Abhakuki 3:1-19
3 Mukumbiro wo muporofeti Abhakuki ngo maitiro o kucumba:
2 Jehovha ndakazwa ngo pamusoro penyu.
Jehovha ndakakahamara maningi ngo mabasa enyu.
Pakufamba ko makore, zviitenyizve!
Pakufamba ko makore, zvizivisenyi.
Mucakanganwa kuita usizi pa mukuvo wo joweyowe.
3 Mwari wakaviya ecivha ku Temani,Wiya Wakacena wakavha ku Dundhu Parani. (Sera)*
Ukuru wake wakafukija kumatenga;Kukujwa kwake kwakazaja nyika.
4 Kumonikira kwake kwaiita inga ruvheneko.
Munyara make maibuda murazvu muviri,Ndimona maifindara simba rake.
5 Kumbeji kwake kwainga kuno ndhendha,Sure kwake kwainga kuno mutungu.
6 Iyena wakaima, nyika yotetemera.
Anondhyandhyisa majinja ngo kumasota.
Matundhu o kare akaphwanyiwa-phwanyiwa,Zvimatundhu zvo kare zvakakotama.
Makwanja o kare, ngo ake.
7 Ndakavona vandhu vanogara mu matende o nyika yo Kushi vecitambujika.
Mapendera o tende yo nyika yo Midhiyani akatetemera.
8 Jehovha, makacamwira murambo here?Ushungu hwenyu huri kubwakira murambo?
Makacamwira jombe?
Ngokuti makapakira pa haci jenyu,Ngoro jenyu jo hondo jakawina.*
9 Mabudisa uta hwenyu mohunasirira kuti ufure.
Zvijito* zvenyu zvino mbhiko yenyu. (Sera)
Makaparajanisa nyika ngo kumwa.
10 Matundhu akagombonyoka no kuhwajihwa paakamuvona.
Kwakana nvura yakawanda maningi.
Kumwa yakajika yakatindhira.
Iyona yakamusa kumwa yayo kwenda mudenga.
11 Zuva no mweji zvakagara pa ndau yazvo yakakhwirira.
Mupasha yenyu yakabuda inga ruvheneko.
Mukhondo yenyu yaimonikira inga mbheni.
12 Makafamba munyika makacamwa.
Makacika-cika* majinja ese ngo hasha.
13 Makaenda koponesa vandhu venyu kuti muponese wokuzojwa wenyu.
Makauraya mutungamiriri* wo nyumba yo vakashata.
Iyena wakasiiwa pambhene, kutangira pa njiki mbhera padenga.* (Sera)
14 Makabaya musoro yo masoca ake ngo nvuti jakePavakaviya kuzotiparaja vano cishatihwa.
Ivona vaidakara maningi pavaiuraya mundhu anotambujika, veciita ngo kumufindarira.
15 Makapinda ngo mu jombe ngo haci jenyu.Makapinda ngo mukumwa yakawanda inopopoma.
16 Inini ndakazwa, maura angu akatetemera;Pandakazvizwa, muromo wangu wakadhyandhya.
Maphondo angu akapera simba;Makumbo angu akatetemera.
Asi ndinoimira njiku yo dambujiko ndakagajana,Ngokuti iyona iri kuviira vandhu vaya vanotihwisa.
17 Pikija mufigu ukatama kupfikitira,Muuvha wotama kubara mucero;Muti wo maorivhe wotama kubara,Maminda otama kuivhisa;Mavhuta opera mu phandu,*Mumaphandu motama kuva no n’gombe;
18 Asi kwandiri, ndinozodakara maningi ndi Jehovha;Ngokuti Mwari muponesi wangu.
19 Mambo Mukuru-kuru Jehovha ndiyena simba rangu,Acaita kuti soka jangu jiite inga soka jo nondoIyena anozondifambisa mu ndau jakakhwira.
Masoko o Pasi
^ Vonanyi Kudurujihwa ko Magama.
^ Kana: “jakapona.”
^ Kangaije: “mupasha.”
^ Gama ngo Gama: “makashokota; makasokora.”
^ Gama ngo Gama: “musoro.”
^ Gama ngo Gama: “mumusipa.”
^ Kana: “cibaya.”
