2 Vakorinte 4:1-18
4 Zvecivoneka kuti tino basa iri ro kucumaira ngo unyasha hwotakaitihwa, itusu atirembi.
2 Asi itusu takasiya zviro zvinopseruja, zvinoithwa mu cifise-fise. Itusu aticengejeri. Itusu ativhisi kana kuengejera ciri cese mu soko ra Mwari. Patinozivisa cokwadi, tinokhombija kuti tiri vandhu vakanaka ku hana jo vandhu vese pamberi pa Mwari.
3 Kudari masoko akanaka atinocumaira akafisika, akafisika kuna vaya vanoda kuzoparajwa.
4 Pakati pavo, mwari wo nyika* ino wakapofumaja murangariro jo vandhu vacikatendi, kuti vatame kuvhenekehwa ngo ruvheneko hwo rukujo hwo masoko akanaka ngo pamusoro pa Kristu, ari muezaniso wa Mwari.
5 Ngokuti atiripi kucumaira ngo pamusoro pedu, asi tiri kucumaira ngo pamusoro pa Jesu Kristu inga Mambo. Itusu tiri varanda venyu ngo ndava ya Jesu.
6 Ngokuti ndi Mwari wakananga kuti: “Ruvheneko ngahubwake mu cidima,” iyena ari kuvhenekera mwoyo yedu kuti aivhenekere ngo rukujo hwo zivo ya Mwari ngo pamusoro pa Kristu.
7 Ngo kudaro, tino upfumi uhu mu mujiyo wo dongo, kuti simba rinopindirija ro vandhu rive ra Mwari kuciripi redu.
8 Tinopsinywa mu mativi ese, asi atiperehwi ngo simba rokucukunuka; tinoperehwa ngo mazano, asi tinowana njira yokubuda ndiyona;
9 tinoteverehwa, asi atisiiwi; tinowiswa, asi atiparajwi.
10 Mukuvo wese tinocungirira mu muviri medu zvakashata zvinoendesa ku rufu zvakaitihwa Jesu, kuti upenyu hwa Jesu huvoneswevo mu muviri mwedu.
11 Itusu tiri penye wari, tiri kuhwisana no rufu mukuvo wese ngo pamusoro pa Jesu, kuti upenyu hwa Jesu huvoneswevo mu nyama yedu inofa.
12 Ngo kudaro, rufu huri kushanda mukati mwedu. Asi upenyu huri kushanda mukati mwenyu.
13 Zvecivoneka kuti tino rutendo* humweho inga zvakatahwa kuti: “Ndakatenda, ndizvona zvinondiitisa kuti ndiverekete.” Itusu takatendavo, ngo kudaro tinovereketa.
14 Teciziva kuti Wiya wakamusaya Jesu, anozotimusavo pamwepo na Jesu, iyena anozotidira pamberi pake pamwepo na imwimwi.
15 Ngokuti zviro zvese izvi zviri kuitihwa imwimwi, kuti unyasha hucikaezaniswi huengejeke maningi. Ngokuti vandhu vazinji vari kubonga maningi ngo rukujo hwa Mwari.
16 Ngo kudaro, itusu atirembi, asi pikija muviri wedu wo kunja wecipera, muviri wedu wo mukati uri kuithwa mupsa njiku ngo njiku.
17 Matambujiko ngo onguva shomani. Iwona akareruka. Pikija zvakadaro, ari kubara rukujo hukuru maningi. Rukujo uhu ngo hwo kwenda no kwenda.
18 Itusu atigari takasotesesa ku zviro zvinovoneka, asi tinogara takasotesesa ku zviro zvicikavoneki. Ngokuti zviro zvinovoneka ngo zvo nguva doko, asi zviro zvicikavoneki ngo zvokwenda no kwenda.
