2 Vakorinte 6:1-18
6 Tecishanda pamwepo na iyena, tinomukumbira kuti mucaashira unyasha hucikaezaniswi hwa Mwari, motama kuzwisisa cinangwa caho.
2 Ngokuti iyena anoti: “Ndakakuzwa pa nguva kwayo, ndakakubesa pa njiku yo ruponeso.” Wari, iyi inguva inosisira yakatendehwa. Iyi, injiku yo ruponeso.
3 Atiiti zviro zvinokhugunya vamweni, kuti basa redu ro kucumaera ritame kupumbhwa.
4 Asi itusu mu njira jese tinojivonesa inga vashandiri va Mwari, ngo kucungirira zviro zvizinji, ngo matambujiko, ngo utami, ngo zvineso,
5 ngo kutakwa, ngo kudihwa mu kadheya, ngo joweyowe, ngo kushanda maningi, ngo kutama kuvata co usiku, ngo kutama zvokuha,
6 ngo kuva takacena, ngo zivo, ngo kusengerera, ngo unyasha, ngo mujimu mucena, ngo rudo hucikacengejeri,
7 ngo masoko okadi, ngo simba ra Mwari, ngo nvuti jo ururami ku mukono muho* no mukono boshwe,*
8 ngo kukujwa no kutama kureremejwa, ngo kushohwa no kusimbhwa. Tinovoneka inga tiri vacengeji kuveni tiri vandhu vakagondeka,
9 inga ticikaziviki kuveni tinozivika, inga tiri kuda kufa kuveni titori penye, inga tiri kutambujwa asi atiurawi,
10 inga takanyangajwa asi takadakara mukuvo wese, inga varombo asi tiri kuganyisa vazinji, inga ticina ciro asi tino zviro zvese.
11 Itusu takafunungura muromo yedu kuti tibhuye na imwimwi Vakorinte, tofunungurazve kamare mwoyo yedu.
12 Itusu atiripi kumunyima mazwiro edu, asi imwimwi muri kutinyima mazwiro enyu.
13 Inini ndiri kubhuya inga ndiri kubhuya no vana vangu ndecimuvhunja kuti: Fununguranyivo mwoyo yenyu.
14 Mucabatana no vacikatendi pa kanga yondhoyo. Ururami no kutama kuzwira mutemo zvingabatana papi? Ruvheneko hungabatana no cidima weya?
15 Kusiyapo izvo, Kristu na Bheriyari* vangazwirana papi? Kana kuti mundhu anotenda no mundhu acikatendi vanozwirana weya?
16 Themberi ya Mwari no themberi yo zvithombi yakabatana papi? Itusu tiri themberi ya Mwari anopona. Inga zvakanangwa ndi Mwari kuti: “Inini ndinozogara pakati pavo ndecifamba na ivona, inini ndinozova Mwari wavo ivona vanozova vandhu vangu.”
17 “Jehovha* anonanga kuti: ‘Budanyi pakati pavo, mucabatana na ivona, regeranyi kupsasa zviro zvicizivi kucena’” “‘inini ndinozomuashira.’”
18 “Jehovha* wo Masimba Ese anonanga kuti: ‘Inini ndinozova baba wenyu, imwimwi munozova vana* vangu.’”
Masoko o Pasi
^ Kangaije mukono wo kutaka ndiwona.
^ Kangaije mukono wo kuvhika ndiwona.
^ Gama rinovha ku Cihebheru rinoreva kuti “acikabesi ciro.” Recinangira Sathana.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “vokaji no vorume.”
