2 Vatesaronika 3:1-18
3 Pakupejisira hama, endereranyi mberi mecitiitira mukumbiro, kuti soko ra Jehovha* rienderere mberi recikura ngo kukasika no kukujwa inga zviri kuitika pakati penyu,
2 kuti tisujunuhwe ku vandhu vakashata no vanokhuvaza, ngokuti asipi vandhu vese vano rutendo.
3 Ngokuti Mambo wakagondeka. Iyena anozomuvangisa no kumujivirira ku mushati.
4 Kusiyapo izvo, tinomuthemba muna Mambo kuti muri kuenderera mberi meciita zvatakamuvhunja, munozoendererazve mberi mecizviita.
5 Mambo ngaaenderere mberi ecitungamirira ushoni mwoyo jenyu kuti mude Mwari no kucungirira ngo ndava ya Kristu.
6 Hama, tinomuvhunja ngo zina ra Mambo Jesu Kristu kuti musiyane no hama iri yese inofamba mu njira icikafaneri, kuciripi mukuzwirana no zvirovejeso zvotakamupa.
7 Imwimwi munoiziva njira yamunodikana kutitevejera ndiyona, ngokuti itusu atizivi kuita zviro zvicikafaneri pakati penyu.
8 Itusu atizivi kuha ciro co mundhu mahara. Asi itusu taishanda ngo simba, tecivangisira usiku no masikati kuti titame kuita mutoro ku mundhu ariwese.
9 Asipi kuti itusu atifaneri kuashira zviro zvenyu, asi taida kuti imwimwi mutevejere muezaniso wedu.
10 Patainga na imwimwi taimuvhunja kuti: “Kudari mundhu acikadi kubata basa, acadoha.”
11 Ngokuti tiri kuzwa kuti, vamweni pakati penyu vari kuita zvicikafaneri, avadi kubata basa, asi vanonghwinira mu shwiro jiciripi javo.
12 Vandhu ava tinovavhunja no kuvavangisa mu zina ra Mambo Jesu Kristu, kuti vanodikana kubata basa vakathiva voha zvavanowana.
13 Imwimwi hama, mucadoremba kuita zvakanaka.
14 Kudari ariwese akatama kuzwira masoko akatahwari mu karata iyi, bhasopanyi naye, mutame kushamwarijana naye, kuti apseruke.
15 Mucamuvona inga muvengi, asi endereranyi mberi mecimupangira inga hama.
16 Mambo wo runyararo, ngaamupe runyararo mukuvo wese mu njira jese. Mambo ngaave na imwimwi mwese.
17 Nga uwu mucungamijo wangu inini Pauro, wandatara ngo nyara jangu, unoita citatijo mu karata jangu jese; ndiwona matariro angu.
18 Unyasha hucikaezaniswi hwa Mambo wedu Jesu Kristu, ngahuve na imwimwi mwese.
Masoko o Pasi
^ Vonanyi Kudurujihwa ko Magama .
