Amosi 5:1-27
5 “Imwimwi vo nyumba yo Iziraeri, izwanyi masoko aya ngo maitiro okucumba:
2 ‘Iziraeri mbhandwe iya, yawa;Iyona aicakwanisizve kumuka.
Yasiiwa iri yega mu nyika yayo;Apana mundhu angaimusa.’
3 “Ngo kudaro, Mambo Mukuru-kuru Jehovha anonanga kudari:
‘Dhorobha rinoenda korhwa rino vandhu vanokwana kuita 1.000, rinozosara no vandhu vanokwana kuita zana;Dhorobha rinozoenda korhwa no vandhu vanokwana kuita zana, rinozosara no vandhu vanokwana kuita gumi. Izvi ndizvona zvinozoitika no nyumba yo Iziraeri.’
4 “Jehovha anovhunja nyumba yo Iziraeri kudari:
‘Ndipsakenyi, muenderere mberi mecipona.
5 Mucapsanga Bheteri,Mucaenda ku Girigari nee kupinda ngo Bheri-shebha,Ngokuti Girigari inozotohwa,Bheteri rinozosara ricina ciro.
6 Psakanyi Jehovha, muenderere mberi mucipona,Kuti iyena atame kubwakira nyumba ya Josefa inga muriro,No kupisa Bheteri pacina mundhu anojima muriro.
7 Munocinja kutonga kwakarurama, mokuita kuti kuvave,Munokhandira pasi ururami.
8 Wiya wakasika ndhondho jo Kima no ndhondho jo Khesiri,*Wiya anocinja cidima coita mangwanani,Wiya anoita kuti masikati asvipe inga usiku,Wiya anodanija kumwa yo mujombeKuti aidururire pa nyika,Zina rake ndi Jehovha.
9 Iyena anozopeja vandhu vano simba ngo civhumbu,Anozopeja ndau jakavangiswa.
10 Ivona vanozonda vaya vanotonga vandhu ngo ururami pa musuvo po dhorobha,Vanonyenya vaya vanobhuya cokwadi.
11 Zvecivoneka kuti munovangirija murombo kuti apagari munda waanoarugari,No kumutorera zvirimwa zvake inga mushabo,Amuzoendereri mberi mucigara mu nyumba jomakavaka jo mapuwe akacecwaNee amuzomwi vhinyu yo muuvha jakanaka jomwakasima.
12 Inini ndinoziva kuti makapanduka kanganaNo kuziva kuposa kwenyu kukuru.Imwimwi munoshupha wakarurama,Motendera kudyekehwa,Moramba zvitendehwa zvo murombo pa musuvo wo dhorobha.
13 Ngo kudaro, vazivi vanozonyarara pa mukuvo wondhowo,Ngokuti inozova nguva yokutambujika.
14 Psakanyi zvakanaka, kuciripi zvakashata,Kuti muenderere mberi mecipona.
Mukadaro, Jehovha Mwari wo hondo, anozova na imwimwi,Inga zvamunonanga kuti iyena ana itusu.
15 Nyenyanyi zvakashata, mude zvakanaka,Tonganyi ngo njira yakarungama, pa musuvo wo dhorobha.
Kangaije Jehovha Mwari wo hondoAnozokhombija unyasha ku vaya vanozosara vo nyumba ya Josefa.’
16 “Izvi ndizvona zvinonangwa ndi Jehovha Mwari wo hondo, Jehovha anoti:
‘Mu mabazari ese munozozika mbhere,*Mu makwanja ese, vandhu vanozoti: “Yowee, yowee!”
Vanozodanija varimi kuti vaceme*Vozodanija vandhu vanopagahwi pa kucema kuti varije mbhere.’*
17 ‘Mu munda yese yo muuvha munozova no mbhere;*Ngokuti inini ndinozopinda ngo pakati penyu.’ Izvi ndizvona zvinonanga Jehovha.
18 ‘Khombo ku vaya vanovetera njiku ya Jehovha!
Munoziva ngo zvapi zvinozoitika njiku ya Jehovha ikaviya?
Inozova yo cidima, haiwa ruvheneko.
19 Inozova inga yo mundhu ari kutiza mbhondoro, wowanana no ursu,Paanonghwina mumba wobata pa biravira, anorumwa ngo nyoka.
20 Njiku ya Jehovha inozova no cidima kuciripi ruvheneko;Kunozova kwakasvipa kucina ruvheneko.
21 Ndinonyenya mutambo yenyu, anditoidakariri,Andidakariri kunuhira ko mupiro jamunoita pa musongano jenyu jakacena.
22 Pikija imwimwi mukandipa zvipo zvokupiswa no mupiro,Andizozvidakariri;Nee andizodakariri mupiro jo kuzwana jamunoita jo zvinyama zvakapunda.
23 Mucandiitira musindo* ngo ndumbo jenyu;Mucandirijira mumbo jenyu mecishandisa zvinorijwa ngo shinda.
24 Kutonga kwakarurama ngakugogome inga kumwa,Ururami ngaupopome inga murambo unogara weipopoma.
25 Nandimwi vo nyumba yo Iziraeri, pa mainga mu zvipare ko makumarongomuna o makoreAmucaiitira inini mupiro no zvipo.
26 Wari imwimwi munozotora mambo wenyu Sakuti na Kaiwani,No zvithombe zvenyu, ndhondho yo cimwari cenyu comwakazviitira,
27 Inini ndinozomuendesa ku uranda ndhambo no Dhamasko,’ Izvi ndizvona zvinonangwa nga wiya ano zina rokuti Jehovha, Mwari wo hondo.”
Masoko o Pasi
^ Aya mazina o ndhondho jinovoneka jakaungana pamwepo, jicibudisa ciimo co zviro zvakasiyana-siyana, zvakadari inga zvinyama.
^ Kana: “ciriro.”
^ Kana: “varire.”
^ Kana: “vaite ciriro.”
^ Kana: “ciriro.”
^ Kana: “bharuriyo.”
