Abhakuki 1:1-17
1 Masoko akaashira muporofeti Abhakuki* mu civoniso:
2 Mbhera rini, Jehovha ndinozocema* kuti mundibesere, asi imwimwi mucikandizwi?
Mbhera rini ndinozokumbira kuti mundibesere pa kuhwiswa kwa ndinoithwa, asi imwimwi mucikandiponesi?
3 Ngenyi munondiregera ndecivona zviro zvakashata?
Ngenyi munoregera vandhu vanoshupha?
Ngenyi ndinogara ndecivona umbavha no kuhwisana?
Ngenyi kuno kupopana no kuhwisana?
4 Ngo kudaro, mutemo aucina simba,Ururami ahucaithwi.
Vandhu vakashata vatendeneja vandhu vakarurama;Shwiro ajicatongwi ngo ururami.
5 “Vonanyi vandhu, musotesese!
Sotanyi makakahamara, shamaisikanyi;Ngokuti mu njiku jenyuKunozoitika zvamucikazotendi, pikija ariwese akamuverengera.
6 Ngokuti ndiri kuviisa Vakaradhiya,Jinja rakashata, rinopengerekera.
Irona rinoguma ndhambo ko nyikaRecitora nyumba jiciripi jaro.
7 Ivona vanothyisa no kutetemeresa.
Vanogaja vega mutemo no zvigaro.
8 Haci javo jinogogoma maningi kupinda makhamba,Ijona jinothyisa maningi kupinda mapumbhi o cousiku.
Haci javo jo hondo jinogogoma maningi;Haci javo jinovha ndhambo kamare.
Ijona jinogara inga hokotora painonga yecida kuhubha ciro.
9 Ivona vese vanoviya vakanasiririka kuti vahwise.
Pavanonga vakaungana, kumeso kwavo kunoita inga mbhepo yo kumavhazuva,Ivona vanounganija vandhu vabathwa inga musanga.
10 Ivona vanoshora majimamboVanoseka vatongi.
Vanoseka ndau jese jakavangiswa;Vanounganija mututu wo mavhu, vomatora.
11 Ivona vanoenda, vopindirija inga mbhepo,Asi ivona vanozova no ndava,Ngokuti vanonanga kuti simba ravo rinovha ku cimwari cavo.”
12 Jehovha, imwimwi muriyo no kucingaperi.
Mwari wangu, Wakacena wangu, imwimwi amufi.
Jehovha ndimwi makavagaja kuti vaite zvamakatonga;Imwimwi muri Buwe rangu, ndimwi makavasana kuti vakhawise.*
13 Majiso enyu akacena zvokuti aadakari ngo kuvona zvakashata,Imwimwi amusiyi zvakashata zveciitika.
Ngenyi munosiya vandhu vanonyeperana?Ngenyi munogara makanyarara mecisiya vandhu vakashata vecimija vandhu vakarurama maningi kupinda ivona?
14 Ngenyi munoita kuti vandhu vagare inga hove jo mu jombe,Inga zvinyama zvinogwezva zvicina mutungamiriri?
15 Muvengi* anobata vese ngo civejo.
Iyena anovabata ngo juya rake,Anovatanda ngo cokiyo cake.
Ngo kudaro, iyena anodakara.
16 Izvi ndizvona zvinoita kuti aite mupiro ku juya rakeAitezve mupiro ku cokiyo cake;Izvi zvinoita kuti zvokuha zvake zvive zvakanuna,Zvaanoha, zvinovaka muviri.
17 Asi izvi zvinoreva kuti iyena anozoenderera mberi ecibata hove ngo juya rake?
Eciuraya vandhu acikavaitiri pena?
Masoko o Pasi
^ Kangaije zvingareva “Kukumbatira.”
^ Kana: “ndinozorira.”
^ Kana: “vapangire.”
^ Zvinoreva, muvengi Karadhiya.
