2 Vakorinte 3:1-18
3 Tiri kutangazve kujisimba here? Kureva kuti itusu tinoda kuashira karata jokusimba jinovha komuri kana kumutarira karata jokusimba jinovha kwatiri, inga zvinoithwa ngo vandhu vamweni?
2 Imwimwi ndimwi karata jedu, jakatahwa mu mwoyo mwedu, jinozivika no kuverengwa ngo vandhu vese.
3 Zviri pambhene kuti imwimwi, muri karata ya Kristu yakatahwa ndisu vashandiri. Karata iyi aizivi kutahwa ngo tinta, asi yakatahwa ngo mujimu wa Mwari anopona. Iyona aizivi kutahwa pa buwe asi yakatahwa mu mwoyo javo.
4 Itusu tinothemba zviro izvi kuna Mwari ngo pamusoro pa Kristu.
5 Itusu atikwanisi kuita basa iri tega, asi ndi Mwari anotibesera kuti tiite basa iri.
6 Ndiyena wakatikwanirisa kuti tiite varanda vo citenderano cipsa, kuciripi vo mutemo, asi varanda vo mujimu mucena; ngokuti, mutemo unotongera rufu, asi mujimu wa Mwari, unoponesa.
7 Kudari mutemo waishandira rufu wotahwa pa mapuwe, wakaviya no rukujo hwaiita kuti vana vo Iziraeri vakonehwe kusota mu meso ma Mosi, ngo ndava yo rukujo hwo mu meso make, rukujo hwaizopera.
8 Waro ngenyi mabasa o mujimu aadikani kukujwa maningi?
9 Kudari mutemo waiendesa kootongwa waikujwa, mutemo wo ururami unodikana kukujwavo maningi!
10 Pikija ciro cainga no rukujo kare, cakaruza rukujo hwaco, ngo ndava yo rukujo hunopinda icona.
11 Kudari ciya cakaviiswa no rukujo cikazopejwa, ciya caizogara kwenda no kwenda, caizokujwavo maningi!
12 Zvecivoneka kuti tino vetero yakadari, tinovereketa takasujunuka maningi,
13 ticikaiti inga ndi Mosi paakafukija mu meso make ngo nguvo, kuti vana vo Iziraeri vatame kuvona kupera ko ciro caizopera.
14 Asi murangariro yavo yakatindivara. Citenderano cokare pacinondoverengwa mbhera na nyamasi, nguvo iya inondogara iripo icikavhiswi, zvecivoneka kuti inovhiswa ndi Kristu basi.
15 Zvakatahwa ndi Mosi pazvinondoverengwa mbhera na nyamasi, nguvo iya inofukija mu mwoyo javo.
16 Asi mundhu paanohwirira kuna Jehovha,* nguvo iyani inovhiswa.
17 Jehovha, mujimu. Pano mujimu wa Jehovha,* pano rusujunuko.
18 Itusu tese patinonga tino kumeso kucizivi kufukijwa tecivonesa rukujo wa Jehovha ngo supeya, tinocinjwa kuti tive muezaniso wondhowo, kuvha pa rukujo humwe, kwenda pa humweni, mukuzwirana no zvinoitwa ndi Jehovha* uwo ari mujimu.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
