Amosi 1:1-15
1 Masoko a Amosi,* muhavisi wo mavhuta o ku Tekowa, aakaashira mucivoniso ngo pamusoro po Iziraeri, mu njiku ja Uziya mambo wo Judha no mu njiku ja Jerubhowamu mwana wa Jowashi, mambo wo Iziraeri, makore maviri kucito kwaitika mudhuma ngo pasi* nga aya:
2 “Jehovha anozobhonga mu Ziyoni,
Izwi rake rinozokhwira mu Jerusarema.
Munda jo vahavisi jinozocema,*Panyezuru po dundhu ro Kameri panozovoma.”
3 “Jehovha anonanga kudari:‘“Andizoregeri kuita zvondakaronga ngo pamusoro po Dhamasko, ngokuti vakapanduka katatu kana karongomuna,Ngokuti vakakwiya-kwiya Giriyadhi ngo makwiyo o simbi.
4 Ngo kudaro, ndinozotumira muriro ku nyumba ya Azaeri,Muriro unozopisa mupfimbiji jakavangiswa ja Bhenihadhadhi.
5 Ndinozophwanya mugogo jo musuvo jo Dhamasko;Ndinozopeja vagari vo Bhikati-avheniNo mutongi wo Bheti-edheniVandhu vo Siriya, vanozotohwa kwenda kuuranda ku Kiri.” Izvi ngo zvinonanga Jehovha.’
6 Jehovha anonanga kudari:‘“Andizoregeri kuita zvandakaronga ngo pamusoro po Gaza, ngo ndava yo kupanduka kwavo katatu kana karongomuna,Ngokuti vakatora vandhu vakasungwa kakuvadira mu nyara ja Edhomi.
7 Ngo kudaro, ndinozotumira muriro ku mupfimbiji jo Gaza,Muriro unozopisa mupfimbiji jayo jakavangiswa.
8 Ndinozopeja vagari vo Ashidhodhi,Na wiya ari kutonga mu Ashikeroni;Ndinozohwisa Ekironi,Vafiristi vakasara, vanozofa.” Izvi ngo zvaanonanga Mambo Mukuru-kuru Jehovha.’
9 Jehovha anonanga kudari:‘Andizoregeri kuita zvondakaronga ngo pamusoro po vandhu vo Tiro, ngo ndava yo kushaisha kwavo katatu kana karongomuna,Ngokuti vakatora vakasungwa vovadira mu nyara ja Edhomi,No kutama kwavo kuceukija citenderano cakaitwa ngo hama javo.
10 Ngo kudaro, ndinozotumira muriro ku mupfimbiji jo Tiro,Muriro unozopisa mupfimbiji jayo jakavangiswa.’
11 Jehovha anonanga kudari:‘Andizoregeri kuita zvondakaronga ngo pamusoro pa Edhomi, ngo ndava yo kupanduka kwake katatu kana karongomuna,Ngokuti iyena wakateverera hama yake ngo banga,Oramba kukhombija usizi,No ushungu hwake, anoenderera mberi acivavhavhura,Oramba akavacamwira mbhera narini.
12 Ngo kudaro, ndinozotumira muriro ku Temani,Muriro unozopisa mupfimbiji jakavangiswa jo Bhozira.’
13 Jehovha anonanga kudari:‘“Andizoregeri kuita zvondakaronga ngo pamusoro po Vaamoni ngo kupanduka kwavo katatu kana karongomuna,Ngokuti vakamwesa ndani jo vanakaji vano mimba vo Giriyadhi kuti vaengejere ndharaundha yavo.
14 Ngo kudaro, ndinozobwakija muriro mu mupfimbiji jo Rabha,Muriro unozopisa mupfimbiji jayo jakavangiswa,Kunozozika kukhuwa* ko hondo pa njiku yo kuhwisana,No dutu* pa njiku yo mbhepo.
15 Mambo wavo anozotohwa woendeswa ku uranda pamwepo no vatongi vake.” Izvi ndizvona zvinonanga Jehovha.’
Masoko o Pasi
^ Zvinoreva: “Kuva Mutoro” kana “Kutakura Mutoro.”
^ Kana: “citeke-teke.”
^ Kana: “jinozorira.”
^ Kana: “kumima.”
^ Kana: “cinguru.”
