Apokaripsi 20:1-15
20 Ndakavona ngirozi imweni yecivha kudenga ino shavhi yo rindi rakajikisisa. Munyara mayo mainga muno magaragajero.
2 Iyona yakabata zinyoka riya, nyoka yo kutanga inodanijwa kuti Dhiyabhu na Sathana, yorisunga ko ciuru* co makore.
3 Yakarikhandira murindi rakajikisisa, yofunga rindi riyani, perapo yoridira cinamiro, kuti ritame kucengeja majinja mbhera ciuru* co makore cipere. Pasure pazvo, rinozosununguhwa pa mukuvo mudoko.
4 Ndakavona zvigaro zvo umambo. Vaizvigariraro, vakapuwa simba ro kutonga. Ndakavonazve vandhu vakaurahwa ngo ndava yo ucapupu hwavakaita ngo pamusoro pa Jesu no kubhuya ngo pamusoro pa Mwari. Ndovonazve vaya vacizivi kunamata cikara no cithombi caco. Ivona vainga vacizivi kudihwa cidhindho pa huma no munyara. Ivona vakamuswa votonga na Kristu ko ciuru* co makore.
5 (Vamweni vainga vakafa avazoashiri upenyu mbhera ciuru* co makore cipere.) Uku ndikona kumuka ko kutanga.
6 Mundhu wese anomuka pa rumuko hwo kutanga, ano mudakaro. Iyena wakasanwa. Rufu hwo cipiri ahuna simba kwaari. Asi iyena anozoita mupiri wa Mwari no wa Kristu. Anozotonga na iyena mukati mo ciuru* co makore.
7 Ciuru* co makore cikapera, Sathana anozosujunuhwa mu kadheya.
8 Iyena anozobuda kuti acengeje majinja o mativi marongomuna o pasi pano, Gogi na Magogi, kuti avaunganijire ku hondo. Ivona vaiwanda inga musanga wo mujombe.
9 Ivona vakandhandhanika pasi pese, votendeneja musasa* yo vakasanwa no dhorobha rinodiwa. Asi muriro wakavha kudenga wovapisa.
10 Dhiyabhu waivacengejaya, wakakhandihwa mu gandhwa ro muriro no enshofre. Umu ndimona maingaya no cikara no muporofeti wo kunyepa. Ivona vanozotambujwa usiku no masikati mbhera narini, kwenda no kwenda.
11 Ndakavonazve cigaro cikuru co umambo cakacena caigarihwa ngo Mundhu. Kudenga no pasi zvakatiza pamberi pake. Izvona azvizivi kuwana ndau.
12 Ndakavona vakafa, vakuru no vadoko, vakaima pamberi po cigaro co umambo. Muphukutu jakafununguhwa. Muphukutu umweni wakafununguhwa, wainga muphukutu wo upenyu. Vakafa vakatongwa pecishandiswa zvainga zvakatahwa mu muphukutumo, mu kuzwirana no zviito zvavo.
13 Jombe rakabudisa vo kufa varo, rufu no Guva* zvakabudisa vokufa vazvo. Umwe na umwe wavo wakatongwa mukuzwirana no zviito zvake.
14 Rufu no Guva* zvakakhandihwa mu gandhwa ro muriro. Gandhwa ro muriro, rinoimirira rufu hwocipiri.
15 Cimwenizve, mundhu wese wainga acizivi kutahwa zina rake mu bhuku ro upenyu wakakhandihwa mu gandhwa ro muriro.
Masoko o Pasi
^ 1.000.
^ 1.000.
^ 1.000.
^ 1.000.
^ 1.000.
^ 1.000.
^ Kana: “mucaca.”
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
