Amosi 6:1-14
6 “Khombo kwa vaya vanogarisika mu Ziyoni,Kwa vaya vanojizwa vakagarisika mu dundhu ro Samariya,Ku vanarume vari mu ndau jakakhwirira maningi pakati po majinja,Ku vandhu vanothembiwa ngo nyumba yo Iziraeri!
2 Endanyi ku Karine muvone.
Mukavheyo endanyi ku Hamati,Perepo dereranyi muende ku dhorobha ro Gati ro Vafiristi.
Kureva kuti madhorobha aya akanaka maningi kupinda umambo uhu* here?Kureva kuti ndharaundha javo, jakakura maningi kupinda ndharaundha jenyu here?
3 Muri kuita kuti murangariro jenyu jikanganwe njiku yo dambujiko here?Muri kuregera kuti utongi hunobesera ugandanga* uve pakati penyu here?
4 Ivona vanovata pa kama javo jo nyanga jo njou, votambarara pa kadera jakanakaVanoha mavhuta o mushambi no vana vo n’gombe vorume* vakapunda;
5 Ivona vanoimba ndumbo vecishandisa cimadangari,Vanoita zvinorijwa ngo shinda inga ndi Dhavhidhi,
6 Vanomwira vhinyu mu mujiyo mukuruVozora mafuta akanakisisa.
Asi avana basa no kutambujika ka Josefa.
7 Ngo kudaro, ndivona vanozotanga kuendeswa ku uranda,Mudakaro wa vaya vanogara vakatambarara pa kadera jakanaka unozopera.
8 ‘Mambo Mukuru-kuru Jehovha wakapika pacake,’ Jehovha Mwari wo hondo anoti:‘“Ndinonyenya kujikuja ka Jakobe,Ndinonyenya mupfimbiji jake jakavangiswa,Ngo kudaro, ndinopekeja dhorobha rake no zvese zvirimo mu nyara jo muvengi wake.
9 “‘“Kudari pamuzi pakasara gumi ro vandhu, ivona vanozofavo.
10 Umwe wo ukama* hwavo, anozoviya wovathwara, wovabudisa kunja no kupisa umwe nga umwe wavo. Iyena anozovhisa maphondo* avo mumba. Wozovhunjisa wiya anonga ari mukati mo nyumba kudari: ‘Ucino umweni mumba muno?’ Iyena anodavira kudari: ‘Andicina!’ Wotizve: ‘Garai wakanyarara! Ngokuti iyi asipi nguva yo kunanga zina ra Jehovha.’”
11 Ngokuti ndi Jehovha ari kunangari izvi,Iyena anowisa nyumba huru yosara yakaita mathere,Wokwiya-kwiya nyumba doko.
12 Kureva kuti pano haci jinogogoma panyezuru po mapuwe here?Kureva kuti mundhu angaparima ngo n’gombe?
Ngokuti imwimwi mwakacinja ururami wova muti uno nvenene,Mocinja mucero wo urungami wova muti unovava.
13 Imwimwi munodakara ngo zviro zvicikasisiri,Meciti: “Simba ratinaro atizivi kuriwana tega here?”
14 Ngo kudaro, imwimwi vo nyumba yo Iziraeri, ndinozoviisa jinja rinozomuhwisa.’ Izvi ndizvona zvinonanga Jehovha Mwari wo hondo,‘Ivona vanomushupha kuvhira ku Rebho-Hamati* mbhera ku Muterero* wa Arabha.’”
Masoko o Pasi
^ Zvinonangira umambo hwo Judha no hwo Iziraeri.
^ Kana: “ubhandidhu.”
^ Kana: “mathoyo; maburu.”
^ Gama ngo Gama: “hama ya baba.”
^ Kana: “mafupa.”
^ Kana: “pamanghwiniro o Hamati.”
^ Vonanyi Kudurujihwa ko Magama pa gama ro kuti: “Muterero.”