro unopseruja wo vakaita.
