Dhanyeri 2:1-49
-
Mambo Nebhukadhinezari anorota hope jinothyisa (1-4)
-
Apana muzivi anokwanisa kunanga revo yo hope (5-13)
-
Dhanyeri anopsanga kubeswa ndi Mwari (14-18)
-
Mwari anokujwa ngo kuzivisa zvakafisika (19-23)
-
Dhanyeri anovhunja mambo revo yo hope (24-35)
-
Kudurujihwa ko hope (36-45)
-
Buwe ro Umambo rinozokwiya-kwiya cithombe (44, 45)
-
-
Dhanyeri anoreremejwa ndi mambo (46-49)
2 Mu gore rocipiri ro kutonga kwake, Nebhukadhinezari wakarota hope jakawanda maningi. Iyena wakaneseka maningi zvokuti aacaikwanisepi kuvata.
2 Ngo kudaro, mambo wakadaninjisa vapiri vo masaramuso, vafemberi, varoi no Vakaradhiya* kuti vaviye kuzovhunja mambo zvaainga arota. Ivona vakaviya voima pamberi pake.
3 Mambo wakavavhunja kudari: “Inini ndakarota. Wari ndiri kuneseka ngokuti ndiri kuda kuziva zvandarota.”
4 Vakaradhiya vakadavira mambo ngo ndumi yo Ciaramaiki* kudari: “Mambo ponanyi no kucingaperi. Vhunjanyi varanda venyu hope jamarota, itusu tinozomuvhunja revo yajo.”
5 Mambo wakadavira Vakaradhiya kudari: “Aya ndiwona masoko angu o kupejisira: Kudari imwimwi mukatama kundivhunja hope jandarotari no revo yajo, munozotemwa-temwa. Nyumba jenyu jinozoita inga ratirina jo vandhu vese.*
6 Asi mukandivhunja hope jandarotari no revo yajo, inini ndinozomupa zvipo, mupfupo no kumuita kuti mukujwe maningi. Ngo kudaro, ndivhunjenyi hope jandarotari no revo yajo.”
7 Ivona vakamudavirazve hwocipiri kudari: “Mambo vhunjanyi varanda venyu hope jamarota, itusu tinozomuvhunja revo yajo.”
8 Mambo wakavadavira kudari: “Inini ndinozviziva kamare kuti imwimwi muri kueja kupeja nguva, ngokuti mazvizwa zvandamuvhunja kuti aya masoko angu o kupejisira ngo pamusoro po shwiro iyi.
9 Kudari mukatama kundivhunja hope jandarotari, imwimwi mwese munozotongwa mu njira yakaezana. Asi imwimwi mapangana kundinyepera no kundicengeja, meciimira kuti zviro zvicinje. Ngo kudaro, ndivhunjenyi hope jandarotari, ndinozoziva kuti imwimwi munokwanisa kudurujira.”
10 Vakaradhiya vakadavira mambo kudari: “Apana mundhu pasi pano anokwanisa kuita zvamuri kukumbiraro mambo. Akuna mambo ano simba kana mutongi wakambokumbira zvamuri kukumbirari vapiri vo masaramuso, vafemberi no Vakaradhiya.
11 Mambo zvamuri kukumbirari zvinonesa. Apana mundhu anokwanisa kumuvhunja zviro izvi, kuciripi zvimwari zvicikagari pakati po vandhu.”
12 Mambo naazwa izvi, wakanyangajwa maningi wotumira koouraya vazivi vese vo Bhabhironi.
13 Pakaziviswa mutemo kuti vazivi vese vainga vecida kuurawa. Dhanyeri no vadoni vake vakapsakwavo kuti vauraiwe.
14 Pa nguva yondhoyo, Dhanyeri ngo maitiro akanaka no kungwarira kwese wakabhuya na Ariyoki mutungamiriri mukuru wo varindiri va mambo, wainga akaenda kouraya vazivi vese vo Bhabhironi.
15 Iyena wakavhunjisa Ariyoki mutungamiriri mukuru wa mambo kudari: “Ngenyi mambo vadira mutemo unonesa kudari?” Ariyoki wakavhunja Dhanyeri ndava yakona.
16 Ngo kudaro, Dhanyeri wakaenda kuna mambo womukumbira kuti amupe mukuvo kuti akwanise kumuvhunja revo yo hope jaakarota.
17 Kusarepo, Dhanyeri wakaenda kanyi woverengera vadoni vake Hananiya, Mishaeri na Azariya zvainga zvaitika.
18 Iyena wakavakumbira kuti vaite mukumbiro kuna Mwari wo kudenga kuti avaitire usizi ngo pamusoro po cakafisika ici, kuti Dhanyeri no vadoni vake vatame kuurawa pamwepo no vazivi vamweni vo Bhabhironi.
19 Ngo kudaro, cakafisika cakaziviswa Dhanyeri mu civoniso co usiku. Ngo iyo ndava, Dhanyeri wakasimba Mwari wo kudenga.
20 Dhanyeri wakati:
“Zina ra Mwari ngarisimbwe kwenda no kwenda,Ngokuti ndiyena basi ano uzivi no simba.
21 Iyena anocinja nguva no mukuvo,Anovhisa majimambo no kugaja majimambo,Anopa uzivi ku vazivi, opa zivo ku vano ungwaru.
22 Iyena anozivisa zviro zvakajika no zviro zvakavigika,Iyena anoziva zviri mucidima,Kwaari kuno ruvheneko.
23 Ndinomubonga no kumusimba Mwari wo majibaba angu,Ngokuti makandipa uzivi no simba.
Wari, imwimwi mandizivisa zviro zvatakamukumbira,Matizivisa shwiro iri kunesa mambo.”
24 Ngo kudaro, Dhanyeri wakaenda kuna Ariyoki wiya wainga akagajwa ndi mambo kuti auraye vazivi vese vo Bhabhironi. Iyena wakamuvhunja kudari: “Ucauraya muzivi umwe hake wo Bhabhironi. Nditorei undiendese pamberi pa mambo, inini ndinozomuvhunja revo yo hope jaakarota.”
25 Ariyoki wakatora Dhanyeri woenda naye kuna mambo ngo kukasika, wonanga kudari: “Ndawana mwanarume pakati po Vajudha vakatohwa, anokwanisa kumuvhunja revo yo hope jamakarota.”
26 Dhanyeri wakapuwaya zina rokuti Bheriteshazari wakavhunjiswa kudari ndi mambo: “Iwewe uno cokwadi cokuti unoda kundivhunja hope jandakarota no revo yajo here?”
27 Dhanyeri wakadavira kudari kuna mambo: “Akuna muzivi, mufemberi, mupiri wo masaramuso, muzivi wo ndhondho anokwanisa kuvhunja mambo cakafisika camunoda kuziva.
28 Asi kumatenga kuna Mwari anozivisa zvakafisika, iyena wazivisa mambo Nebhukadhinezari zviro zvinozoitika pa njiku jo kupejisira. Hope jenyu no zvivoniso zvamakavona pamainga makavata pakama nga izvi:
29 “Imwimwi mambo pamainga makavata pa kama yenyu, makarota zviro zvinozoitika kumbeji. Wiya anozivisa zvakafisika, wakaita kuti muzive zviro zvinozoitika.
30 Asi kuziviswa kwandakaithwa zviro izvi, akurevi kuti ndino uzivi maningi kupinda vandhu vese. Asi ndakazviziviswa kuti imwimwi mambo muzive hope jamakarota no zvajinoreva, kuti imwimwi mambo muzive zviri mu mwoyo mwenyu.
31 “Imwimwi mambo pamainga mecisotesesa, makavona cithombe cakakura maningi. Cithombe ici caiimari pamberi penyu caimonikira maningi, kumeso kwaco kwaithyisa.
32 Musoro wo cithombe ici wainga wo goridhi rakaperera, paditi paco no mukono waco zvainga zvo sirivha, pa ndani paco no pamutezo* paco, zvainga zvo utare,
33 makumbo aco ainga o simbi, soka jakona jaiumbwa ngo simbi no dongo.
34 Pamainga makasota, pa dundhu pakasvukuhwa buwe. Buwe rondhoro arizivi kusvukuhwa ngo nyara. Irona rakawira pasoka jo cithombe jaingaya jakaumbwa ngo simbi no dongo, rojicangaja.
35 Pa nguva yondhoyo, simbi, dongo, utare, sirivha no goridhi zvakakwiiwa-kwiiwa pamwepo, zvoita inga maphwe-phwe ari kuurujwa pa cimbuwa* pa mukuvo wo cirimo. Mbhepo yakazvitora yozviendesa ndhambo zvokuti azvizivi kuzombovonekazve. Asi buwe rakafuraya cithombe, rakava dundhu guru rozaja nyika yese.
36 “Iji ndijona hope jamakarota. Asi wari mambo ndinoda kumuvhunja revo yajo.
37 Imwimwi mambo, mambo wo majimambo, makapuwa umambo, simba no kukujwa ndi Mwari wokudenga.
38 Makapuwa munyara menyu vandhu vo ndau jese. Makapuwazve zvinyama zvo musora no shiri jinomburuka kumatenga, womuita mutongi wo zvese. Imwimwi ndimwi musoro wo goridhi.
39 “Sure kwenyu kunozoza umambo humweni, hudoko kupinda hwenyu. Perapo, hunozoza umambo hwocitatu wo utare unozonyisa nyika yese.
40 “Asi umambo wo cirongomuna unozova wakavanga inga simbi. Kudari inga simbi inokwiya-kwiya no kuphwanya zviro zvese, umambo uu unozokwiya-kwiya no kuphwanya umambo hwese uhu.
41 “Kudari inga zvamakavona, soka no zvikunwe zvainga zvakaumbwa ngo dongo ro muumbi no simbi, umambo uu auzobatani. Asi unozova wakavanga padoko inga simbi. Inga zvamakavona, simbi yainga yakavhengana no dongo.
42 Kudari inga zvikunwe zvo soka zvainga zvakaumbwa ngo simbi no dongo, umambo uwu unozova no divi rimwe wakavanga, divi rimweni wakaremba.
43 Inga zvamakavona mambo simbi yakabatana no dongo, iwona unozobatanavo no vandhu, asi avazozwiranyi ngo cavo kudari inga simbi icikabatani no dongo.
44 “Mu njiku jo majimambo aya, Mwari wo kudenga anozogaja umambo ucikazopejwi. Umambo uwu auzopekejwi mundhu ari wese, iwona unozokwiya-kwiya no kupeja umambo wese .Iwona basi ndiwona unozogara mbhera narini.
45 Inga zvamakavona kuti buwe rakasvukuhwa pa dundhu, asi arizivi kusvukuhwa ngo nyara, rocangaja simbi, utare, dongo, sirivha no goridhi. Mwari mukuru wamuzivisa zvinozoitika kumbeji. Hope iji ngo jokadi, revo yajo inothembeka.”
46 Ngo kudaro, mambo Nebhukadhinezari wakawa pasi ngo kumeso pamberi pa Dhanyeri womureremeja. Woita kuti apuwe cipo no rubani.
47 Mambo wakavhunja Dhanyeri kudari: “Zvokadi, Mwari wenyu ndi Mwari wo zvimwari, Mambo wo majimambo, Muzivisi wo zvakafisika ngokuti iwewe wakwanisa kuzivisa revo yo cakafisika ici.”
48 Ngo kudaro, mambo wakapa Dhanyeri cigaro cinosisira maningi, womupa zvipo zvakawanda maningi. Wakamuita mambo mu porovhinsiya yese yo Bhabhironi. Womuitazve mutungamiriri wo vazivi vese vo Bhabhironi.
49 Mambo wakagaja Shadhreki, Meshaki na Abhedhinego kuti vave vavonereri vo porovhinsiya yo Bhabhironi inga zvakakumbihwa ndi Dhanyeri. Asi Dhanyeri waishanda pa nyumba ya mambo.
Masoko o Pasi
^ Kana: “cikwata co vandhu caivoniwa kuti cino uzivi wokufembera no kujija ndhondho.”
^ Dhanyeri 2:4b mbhera 7:28, yakatahwa ngo Ciaramaiki.
^ Kangaije: “ndau yokudira rishu; mututu yo estrumi.”
^ Kana: “pa mupambare.”
^ Kana: “civanje.”
