Amosi 4:1-13
4 “Izwanyi soko iri n’gombe jo kaji jo ku Bhashani,Jiri mu dundhu ro Samariya,Imwimwi vanakaji munobira vandhu vanozvidodokesa no kubzinyirira* varombo,Mecivhunja majimwamuna enyu kudari: ‘Tipenyi doro kuti timwe!’
2 Mambo mukuru-kuru Jehovha wakapika ngo uceni hwake, kudari:‘“Jinozoguma njiku jamunozopakaikwa* inga nyama yakapakaikwaVanonga vasara pakati penyu vanozokweviya inga zvivejo.
3 Imwimwi munozobuda ngo mu ndau jakashama jo mupfimbiji, umwe nga umwe ngo pa ndau yakashama iri pambeji pake;Munozogogomehwa moendeswa ku Harimoni.” Izvi ndizvona zvinonanga Jehovha.’
4 ‘Viyanyi ku Bheteri mushaishe,Viyanyi Girigari muengejere zvishaishi zvenyu!
Viisanyi mupiro jenyu comangwanani,Moviisa cogumi pa njiku yo citatu.
5 Piranyi pau icina mbijo inga mupiro wokubonga;Zivisanyi ngo izwi guru mupiro jenyu jo kuzvipira!
Ngokuti izvo, ndizvona zvamunodakarira kuita imwimwi vandhu vo Iziraeri.’ Izvi ndizvona zvinonanga Mambo Mukuru-kuru Jehovha.
6 ‘Inini ndakaita kuti meno enyu acene, motama zvokuha mu madhorobha enyu eseNdakaita kuti mutame zvokuha mu nyumba jenyu jese;Asi imwimwi amuzivi kuviya kwandiri.’ Izvi ndizvona zvinonanga Jehovha.
7 ‘Ndakaregera kunisa nvura pa mweji mutatu, kukotora kucito kwaguma;Ndainisa nvura ku dhorobha rimwe, asi kudhorobha rimweni akucaina.
Ndainisa nvura ku munda umwe,Asi ku munda umweni akucaina, kwaioma.
8 Vandhu vo madhorobha maviri kana matatu, vaiherereka kwenda ku dhorobha rimweni kopsaka kumwa yo kumwa,Pikija zvakadaro, avacaiwana kumwa inokwana;Asi imwimwi amuzivi kuviya kwandiri.’ Izvi ndizvona zvinonanga Jehovha.
9 ‘Ndakaita kuti zvirimwa zvenyu zvipse no kuvora.
Imwimwi maiengejera munda no muuvha yenyu,Asi ndere yakapeja mufigu yenyu no muti yo maorivhe;Pikija zvakadaro, imwimwi amuzivi kuviya kondiri.’ Izvi ndizvona zvinonanga Jehovha.
10 ‘Ndakamutumira mutungu,* inga mutungu jo ku Ejipita.
Ndakauraya majaha enyu ngo banga, ndotora haci jenyu.
Ndakaita kuti kunuha ko Akampamento yenyu kuzike mbhera mu miro jenyu;Asi imwimwi amuzivi kuviya kondiri.’ Izvi ndizvona zvinonanga Jehovha.
11 ‘NdakamupejaInga mapejero ondakaita Sodhoma no Gomora.
Imwimwi mwaita inga cica* cavhiswa pa muriro;Asi imwimwi amuzivi kuviya kwandiri.’ Izvi ndizvona zvinonanga Jehovha.
12 Ngo kudaro, ndinozokuitira zvakafanana, iwewe Iziraeri.
Zvecivoneka kuti ndiri kuda kukuitira izvi,Iwewe Iziraeri, nasirirai kuti uviye kuzosongana na Mwari wako.
13 Izwai! iyena wakaumba matundhu no kusika mbhepo;Iyena anozivisa mundhu murangariro jake,Wocinja kueja, koita cidima,Anocika ndau jakakhwirira jo pasi pano;Zina rake ndi Jehovha, Mwari wo hondo.”