2 Vakorinte 9:1-15
9 Ngo pamusoro po basa ro kuitira vandhu va Mwari, azvidikani kuti inini ndimutarirezve nga papsa,
2 ngokuti ndinoziva cido cenyu, cinondiitisa kuti inini ndijikuje pamberi po vandhu vo Masedhoniya, ndecinanga kuti vandhu vo Akaya vaano gore vakanasirira. Nokutizve, kuvangisira kwenyu kwakavangisa uzinji hwavo.
3 Ndiri kumutumira hama kuti kudada kwatinako ngo pamusoro penyu kutame kuita kokunyepa, kuti mugare makanasirira inga zvandainga ndakananga kuti ngo zvamaizoita.
4 Ngokuti zvikatama kuita kudaro, Vamasedhoniya pavanozoviyeyo na inini, totama kumukhanda makanasirira, itusu tinozoita nyowa ngo pamusoro po kumuthemba kwatinoita. Imwimwi munozopserukavo maningi.
5 Ngo ndava yazvo, ndavona kuti zvinodikana kuvangisa hama kuti jiviye kuzomuvona, kuti jitange kunasirira cipo co mwoyo wese nguva iciripo, kuti cigare cakanasirihwa inga cipo co mwoyo wese, haiwa co kuvangirijwa.
6 Asi ngo pamusoro pa izvi, wiya anosima zvishoma, anokotoravo zvishoma, wiya anosima zvizinji anokotoravo zvakawanda.
7 Mundhu umwe nga umwe ngaaite zvaasunga mu mwoyo make, kuciripi kuita acingadi kana kuti ngo kuvangirijwa, ngokuti Mwari anoda mundhu anopa akadakara.
8 Kusiyapo izvo, Mwari anokwanisa kuita kuti unyasha hwake hucikaezaniswi huwande komuri, kuti mukwane ngo zviro zvese zvamunoda, muve no zvakawanda pa mabasa ese akanaka.
9 (Inga zvakatahwa kuti: “Iyena wakapa vakawanda; iyena wakapa varombo. Ururami hwake hunogara mbhera narini.”
10 Wiya anopa murimi mbeu zinji no pau kuti vandhu vake vahe, anozomupavo mbeu. Iyena anozoita kuti mbeu iwande kuti imwimwi musime no kuengejera kukotora ko ururami hwenyu.)
11 Pa zviro zvese, imwimwi muri kukhupuka* ngokuti munoda kuita mushovo wese wo kupa, izvo zviri kuita kuti basa ratiri kuita riite kuti vandhu vabonge Mwari;
12 Asi basa ratiri kuitari ro kubesera vandhu vazinji, atiripi basi kubesera vandhu va Mwari, asi tiri kuita kuti vandhu vakawanda vabonge maningi Mwari.
13 Ivona vari kukuja Mwari ngokuti basa iri ro kupa rinokhombija kuti imwimwi munozwira masoko akanaka ngo pamusoro pa Kristu, inga zvamakakhombija pambhene kuti imwimwi munopa mupiro wenyu ngo mwoyo wese kwavari no ku vandhu vese.
14 Ivona vanomuda maningi vecimuitira mukumbiro jo kudeketera ngo ndava yo unyasha hucikaezaniswi hwa Mwari hwamakaitihwa.
15 Ngaabongwe Mwari ngo cipo cake co mwoyo wese cicikanangiki.
Masoko o Pasi
^ Kana: “kuganya.”
