Agayo 1:1-15
1 Mu njiku yo kutanga yo mweji wo citandhatu wo gore ro cipiri ro kutonga ka Mambo Dhariyo, Jehovha ecishandisa muporofeti Agayo,* wakavhunja Zorobhabheri, mwana wa Saratiyeri govhernadhori wo Judha na Joshuwa mwana wa Jehozadhaki, mupiri mukuru, kudari:
2 “Jehovha wo hondo anonanga kudari: ‘Vandhu ava vanoti: “Auto wakwana mukuvo wokuti nyumba* ya Jehovha ivakiswezve.”’”
3 Jehovha wakavhunjazve muporofeti Agayo kudari:
4 “Mungatogaradi kamare mu nyumba jenyu jakanasa kuseja* kuveni nyumba iyi yapera kuphwanyika?
5 Jehovha wo hondo anoti: ‘Rangariranyi ushoni zvamunoita.
6 Imwimwi munosima mbeu yakawanda, asi munokotora shoma. Munoha asi amuguti. Munomwa asi amupeji nyota yenyu. Munosimira asi amujiihwi. Vaya vanoshanda vanodira mare yavanopocera muborosa rakabovoka.’”
7 “Jehovha Mwari wo hondo anoti: ‘Rangariranyi ushoni zvamunoita.’
8 “Jehovha anoti: ‘Khwiranyi pa dundhu muviise matabwa. Vakanyi nyumba yangu kuti ndiidakarire no kukujwa ngo ndava yayo.’”
9 “Jehovha wo hondo anoti: ‘Maivetera zviro zvizinji asi makaashira zvishoma. Pamakaviisa zvishomezvo mumba, inini ndakazvifurija.* Ngenyi ndakaita izvi? Ngokuti nyumba yangu yapera kuphwanyika. Kuveni imwimwi muri kubatikana ngo kunasirira nyumba jenyu.
10 Denga rakamunyima cando, nyika aizivi kumubarira mbeu.
11 Ndakaviisa cikava kuti civiire nyika, matundhu, mbeu, vhinyu imbza, mafuta no zvese zvinobahwa pa nyika, vandhu no mushambi, kubatanijavo no zvese zvamunoita.’”
12 Zorobhabheri mwana wa Saratiyeri na Joshuwa mwana wa Jehozadhaki, mupiri mukuru, no vandhu vese, vakazwa izwi ra Jehovha Mwari wavo, no masoko a Agayo muporofeti, ngokuti Jehovha Mwari wavo, wakamutuma kuti aende kwavari. Vandhu vakatanga kuthya ngo ndava ya Jehovha.
13 Perapo Agayo ndhumwa ya Jehovha wakavhunja vandhu masoko aya mukuzwirana no basa raakagajwa ndi Jehovha, eciti: “Jehovha anoti: ‘Ndina imwimwi.’”
14 Ngo kudaro Jehovha wakaita kuti Zorobhabheri mwana wa Saratiyeri, govhernadhori wo Judha na Joshuwa mwana wa Jehozadhaki, mupiri mukuru no vandhu vese, vade kubata basa. Ivona vakaviya votanga kuvaka nyumba ya Jehovha wo hondo, Mwari wavo.
15 Izvi zvakaitika mu njiku makumaviri na murongomuna yo mweji wo citandhatu, mugore ro cipiri ro kutonga ka Mambo Dhariyo.
Masoko o Pasi
^ Zvinoreva: “Wakabarihwa pa Mabuso.”
^ Kana: “themberi.”
^ Kana: “kunyara.”
^ Kana: “ndakazvifutija.”
