Apokaripsi 17:1-18
17 Imwe yo ngirozi nomwe jaingaya no zvibasiya zvinomwe yakaza, yondivhunja kuti: “Izai ndinozokutatija kutongwa ko hure huru yakagaraya panyezuru po kumwa zinji,
2 yoita uhure* no majimambo o pasi pano. Vagari vo pasi pano vakadhakwa ngo vhinyu yo uhure* hwayo.”
3 Iyona yakanditora ngo simba ro mujimu, yoenda na inini mu zvipare. Inini ndakavona mwanakaji wakapakira pa cikara cakapsuka. Icona cainga cakazara ngo mazina o kutuka, cino musoro munomwe no gumi ro munyanga.
4 Mwanakaji uwu waisimira nguvo jinomonikira no kupsuka. Iyena waijinemesa ngo goridhi, mapuwe o mutengo mukuru no amweni anodaninjwa kuti, maperora. Munyara jake mainga no kopo yo goridhi yaizara ngo zviro zvinonyangaja no zviro zvakasvipa zvo uhure* hwake.
5 Pahuma pake paitahwa zina ricikaziviki rokuti: “Bhabhironi Guru, mai wo hure jese no zviro zvinonyangaja zvo pasi pano.”
6 Inini ndakavona kuti mwanakaji uwu waidhakwa ngo ngazi yo vakasanwa no ngazi yo zvapupu zva Jesu.
Ndakakahamara maningi pandakamuvona.
7 Ngo kudaro, ngirozi iya yakandivhunja kuti: “Uri kukahamara ngenyi? Ndinozokuvhunja cicikaziviki waro ngo pamusoro po mwanakaji uwu no po cikara caakapakiraro cinomusoro munomwe no gumi ro munyanga.
8 Cikara cawavonaya, caingepo. Asi acicipo. Icona cinozobuda kuvha murindi rakajikisisa. Asi ciri kuda kwenda koparajwa. Vaya vacizivi kutahwa mu muphukutu wo upenyu kuvhira pa kusikwa ko nyika, vanozokahamara pavanozovona kuti cikara caingepo weya, acicipo. Asi cinozovepo.
9 Izvi zvinoda uzivi: Musoro munomwe jinoimirira matundhu manomwe. Panyezuru po matundhu aya ndipona pakagara mwanakaji wiya.
10 Kuno majimambo manomwe. Majimambo mashanu, apera kuwa. Mambo umwe aripo. Mambo umweni aato aguma. Asi paanozoguma aagari mukuvo muzinji.
11 Cikara caingepo weya asi acicipo, ndiconazve mambo wocisere. Icona cinobuda pa majimambo manomwe. Asi cinoenda koparajwa.
12 Gumi ro nyanga jawavonaro jinoimirira gumi ro majimambo acito agajwa umambo. Asi iwona anogajwa umambo mukati mo nguva imwe, pamwepo no cikara.
13 Izvona zvino murangariro umwe kuti zvipekeje cikara simba razvo no umambo hwazvo.
14 Izvona zvinozohwisana no Vhuta. Zvecivoneka kuti Vhuta ndirona Mambo wo majimambo no Mutongi wo vatongi, irona rinozozvinyisa. Cimwenizve ngo cokuti, vaya vari pamwepo no Vhuta, vakadanijwa, vosanwa, vova vakagondeka. Ivona vanozonyisavo.”
15 Iyona yakandivhunja kuti: “Kumwa yawavonaya yakagarihwa ngo hure, inoimirira vandhu no mbungano no majinja, pomwe no ndimi.
16 Gumi ro nyanga jawavonaya no cikara, zvinozonyenya hure iya. Izvona zvinozoiuraya zvoisiya iri mitu. Zvinozoha nyama yayo, zvoipisa ngo muriro.
17 Ngokuti, Mwari wakadira mu mwoyo mazvo kuti zviite zvaari kurangarira. Izvona zvinozova no murangariro umwe wo kupekeja cikara simba ro umambo hwazvo mbhera akwanirisike masoko a Mwari.
18 Mwanakaji wawavonaya, anoimirira dhorobha guru rino umambo panyezuru po majimambo o pasi pano.”
Masoko o Pasi
^ Vonanyi Kudurujihwa ko Magama.
^ Mu Cigiriki, por·nei′a. Vonanyi Kudurujihwa ko Magama.
^ Mu Cigiriki, por·nei′a. Vonanyi Kudurujihwa ko Magama.
