Agayo 2:1-23
2 Mu njiku makumaviri na posa yo mweji wo cinomwe, Jehovha wakavhunja muporofeti Agayo kuti:
2 “Vhunjisai Zorobhabheri, mwana wa Saratiyeri, govhernadhori wo Judha, na Joshuwa, mwana wa Jehozadhaki, mupiri mukuru, no vandhu vese kuti:
3 ‘Aripo wasara pakati penyu wakavona kuseja kwaiita nyumba* iyi? Wari iri kuvoneka kudini? Muri kuivona kuti aizivizve kuseja* inga zvayaiita kare?’
4 “Jehovha anoti: ‘Vangai Zorobhabheri, vangai Joshuwa, mwana wa Jehozadhaki, mupiri mukuru.’
“Jehovha anoti: ‘Vanganyi imwimwi vandhu vo nyika kuti muite basa.’
“Jehovha wo hondo anoti: ‘Ndina imwimwi.
5 Mucakanganwa zvondakamuvhunja pomakabuda mu nyika yo Ejipita, mujimu wangu unogara pakati penyu.* Mucathya.’”
6 “Ngokuti Jehovha wo hondo anoti: ‘Kwasara cimukuvo cidoko, inini ndinozozungunyisa matenga, nyika, jombe no pasi pakaoma.’
7 “Jehovha wo hondo anoti: ‘Inini ndinozozungunyisa majinja ese. Zviro zvinosisira zvo majinja zvinozonghwina, inini ndozozaja nyumba iyi ngo nduma.’
8 “Jehovha wo hondo anoti: ‘Sirivha ngo yangu, goridhi ngo rangu.’
9 “Jehovha wo hondo anoti: ‘Nduma inozova no nyumba iyi, inozokura maningi kupinda yo kutanga.’
“Jehovha wo hondo anoti: ‘Ndinozoita kuti pa ndau iyi pave no runyararo.’”
10 Mu njiku makumaviri na murongomuna yo mweji wo cipfumbamwe, wo gore ro cipiri ro kutonga ka mambo Dhariyo, Jehovha wakavhunja muporofeti Agayo kuti:
11 “Ndapota vhunjisai vapiri ngo pamusoro po mutemo. Nga izvi zvinonanga Jehovha wo hondo:
12 “Kudari mundhu akadira nyama pa nguvo yake yakaceneswa, nguvoyo yopsasa zvokuha zvakabikwa, vhinyu, mafuta o kubika ndiwona kana cokuha ciri cese, kunanga kuti zvirozvo zvinoceneswa?”’”
Vapiri vakadavira kuti: “Haiwa!”
13 Perapo Agayo wakavhunjisa kuti: “Kudari mundhu akasvipiswa ngokuti wapsasa mutembo,* perepo wopsasa ciri cese co zviro izvi, ciroco cinozosvipiswavo?”
Vapiri vakadavira kuti: “Hina, cinozosvipiswavo.”
14 Ngo kudaro Agayo wakati: “Jehovha anoti: ‘Uwu ngo mugariro o vandhu ava. Uwu ngo mugariro wakaita jinja iri pambeji pangu no mabasa ese o nyara javo. Zvese zvovanopira zvakasvipiswa.’
15 “‘Ndapota, kuvhira wari rangarijisisanyi zviro izvi: Zvicinyi zvaiitika pacito padihwa buwe pa nyezuru po buwe rimweni mu themberi ya Jehovha?
16 Mundhu paaiyenda ku mututu jo mucece jo mbeu kuti aende kowana makumaviri o mupimo, waiwana gumi ro mupimo basi, mundhu paaiyenda kunosvinihwa vhinyu kuti awane makumashanu o mupimo, waiwana makumaviri o mupimo basi.
17 Jehovha anonanga zviro izvi: ‘Ndakapeja mabasa ese o nyara jenyu ngo huvhe,* ngo nvura yo mapuwe, no kupisa zvirimwa zvenyu ngo zuva. Asi apana na umwe wenyu wakaviya kondiri.’’
18 “‘Rangarijisisanyi zviro izvi kuvhira pa njiku iyi, kuvhira pa njiku yo makumaviri na murongomuna yo mweji wo cipfumbamwe, kuvhira pa njiku yakatanga kuimiswa maambo* o themberi ya Jehovha. Rangarijisisanyi zviro izvi:
19 Jicirimo mbeu mu nyumbu? Muuvha, mufigu, miti unobara maromaa no maorivhe, miti iji jabara mucero? Kuvhira njiku iyi, ndinozomuviisira makomborero.’”
20 Jehovha wakavhunjazve Agayo hwocipiri, mu njiku yo makumaviri na murongomuna yo mwejiwo eciti:
21 “Vhunjai Zorobhabheri govhernadhori wo Judha kuti: ‘Ndiri kuda kuzungunyisa matenga no nyika.
22 Ndinozophwanya-phwanya zvigaro zvo umambo, ndinozopeja simba ro umambo hwo majinja. Ndinozophwanya-phwanya ngoro* jo hondo no vapakiri vajo. Ndinozowisa haci no vapakiri vajo. Umwe nga umwe anozourawa ngo banga ro hama yake.’”
23 “Jehovha wo hondo anoti: ‘Mu njiku iyi, inini ndinozokutora iwewe, mushandiri wangu Zorobhabheri, mwana wa Saratiyeri.’ Nga izvi zvinonanga Jehovha. Jehovha wo hondo anoti: ‘Inini ndinozokuita mbhete* yo kudhindha ndiyona, ngokuti ndiwe wondakasana.’”
Masoko o Pasi
^ Kana: “themberi.”
^ Gama ngo Gama: “nduma.”
^ Kangaije: “mujimu wangu waiima pakati penyu.”
^ Muviri wo mundhu wakafa.
^ Kana: “nvunvuti.”
^ Kana: “fundasau yo.”
^ Kana: “kareta.”
^ Kana: “aneri.”
