Amosi 7:1-17
7 Mambo Mukuru-kuru Jehovha wakandikhombija izvi: Iyena wakaumba cikwata co ndere pa mukuvo wo kumera ko mbeu yo kupejisira.* Mbeu iyi yakasimwa pasure po kucekwa ko maushwa a mambo wo Iziraeri.
2 Cikwata co ndere pocakapeja kuha zvakamera pa nyika, ndakananga kudari: “Mambo Mukuru-kuru Jehovha, ndapota, varegererenyivo! Jakobe anozoponesa* kudini? Iyena aana simba!”
3 Jehovha wakacinja murangariro wake, woti: “Azvicaitiki.” Izvi ndizvona zvakanangwa ndi Jehovha.
4 Izvi ndizvona zvondakatatijwa ndi Mambo Mukuru-kuru Jehovha. Mambo Mukuru-kuru Jehovha wakananga kuti kunozova no kutambujwa ngo muriro. Muriro wakaomesa kumwa yakajika no kupeja divi ro nyika.
5 Tevere ndakati: “Mambo Mukuru-kuru Jehovha, ndapota mucadaro, Jakobe anozoponesa* kudini? Iyena aana simba!”
6 Jehovha wakacinja murangariro wake, woti: “Izvo azvizoitikivo.” Izvi ndizvona zvakananga Mambo Mukuru-kuru Jehovha.
7 Iyena wakandikhombija izvi: Inini ndakavona Jehovha wakaima pa mupfimbiji wakavakwa ngo uruji wo kupima. Mu nyara make mainga muno uruji wo kupima.
8 Jehovha wakandivhunjisa kudari: “Uri kuvonenyi Amosi?” Inini ndakamudavira kudari: “Uruji wo kupima.” Jehovha wondivhunja kudari: “Ndiri kudira uruji hwo kupima pakati po vandhu vangu Vaiziraeri, andizovaregererizve.
9 Ndau jakakhwirira ja Izaki jinozosara jiri mathere, ndau jakacenesesa jo Iziraeri, jinozophwanyiwa. Inini ndinozoviya ndozohwisa ukama wa Jerobhowamu ngo banga.”
10 Amaziya mupiri wo Bheteri wakatumira masoko kuna Jerobhowamu Mambo wo Iziraeri, ecinanga kudari: “Amosi ari kumupandukira pakati po Vaiziraeri. Nyika aicakwanisi kucijikira masoko ake.
11 Ngokuti Amosi ari kunanga kudari: ‘Jerobhowamu anozofa ngo banga. Iziraeri anozotohwa wovhiswa mu nyika yake.’”
12 Amaziya wakavhunja Amosi kudari: “Iwewe muvoni, budai muno tizirai ku nyika yo Judha, upsange zvokuha zvako kondhono, uporofitire kondhoyo.”
13 Asi auvhirizve kuporofita mu Bheteri ngo kuti indau yakacena ya mambo no nyumba yo umambo.”
14 Amosi wakadavira kudari Amaziya: “Inini andicaingepi muporofeti, nee mwana wo muporofeti. Ndainga muhavisi, ndecirima munda yo mufigu.*
15 Asi Jehovha wakandivhisa pa basa rangu ro kuhavisa mavhuta. Jehovha wakandivhunja kudari: ‘Endai, uporofete ku vandhu vangu Vaiziraeri.’
16 Wari izwai soko ra Jehovha: ‘Iwewe uri kunangaro kuti: “Ucaporofeta zvakashata zvo Vaiziraeri, ucazivisa masoko akashata ngo pamusoro po mubarihwana hwa Izaki.”
17 Jehovha anoti: “Mukaji wako anozoita hure mu dhorobha. Vana vako vorume no vokaji vanozourawa ngo banga. Pecishandiswa bote ro kupima, nyika yako inozopauhwa. Iwewe unozofira mu nyika icizivi kucena. Iziraeri inozovhiswa mu nyika yayo.”’”
Masoko o Pasi
^ Zvinoreva: “mbeu ja janeiro na fevereiro.”
^ Gama ngo Gama: “anozomukisa.”
^ Gama ngo Gama: “anozomukisa.”
^ Kana: “ndaikava mafigu.”
