Apokaripsi 15:1-8
15 Ndakavona citatijo cimweni kudenga, citatijo condhoco cainga cakakura cecishamaisa. Ngirozi nomwe jainga jino matambukijo manomwe. Matambujiko aya ngo okupejisira, ngokuti ndiwona anozoita kuti ushungu hwa Mwari upere.
2 Ndakavonazve ciro caaita inga jombe ro vhidhru raivhenganijwa no muriro, vaya vakanyisa cikara no cithombi caco no civerengero co zina raco, vainga vakaima phedo no jombe ro vhidhru, vakabatisisa zvimadangari zva Mwari.
3 Ivona vaiimba ndumbo ya Mosi muranda wa Mwari no ndumbo yo Vhuta, veciti:
“Jehovha* Mwari wo Masimba Ese, mabasa enyu makuru, anoshamaisa. Makwanja enyu ngo okadi, akarurama. Ndimwi Mambo acingaperi.
4 Jehovha,* ndiyani acingamuthyi imwimwi? Ndiyani acikazokuji zina renyu? Ngokuti ndimwi basi makagondeka. Majinja ese anozoviya, ozomunamata, ngokuti ndhungamiriro jenyu jakarurama, jakaziviswa.”
5 Pasure pa izvi, ndakavona ndau yakacenesesa yo ucapupu yo kudenga, yecifununguhwa,
6 ngirozi nomwe no matambujiko manomwe, zvakabuda mu ndau yakacenesesa. Ngirozi jondhojo, jaisimira nguvo jinobwaka no jinomonikira. Ijona jaisunga mabhande o goridhi pa diti pajo.
7 Cisikwa cimwe cinopona pa zvisikwa zvirongomuna, cakapa zvibasiya zvinomwe zvo goridhi ku ngirozi nomwe. Zvibasiyezvo, zvainga zvakazara ngo ushungu hwa Mwari anopona mbhera narini, kwenda no kwenda.
8 Ndau yakacenesesa, yakazara ngo usi ngo ndava yo rukujo hwa Mwari no simba rake, apana waikwanisa kunghwina mu ndau yakacenesesa mbhera matambujiko manomwe ainga no ngirozi nomwe apere.
