Apokaripsi 12:1-17
12 Kwakavoneka citatijo cikuru kudenga: Mwanakaji umweni waisimira zuva, mweji wainga uri pasi po soka jake, mu musoro make mainga no junguja ro gumi ro ndhondho no ndhondho mbiri,
2 iyena wainga no mimba. Iyena waihwajihwa no kusurungumwa* ngo kuda kubara.
3 Kwakavoneka citatijo cimweni kumatenga. Zinyoka rimweni raipsuka inga muriro, rainga no musoro munomwe no gumi ro munyanga. Mu musoro maro mainga no majunguja manomwe;
4 mushe waro wakakukuta ndhondho shoma* kudenga, rojikhandira pasi pano. Zinyoka iri raindoima pambeji po mwanakaji waidaya kubara, kuti paanozobara rivhavhure mwanake.
5 Mwanakaji wiya wakabara mwana worume. Iyena anozohavisa majinja ese ngo ndonga yo simbi. Mwana wake wakatohwa woendeswa kuna Mwari no kucigaro cake co Umambo.
6 Mwanakaji wiya wakatiza kuenda mu zvipare, kwaakanasirihwa ndau ndi Mwari kuti azopuwihweyo zvokuha pa njiku jinokwana kuita ciuru na mazana maviri na makumatandhatu.*
7 Kudenga kwakaitika hondo: Migeri no ngirozi jake jakaita hondo no zinyoka, zinyoka no ngirozi jaro jakaitavo hondo.
8 Zinyoka riya no ngirozi jaro arizivi kuwina, arizivi kuwana ndau iri yese kudenga.
9 Ngo kudaro, zinyoka rokutanga riya, rinodanijwaya kuti Dhiyabhu kana Sathana, rakakhandihwa pasi, irona riri kucengeja vandhu vese vanogara pasi pano. Irona rakakhandihwa pasi pano no ngirozi jaro jakakhandihwavo pasi pano pondhopo nairona.
10 Ndakazwa izwi guru recivha kudenga reciti: “Hwazoguma ruponeso, simba no Umambo hwa Mwari wedu no simba ra Kristu wake, ngokuti mupumbhi wo hama jedu wakhandihwa pasi, wiya anojipumbha pamberi pa Mwari wedu, usiku no masikati!
11 Ivona vakamunyisa ngo ngazi yo Vhuta no ucapupu hwavo, ivona avazivi kuda upenyu hwavo pikija pavaida kufa.
12 Ngo ndava yazvo, dakaranyi imwimwi matenga na imwimwi munogara mukati mawo! Nyathwa pasi pano no jombe, ngokuti Dhiyabhu waviya komuri waro, ano ushungu hukuru, eciziva kuti wasara no nguva shoma.”
13 Zinyoka riya parakavona kuti rakhandihwa pasi, rakatevera mwanakaji wakabaraya mwana worume.
14 Mwanakaji wiya wakapuwa mapapiro maviri o hokotora kuti amburuke kuenda mu zvipare kuno ndau yake, kwaanopuwihwa zvokuha mukuvo umwe, mukuvo muviri no bindikati ro mukuvo, kuri ndhambo no nyoka.
15 Nyoka iya yakaruca kumwa yakawanda inga yo murambo ngo sure ko mwanakaji, kuti andondomere mukumwa.
16 Asi pasi pakaviya kobesera mwanakaji, ipona pakashama pomija kumwa yakaruciwaya ngo zinyoka.
17 Ngo kudaro, zinyoka riya rakanyangajwira mwanakaji, roenda koita hondo no vakasara vo mubarihwana wo mwanakaji, vanozwira mupango ya Mwari no kuita ucapupu ngo pamusoro pa Jesu.
