Apokaripsi 7:1-17
7 Pasure pa izvi, ndakavona ngirozi murongomuna jakaima ku mativi marongomuna o pasi pano. Ijona jainga jakabatisisa mbhepo murongomuna, kuti mbhepo itame kuvhunguza pa nyika no mujombe kana no muti uri wese.
2 Ndakavonazve ngirozi yecivha kumavhazuva, ino cinamiro ca Mwari anopona, yovhunja ngirozi murongomuna jainga jakapuwa simba kuti jikhuvaze nyika no jombe,
3 yeciti: “Mucakhuvaza nyika no jombe nee muti uri wese, mbhera tipeje kudira cinamiro pa huma jo varanda va Mwari wedu.”
4 Perapo ndakazwa mutengo wo vandhu vakadihwa cinamiro, waiita zana na makumarongomuna o zviuru no zviuru zvirongomuna,* vanovha ku mavhumbo ese o Vaiziraeri:
5 Vakadihwa zvinamiro ku vhumbo ra Judha, vanokwana kuita gumi ro zviuru no zviuru zviviri;*
ku vhumbo ra Rubheni, gumi ro zviuru no zviuru zviviri;*ku vhumbo ra Gadhi, gumi ro zviuru no zviuru zviviri;*
6 ku vhumbo ra Azeri, gumi ro zviuru no zviuru zviviri;*ku vhumbo ra Naftari, gumi ro zviuru no zviuru zviviri;*ku vhumbo ra Manase, gumi ro zviuru no zviuru zviviri;*
7 ku vhumbo ra Simiyoni, gumi ro zviuru no zviuru zviviri;*ku vhumbo ra Revhi, gumi ro zviuru no zviuru zviviri;*ku vhumbo ra Isakari, gumi ro zviuru no zviuru zviviri;*
8 ku vhumbo ra Zebhuroni, gumi ro zviuru no zviuru zviviri;*ku vhumbo ra Josefa, gumi ro zviuru no zviuru zviviri;*ku vhumbo ra Bhenjamini, gumi ro zviuru no zviuru zviviri,* zvo vandhu vakadihwa cinamiro.
9 Pasure pa izvi, ndakavona vandhu vakawanda maningi vacikaverengeki, vaivha ku majinja ese, ku mavhumbo ese, ku vandhu vese no ku ndimi jese, vakaima pamberi po cigaro co umambo no pamberi po Vhuta, vakasimira nguvo jakacena jakareba. Mu nyara mavo mainga muno matavi o mucindu.
10 Ivona vaikhuwa,* veciti: “Ruponeso hwedu hunovha kuna Mwari wedu, wakagara pa cigaro co umambo no kuno Vhuta.”
11 Ngirozi jese jaiima, jakatendeneja pamberi po cigaro co umambo no vakuru, pamwepo no zvisikwa zvirongomuna zvinopona, izvona zvaisikimara pamberi po cigaro co umambo zvecinamata Mwari,
12 zveciti: “Ameni! Kusimbhwa, kukujwa, uzivi, kubongwa, kureremejwa no simba ngazvive zva Mwari wedu mbhera narini, kwenda no kwenda. Ameni.”
13 Umwe wo vakuru, wakandivhunjisa kudari: “Vandhu ava vakasimirari nguvo jakacena joreba, mbhaani, vanovha kwapi?”
14 Asi inini ndakamudavira ngo kukasika kuti: “Mambo wangu, ndimwi munozviziva.” Iyena wakandidavira kudari: “Vandhu ava, vanovha pa dambujiko guru, ivona vakapaja nguvo javo jakareba, vojicenesa ngo ngazi yo Vhuta.
15 Ndizvona zvinovaitisa kuti vagare pamberi po cigaro co umambo hwa Mwari, veciita mabasa akacena usiku no masikati mu themberi yake, Wiya wakagara pa cigaro co umambo anozovatambanujira tende yake.
16 Ivona avazozwi njara, avazozwi nyota, avazopiswi ngo zuva kana ngo ciri cese haco,
17 ngokuti Vhuta riri pakati po cigaro co umambo, rinozovahavisa no kuvatungamirira kuenda ku kumwa yo upenyu. Mwari anozopukuta musoji jese mu meso mavo.”
Masoko o Pasi
^ 144.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ 12.000.
^ Kana: “vaimima.”
