Abhakuki 2:1-20
2 Ndinozogara ndakaima pa ndau yangu yokurindira,Ndinozoima panyezuru po mupfimbiji.
Ndinozogara ndakasota kuti ndivone zvaanoda kuzondivhunjaNo zvandinodikana kudavira kudari akandipangira.
2 Ngo kudaro, Jehovha wakandidavira kudari:
Tarai zvauri kuvonari pa mapuwe mu njira yakajeka,Kuti wiya anozozviverenga ngo izwi guru, akasike kuzvizwisisa.
3 Ngokuti civoniso ici, cinozokwanirisika pa nguva yakagajwa,Icona cinozokwanirisika, asipi cokunyepa.
Pikija cikaita inga ciri kunonoka, endererai mberi wakaciimira!
Ngokuti cinozokwanirisika kamare.
Acizononoki!
4 Sotesesai wiya anojikuja;Mu mwoyo mwake amuna ururami.
Asi mundhu wakarurama anozopona ngo kugondeka* kwake.
5 Zvokadi, vhinyu inocengeja,Mundhu anojikuja aazobudiriri pa kuita zvaakaronga.
Iyena anoenderera mbheri eciha inga Guva;*Iyena wakaita inga rufu, aaguti.
Anoenderera mbheri eciunganija majinja eseNo vandhu vese kwaari.
6 Vandhu vese ava, avazomushori no kumutuka here?
Ivona vanozonanga kudari:
‘Nyathwa ka wiya anounganija zviro zvicikaripi zvake.Anozozviita mbhera rini?Nyathwa ka wiya anoita magava akawanda!
7 Vandhu vaunoitiraro magava, avazokumukiri here?
Ivona vanozomuka, vozokuzungunyisa kamare,Ivona vanozokutorera zviro zvako.
8 Ngokuti iwewe wakauraya vandhu vazinji,Woitira zviro zvakashata pa nyika,Ku madhorobha no vagari vemo vese.Wotora majinja akawanda,Vandhu vese vakasara vo majinjemo, vanozokutoreravo.
9 Nyathwa ku mundhu wiya anowana upfumi ngo njira icizivi kururama kuti abese vandhu vo pamuzi pake,Kuti avake saki yake pa ndau yakakhwira,Kuti atize dambujiko!
10 Mazano ako anova no muviyo wokupseruja vandhu vo pamuzi pako.
Paunonga weciuraya vandhu vazinji, iwewe uri kuzvishaishira wega.
11 Buwe rinozocema riri mukati mo biravira,Mwamba jo denga, jinozodavira.
12 Nyathwa kwa wiya anovaka dhorobha ngo kuuraya vandhu,Na wiya anoimisa dhorobha, ngo njira icizivi kururama!
13 Izwai! Asipi Jehovha wo hondo anoita kuti vandhu vashande ngo simba kuti vagutise muriro,No kuita kuti majinja ashandire biresi?
14 Ngokuti nyika inozozara ngo kuziva nduma ya JehovhaInga kumwa inopfukija jombe.
15 Nyathwa kwa wiya anopa mudoni wake zviro zvokumwa,Ecizvivhenganija no hasha no ushungu kuti varejere,Kuti avone umitu hwavo!
16 Iwewe unozoguta ngo nyowa kuciripi ngo nduma.
Imwaivo.Vonesai kutama kusokwa kwako.
Unozoguma mukuvo wokuti unozomwa kopo yo mukono muho wa Jehovha,Nduma yako inozofukijwa ngo nyowa;
17 Ngokuti kuhwisa kwawakaita Rebhanoni kunozokufukija,Kuuraya kowakaita zvinyama kunozokuviira,Iwewe wakauraya vandhu vakawandaWoita zviro zvakashata pa nyika,Wecihwisa madhorobha no vagari vayo.
18 Cithombe cakavezwa apana zvacinoshandaNgokuti icona cakaithwa ngo mundhu basi
Cithombe co simbi no mujijisi wo kunyepa,Apana zvazvinobesa,Pikija muumbi wazvo anozvithemba ecizviita zvimwari zvicikashandi no zvicikakwanisi kuvereketa.
19 Nyathwa ku mundhu wiya anovhunja dimbu ro danda kudari: “Mukai!”
Kana kuti mundhu wiya anovhunja buwe ricikabhuyi kudari: “Mukai! Tijijisei!”
Vonanyi! Izvona zvakapendhwa ngo goridhi no sirivha,Mukati mazvo, amuna mwiha wokufema.
20 Jehovha ari mu themberi yakacena.
Nyika yese ngainyarare pamberi pake!
Masoko o Pasi
^ Kangaije: “kutenda; rutendo hwake.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
