Dhanyeri 4:1-37
4 “Masoko akanangwa ndi Mambo Nebhukadhinezari ku vandhu vese, ku majinja ese no ndumi jese jinogara pa nyika yese nga aya: Runyararo ngahuwande komuri!
2 Ndino mudakaro wo kumuzivisa zvitatijo no zvishamaiso zvondakaitihwa ndi Mwari Mukuru-Kuru.
3 Zvitatijo zvake zvakakura maningi, zvishamaiso zvake zvinokhombija kuti iyena ano simba guru maningi. Umambo hwake ahuna magumo, utongi hwake hunogara pa mubarihwana wese.
4 “Inini Nebhukadhinezari, ndainga ndakagarisika pamuzi pangu, ndecibudirira panyumba yangu.
5 Ndakarota hope jakandithyisa. Pandainga ndakavata pa kama yangu, zvandakavona no zvivoniso zvakapinda mu murangariro wangu zvakandithyisa.
6 Ngo kudaro, ndakadanijisa vazivi vese vo Bhabhironi kuti vaviye kondiri, kuzondivhunja revo yo hope jandarota.
7 “Ngo kudaro, vakaviya vapiri vo masaramuso, vafemberi, Vakaradhiya* no vazivi vo ndhondho. Pandakavavhunja zvandakarota, ivona avazivi kukwanisa kundivhunja revo yazvo.
8 Pakupejisira, pakaviya Dhanyeri, mundhu wainga no mujimu yo zvimwari zvakacena, wakapuwa zina ra mwari wangu, rokuti Bheriteshazari. Inini ndakamuvhunja zvandakarota ndeciti:
9 “‘Bheriteshazari mukuru wo vapiri vanoita masaramuso, ndinonasa kuziva kuti iwewe uno mujimu yo zvimwari zvakacena, akuna ciro cakafisika cinonyanya kukunesa. Ngo kudaro, ndisanangurirei zvivoniso zvandakavona pandaivata no revo yazvo.
10 “‘Zvivoniso zvandakavona pandainga ndakavata pa kama yangu nga izvi: Ndakavona muti wakareba maningi pakati po nyika.
11 Muti wakona wakareba, wova wakavanga maningi. Kureba kwawo kwakaguma kumatenga, iwona waivoneka mbhera ku magumo o nyika.
12 Masakani awo ainga akanaka, wainga uno mucero yakawanda maningi, iwona wainga uno zvokuha kuitira vese. Zvinyama zvo musora zvaipsaka munvuriri pasi pawo, mu matavi mawo maimata shiri jo kumatenga, zvisikwa zvese zvaiwana zvokuha ndiwona.
13 “‘Pandainga ndecivona zvivoniso zvaipinda mu murangariro wangu ndiri pa kama, ndakavona murindiri, mucena, waivha kumatenga.
14 Iyena wakakhuwa ngo izwi guru eciti: “Wisanyi mumuti, temanyi matavi awo, mbhwejanyi masakani awo, ndhandhanisanyi mucero jawo, zvinyama ngazvitize pasi pawo, shiri ngajitize mu matavi awo.
15 Asi siyanyi ciki* no miji yaro pasi pano, rakasungwa ngo simbi no utare, pakati po ushwa hwo musora. Irona ngaribijwe ngo cando co kumatenga, ngarigare pamwepo no zvinyama pakati po sora pasi pano.
16 Mwoyo waro ngaucinjwe kuti utame kuva mwoyo wo mundhu, ropuwa mwoyo wo cinyama, mbhera apere makore manomwe.*
17 Izvi zvakanangwa ngo varindiri, zvokumbihwa ngo vacena. Kuti vandhu vazive kuti Mukuru-Kuru ndiyena Mutongi mu umambo hwese hwo vandhu, nokuti iyena anohupa waanoda, wogaja pikija mundhu wakaderera kupinda vandhu vese.”
18 “‘Iji ndijona hope jondakarota, inini Mambo Nebhukadhinezari. Wari, iwewe Bheriteshazari, ndivhunjei revo yajo, zvecivoneka kuti vazivi vamweni vo umambo hwangu, avakwanisi kundivhunja revo yo hope iji. Asi iwewe unokwanisa, ngokuti iwewe uno mujimu yo zvimwari zvakacena.’
19 “Pa mukuvo wondhowo, Dhanyeri wakapuwaya zina rokuti Bheriteshazari, wakataka hana pa mukuvo wakati kuti, wotanga kuthya.
“Mambo wakamuvhunja kudari: ‘Bheriteshazari, ucatendera kuti hope jondakarota no revo yajo zvikuthyise.
“Bheriteshazari wakadavira kudari: ‘Mambo wangu, hope iji ngajishandisihwe ku vandhu vanomunyenya, revo yajo ngaishandisihwe ku vavengi venyu.
20 “‘Muti womakavona uwo wakakura maningi wovanga, woreba mbhera kumatenga, ucivoneka ngo nyika yese,
21 wainga uno masakani akanaka, uno mucero yakawanda no zvokuha kuitira vese, pasi pawo paigara zvinyama zvo musora, mu matavi mawo maigara shiri jo kumatenga,
22 muti uu, ndimwi mambo, ngokuti umambo hwenyu hwakakura, mova no simba. Ukuru hwenyu hwakaguma mbhera kumatenga, utongi hwenyu hwakagumavo mbhera ku magumo o nyika.
23 “‘Imwimwi mambo makavona murindiri, mucena, waivha kumatenga ecinanga kudari: “Wisanyi mumuti muuparaje, asi siyanyi ciki* no miji yaro pasi pano, rakasungwa ngo simbi no utare, pakati po ushwa hwo musora. Irona ngaribijwe ngo cando co kumatenga, ngarigare pamwepo no zvinyama zvo musora mbhera apere makore manomwe.”*
24 Mambo, iyi ndiyona revo yo hope. Mukuru-Kuru wadira mutemo kuti zviro izvi zviitikire imwimwi mambo wangu.
25 Mambo munozovhiswa pakati po vandhu, moenda kogara no zvinyama zvo musora, munozoha maushwa inga n’gombe; munozobijwa ngo cando co kumatenga, makore manomwe* anozopera muriyo, mbhera mugume pa kuziva kuti Mukuru-Kuru ndiyena mutongi mu umambo hwo vandhu, iyena anohupa vaanoda.
26 “‘Asi zvecivoneka kuti vakananga kuti kunodikana kusara ciki* ro muti no muji yaro, umambo hwenyu munozohuhwirijihwazve pasure po kuziva kuti matenga ndiwona anotonga.
27 Ngo kudaro, imwimwi mambo, tenderanyi mbhangiro yangu. Siyanyi zvishaishi zvenyu muite zvakarurama, siyanyi ushati hwenyu mukhombijire usizi varombo. Kangaije mukaita kudaro, munozoenderera mberi mecibudirira.’”
28 Zvese izvi zvakaitika kuna Mambo Nebhukadhinezari.
29 Nopapera gumi ro mweji no mweji muviri, mambo wainga ecifamba padenga po nyumba ya mambo wo Bhabhironi.
30 Iyena waiti: “Iri asipi Bhabhironi Guru randakavaka inini ngo simba rangu no ukuru hwangu kuti rive nyumba yo umambo, kuti ndikhombije ukuru hwangu no simba rangu here?”
31 Mambo paainga acavereketa, kwakazika izwi rakavha kumatenga reciti: “Masoko aya kuitira iwewe Mambo Nebhukadhinezari: ‘Watorehwa umambo,
32 iwewe unozovhiswa pakati po vandhu. Unozogara no zvinyama zvo musora, weciha maushwa inga n’gombe, makore manomwe* anozopera uriyo, mbhera ugume pa kuziva kuti Mukuru-Kuru ndiyena Mutongi mu umambo hwo vandhu, iyena anohupa vaanoda.’”
33 Pa mukuvo wondhowo, masoko aya akakwanirisika na Nebhukadhinezari. Iyena wakavhiswa pakati po vandhu, wotanga kuha maushwa inga n’gombe. Muviri wake wakabijwa ngo cando co kumatenga, atee vhuji rake rakareba inga mambau o hokotora, ndhwara jake jakaita inga ndhwara jo shiri.
34 “Mukuvo wiya powakapera, inini Nebhukadhinezari, ndakasota kudenga, murangariro wangu wakatanga kushanda ushoni. Inini ndakasimba Mukuru-Kuru, ndakasimba no kukuja Wiya anopona mbhera narini. Ngokuti utongi hwake, utongi hucina magumo, umambo hwake ngo hwomubarihwana yese.
35 Ngokuti vagari vese vo pasi pano, avana simba pamberi pake. Iyena anoita mukuzwirana no kuda kwake ngo pamusoro po masoca o kumatenga no vagari vo pasi pano. Apana mundhu anokwanisa kusunga nyara jake kana kumuvhunja kudari: ‘Maitenyi?’
36 Pa mukuvo wondhowo, murangariro wangu wakatanga kushanda ushoni, ndovazve no umambo hwangu huno nduma no simba rangu pamwepo no kukujwa kwangu. Vatungamiriri vakuru pamwepo no vazivi vangu, vakatanga kuviya kondiri vecipsaka mazano. Inini ndakapuwazve umambo hwangu no simba rinopinda randainga naro.
37 “Wari, inini Nebhukadhinezari, ndino simba, ndinoreremeja, ndinokuja Mambo wo kumatenga, ngokuti mabasa ake ese ngohokadi, makwanja ake akarurama, ngokuti iyena anokwanisa kudodokesa vaya vanofamba vecizvikuja.”
Masoko o Pasi
^ Cikwata co vandhu caizvivona kuti cainga nduna co zvokufembera no kuziva ndhondho.
^ Kana: “shikhigi.”
^ Gama ngo Gama: “mukuvo munomwe.”
^ Kana: “shikhigi.”
^ Gama ngo Gama: “mukuvo munomwe.”
^ Gama ngo Gama: “mukuvo munomwe.”
^ Kana: “shikhigi.”
^ Gama ngo Gama: “mukuvo munomwe.”
