Apokaripsi 21:1-27
21 Ndakavona denga ibza no pasi papsa; denga rokare no pasi pokare zvainga zvapera, jombe akucina.
2 Ndakavonazve dhorobha rakacena, Jerusarema Ibza, recideruka* kuvha kudenga kuna Mwari, rakanasirihwa inga murovohwi wakanasirihwa kuti aashire mwamunake.
3 Ndakazwavo izwi guru raivha pa cigaro co umambo reciti: “Vonai! Tende ya Mwari ino vandhu. Iyena anozogara na ivona, ivona vanozoita vandhu vake. Iyena Mwari pacake anozova navo.
4 Iyena anozopukuta musoji jese mumeso mavo, akucazovizve no kufa, kusuruvara, kucema* no kuhwajihwa. Zviro zvokare zvapera.
5 Wiya waigara pacigaro co umambo, wakati: “Vonai! Ndiri kuita kuti zviro zvese zviite zvipsa.” Wondivhunjazve kuti: “Tarai. Ngokuti masoko aya anogondeka no ocokwadi.”
6 Iyena wakandivhunjazve kuti: “Zvaitika! Inini ndiri Arfa na Omega,* okutanga no wokupejisira. Wiya anonyota ndinozomupa kumwa inovha mu ndau yo kumwa yo upenyu.
7 Mundhu wese anowina, anozogara utaka wo zviro izvi. Inini ndinozoita Mwari wake, iyena anozoita mwana wangu.
8 Asi vaya vanothya, vacina rutendo, vanosvina inosembhusa, vanouraya, vanoita uhure,* vanoita zvo mujimu, vanonamata zvithombi no vese vanonyepa vanozokhandihwa mu gandhwa rinobwaka muriro no enshofre. Izvi, zvinoimirira rufu hwocipiri.
9 Imwe yo ngirozi nomwe jainga no zvibasiya zvinomwe zvakazara ngo matambujiko okupejisira, yakaviya kondiri yondivhunja kuti: “Izai. Ndinozokukhombija murovohwi, mukaji wo Vhuta.”
10 Iyona yakanditora ngo simba ro mujimu, yondiendesa kuzidundhu ziguru rakareba, yonditandija Jerusarema, dhorobha rakacena, recideruka* kuvha kudenga kuna Mwari.
11 Irona rainga no rukujo hwa Mwari. Kumonikira kwaro kwaiezana no buwe ro mutengo mukuru, inga buwe ro jaspe no ro kristari.
12 Dhorobha iri rainga no mupfimbiji mukuru wakareba no gumi ro musuvo no musuvo muviri, mu musuvomo mainga no gumi ro ngirozi no ngirozi mbiri, panyezuru po musuvojo, paitahwa gumi ro mazina no mazina maviri o vhumbo ro vana vo Iziraeri.
13 Kumavhazuva kwainga no musuvo mutatu, ka njikazi kwainga no musuvo mutatu, kakusi kwainga no musuvo mutatu, kumavirira kwainga no musuvo mutatu.
14 Mupfimbiji wo dhorobha wainga no gumi ro mapuwe no mapuwe maviri o njiki, panyezuru po mapuwepo, paitahwa gumi ro mazina no mazina maviri o vapostori vo Vhuta.
15 Wiya waibhuya na inini, waibata mupimo wo njanga yo goridhi, kuti apime dhorobha no musuvo jaro, pomwe no mupfimbiji jaro.
16 Dhorobha rainga rino mativi marongomuna akaezana, urebu hwaro hwaiezana no upambhi. Iyena wakapima dhorobha ngo njanga, roita makiromita anokwedera kuita zviuru zviviri no mazana maviri no makumaviri,* urebu hwaro, upambhi hwaro no thuru* raro zvaiezana.
17 Iyena wakapimazve mupfimbiji, iwona wakaita zana na makumarongomuna na rongomuna o makovhadho,* mukuzwirana no mupimo wo mundhu, unozwiranavo no mupimo wo ngirozi.
18 Mupfimbiji wainga wakaitwa ngo jaspe, dhorobha rainga ro goridhi rakaperera inga vhidhru yo kristarino.
19 Njiki jo mupfimbiji jo dhorobha jainga jakaithwa ngo mufumbo wese wo mapuwe o mutengo mukuru: Njiki yo kutanga yaaithwa ngo jaspe, yocipiri ngo safira, yocitatu ngo karisedhoniya, yocirongomuna ngo esmerardha,
20 yocishanu ngo sardhonika, yocitandhatu ngo sardhiyo, yocinomwe ngo krizorito, yocisere ngo bheriro, yocipfumbamwe ngo topaziyo, yocigumi ngo krisopaso, yocigumi na imwe ngo jhasinto, yocigumi na mbiri ngo ametista.
21 Cimwenizve, gumi ro musuvo no musuvo muviri, jainga jakaitwa ngo gumi ro maperora* no maperora* maviri; musuvo umwe na umwe waiithwa ngo perora* imwe. Gwanja guru ro dhorobha rainga rakaithwa ngo goridhi rakaperera inga kuvonekera ko vhidhru.
22 Andizivi kuvona themberi mukati maro, ngokuti Jehovha* Mwari wo Masimba Ese, ndiyena themberi yakona pamwepo no Vhuta.
23 Mu dhorobhemo, mainga mucingadi zuva no mweji kuti zvivheneke, ngokuti rukujo hwa Mwari hwaivheneka. Vhuta ndirona ruvheneko hwakona.
24 Majinja ese anozofamba mu ruvheneko hwaro, majimambo o pasi pano anozoripekeja rukujo hwawo.
25 Musuvo jaro, ajizofungwi, ngokuti mukuvo wese kunonga kwakaeja, akuzovi no usiku.
26 Nduma no rukujo hwo majinja hunozoendeswa mukati maro.
27 Asi zviro zvese zvicizivi kucena no vandhu vese vanoita zviro zvinosembhusa no zvinonyoeja, avazonghwini mukati maro. Munozonghwinwa nga vaya vakatahwa mu muphukutu wo upenyu wo Vhuta.
Masoko o Pasi
^ Kana: “ricibzuka.”
^ Kana: “kurira.”
^ Kana: “ndini A na Z.” Gama rokuti: Arfa, rinoimirira retra yokutanga. Omega rinoimirira retra yo kupejisira yo maarfabheto o Cigiriki.
^ Vonanyi Kudurujihwa ko Magama.
^ Kana: “ricibzuka.”
^ 2.220. Gama ngo Gama: “roita 12.000 zvo mashitadhiyo.”
^ Urebu hwo kuvha pasi kwenda mudenga.
^ Mametro anokhwedera kuita 64.
^ Mapuwe o mutengo mukuru.
^ Mapuwe o mutengo mukuru.
^ Buwe ro mutengo mukuru.
^ Vonanyi Kudurujihwa ko Magama.
