2 Vatesaronika 1:1-12
1 Inini Pauro, Sirivhano* pamwepo na Timoti, ndiri kutarira ungano yo ku Tesaronika. Ungano iyi yakabatana na Mwari Baba wedu na Mambo Jesu Kristu:
2 Unyasha hucikaezaniswi no runyararo zvinovha kuna Mwari Baba, na Mambo Jesu Kristu, ngazvive na imwimwi.
3 Mukuvo wese, tinodikana kubonga Mwari ngo pamusoro penyu hama, izvi zvinosisira ngokuti rutendo hwenyu huri kuengejeka ngo njira inoshamaisa maningi. Kudisana kwamunoita kuri kutoengejekavo maningi.
4 Izvi zviri kutiita kuti tidade ndimwi pakati po ungano ya Mwari, ngo pamusoro po kucungirira no rutendo hwamunokhombijira, pakati po zvineso no kuteverehwa kwamunosongana nako.
5 Ici citatijo co kutonga kwakarurama ka Mwari, kunomuita kuti mufanere kunghwina mu Umambo hwa Mwari hwamunotambujikirari.
6 Kutonga uku, kwakarurama, ngokuti Mwari anotambuja vaya vanotambuja imwimwi.
7 Asi imwimwi muri kutambujikari, munozozorojwa pamwepo na itusu pakuvoneswa ka Mambo Jesu ecivha kudenga no ngirozi jake jinosimba
8 ari mu murazvu wo muriro, eciza kuzohwirijira vaya vacikazivi Mwari, na vaya vacikazwiri masoko akanaka ngo pamusoro pa Jesu Mambo wedu.
9 Ivona vanozopejwa mbhera narini pamberi pa Mambo no pamberi po hukuru hwo simba rake,
10 paanozoviya kuzokujwa ngo vateveri vake, ecishamaiswa nga vaya vano rutendo, ngokuti makatenda ucapupu hwatakapa.
11 Tinomuitira mukumbiro no cinangwa condhoco, kuti Mwari amuvone kuti munofanera kudanija kwaakamuita. Ngo simba rake, aite zvese zvinomudakaja kuti mabasa enyu ese okutenda abudirire.
12 Zina ra Mambo wedu Jesu rikujwe ndimwi. Imwimwi makabatana naye mukuzwirana no unyasha hucikaezaniswi hwa Mwari wedu no hwa Mambo Jesu Kristu.
Masoko o Pasi
^ Anodanijwazve kuti Sira.
