2 Vakorinte 5:1-21
5 Ngokuti tinoziva kuti, nyumba yedu yo pasi pano, tende iyi, kudari ikaphwanywa, tinozova no nyumba inovha kuna Mwari, nyumba iyi aizivi kuithwa ngo nyara, inogara kwenda no kwenda kudenga.
2 Itusu tiri kugomera mu nyumba iyi, tecida kunghwina ngo mwoyo wese mu nyumba yatakaitihwa inovha kudenga.
3 Itusu patinozoinghwina, atizovi tiri mitu.
4 Zvokadi, itusu tiri wari mu tende iyi, tiri kugomera takacikirihwa, ngokuti atidi kubudemo, ngokuti tinoda kunghwina mu imweni, kuti inofa imijwe ngo upenyu.
5 Wakatinasirira ciro ici ndi Mwari, ndiyena wakatipa mujimu inga cigondiso ca zviya zvinozoviya.
6 Ngo kudaro, tinonasa kuthemba no kuziva kuti patinonga tecirarama mu muviri, tinonga tiri ndhambo na Mambo,
7 ngokuti tiri kufamba ngo rutendo kuciripi ngo zvatinovona.
8 Ngokuti tinonasa kuthemba todakarira kugara ndhambo no muviri kuti tigare na Mambo.
9 Asi azvinenyi kuti tinogara naye, kana tinogara ndhambo naye, cido cedu ngo cokuda kumudakajisa.
10 Itusu tese, tinozoenda pamberi po cigaro co kutonga ca Kristu, kuti mundhu no mundhu aashire zvaanofanera ngo ndava yo zviito zvake zvaakaita paairarama mu muviri, zvingava zvakanaka kana zvakashata.
11 Ngo kudaro, teciziva kuti tinodikana kuthya Mambo, itusu tinoenderera mberi tecijijisa vandhu no kuvakhohwesa, asi tinonasa kuzivika ndi Mwari. Inini ndinovetera kuti tinase kuzivika ngo hana jenyu.
12 Itusu atiripi kujisimbazve pamberi penyu, asi tiri kumuvangisa kuti mujikuje ngo ndava yedu, kuti mukwanise kudavira vaya vanojikuja ngo ndava yo mavonekero okunja kuciripi ngo zviri mu mwoyo.
13 Kudari tikaruza hwiru, taruza ngo ndava ya Mwari; asi kudari tino hwiru, tinahwo ngo ndava yenyu.
14 Rudo hwa Kristu hunotindunda ngokuti itusu tinorangarira kudari: Mundhu umwe wakafira vandhu vese, ngo kudaro vese vainga vakafa.
15 Iyena wakafira vandhu vese, kuti vandhu vanorarama* vatame kujiraramira vega, asi vararamire wiya wakavafira no kumuka.
16 Ngo kudaro, kuvhira wari apanazve mundhu watinoziva ngo mavonero okunyama. Pikija takamboziva Kristu ngo mavonero okunyama, aticazomuzivizve ngo njira yakadaro.
17 Ariwese wakabatana na Kristu, ndiyena cisikwa cipsa; zviro zvokare zvakapera; wari kwaano zviro zvipsa.
18 Zviro zvese zvinovha kuna Mwari, wiya wakativiiranisa ecishandisa Kristu, wotipa basa ro kuviiranisa.
19 Mwari wakashandisa Kristu kuti aviiranise nyika na iyena, acikaverengi zvishaishi zvavakaita, wotipa masoko okuviiranisa.
20 Itusu tiri vaimiriri pa ndau ya Kristu, inga kuti Mwari ari kutishandisa kuti tidanije vandhu. Inga vaimiriri va Kristu, tiri kumukumbira kuti: “Viirananyi na Mwari.”
21 Mwari wakaita kuti wiya acikazivi cishaishi, ave cishaishi* kotiri, kuti tive ururami hwa Mwari ngo pamusoro pake.
