Dhanyeri 5:1-31
5 Mambo Bherishazari wakaitira mabuso vazivi vake vanokwana kuita 1.000, womwa vhinyu pamberi pavo.
2 Bherishazari paainga arejera ngo vhinyu, wakatumira kuti kuviiswe kopo jo goridhi no josirivha, jainga ja baba wake Nebhukadhinezari javakatora mu themberi mu Jerusarema, kuti mambo, vazivi vake, shindi jake no vakaji vamweni vake vamwire mondhomo.
3 Vakaviisa kopo jo goridhi jainga jakatohwa mu themberi yo nyumba ya Mwari mu Jerusarema. Mambo, vazivi vake, shindi jake no vakaji vamweni vake vakamwiremo.
4 Ivona vakamwa vhinyu, vokuja zvimwari zvo goridhi, zvo sirivha, zvo utare, zvo simbi, zvo matabwa no zvomapuwe.
5 Pa mukuvo wondhowo, pakavoneka zvikunwe zvo nyara yo mundhu, zvotanga kutara pa biravira ro nyumba ya mambo pambeji po cigajikiro co cibani,* mambo wakavona nyara yecitara.
6 Ngo kudaro, mu meso ma mambo makacinja, wotanga kuthya maningi. Cihunu* cake cakatetemera, makokovhi ake aitakana.
7 Mambo wakamima ngo izwi guru ecidaninja vafemberi, Vakaradhiya* no vazivi vo ndhondho. Mambo wakavhunja vazivi vo Bhabhironi kudari: “Mundhu anokwanisa kuverenga zviro zvakatahwari izvi, wondivhunja revo yazvo, anozosimijwa nguvo yakapsukirikira, mudhariya wo goridhi mu musipa make, wozotonga inga mundhu wocitatu mu umambo.”
8 Ngo kudaro, vazivi vese va mambo vakaviya, asi ivona avazivi kukwanisa kuverenga zvakatahwa no kuvhunja mambo revo yazvo.
9 Mambo Bherishazari wakathya maningi, kumeso kwake kwakacinja; vazivi vake vakapera hwiru.
10 Vahosi pavakazwa masoko a mambo no vazivi vake, vakanghwina mumba munoitihwa mabuso vonanga kudari: “Mambo, raramanyi* no kucingaperi. Mucathya henyu, mucaneseka.
11 Mu umambo hwenyu muno mwanarume ano mujimu yo zvimwari zvakacena. Mu njiku ja baba wenyu, wakavoneka kuti iyena ano zivo, kuzwisisa no uzivi hwakaezana no hwo zvimwari. Mambo Nebhukadhinezari baba wenyu vakamugaja inga mutungamiriri wo vapiri vo masaramuso, vafemberi, Vakaradhiya* no vazivi vo ndhondho. Mambo, izvi ndizvona zvakaithwa ndi baba wenyu.
12 Dhanyeri, wakapuwa zina ndi mambo kuti Bheriteshazari, wainga no mujimu unoshamaisa, zivo, kuzwisisa kuti azive revo jo hope, kujekesa zviro zvakafisika no kutonga ndava jinonesa. Wari danijanyi Dhanyeri, iyena anozomuvhunja revo yazvo.”
13 Ngo kudaro, Dhanyeri wakaviiswa pamberi pa mambo. Mambo wakamuvhunjisa kudari: “Iwewe ndiwe Dhanyeri, umwe wo vandhu vakatohwa ndi baba wangu kuvha ku Judha?
14 Inini ndakazwa kuti iwewe uno mujimu yo zvimwari, wakavoneka kuti iwewe uno zivo, unozwisisa no uzivi hunoshamaisa.
15 Vazivi no vafemberi vakaviiswa pamberi pangu kuti vaverenge masoko aya no kundivhunja zvazvinoreva, asi ivona avaripi kukwanisa kundivhunja zvazvinonanga.
16 Ngo kudaro, inini ndazwa kuti iwewe unokwanisa kudurujira no kutonga ndava jinonesa. Waro kudari ukakwanisa kuverenga zvakatahwari no kundivhunja zvazvinonanga, iwewe unozosimijwa nguvo jakapsukirikira, wozosimijwazve mudhariya wo goridhi mu musipa, wozotonga inga mundhu wo citatu mu umambo.”
17 Dhanyeri wakadavira mambo kudari: “Mambo, mucandipa henyu zvipo zvenyu, zvipenyi vamweni. Asi inini ndinozoverenga zvakatahwa no kumuvhunja zvazvinoda kureva.
18 Mambo, Mwari Mukuru-Kuru wakapa baba wenyu Nebhukadhinezari umambo, simba, kukujwa no ukuru.
19 Ngo ndava yo cigaro cakakhwira cavakapuwa ndi Mwari, vandhu vese, majinja ese no ndumi jese jaitetemera ngo kuthya pamberi pavo. Ivona vaiuraya no kusiya vecipona vandhu vavaida. Ivona vaikuja no kudodokesa vandhu vavaida.
20 Asi pavakatanga kuzvikuja vecivomesa musoro wavo, voita zviro ngo kuzvikuja, vakavhiswa pa cigaro cavo co umambo. Vovhisihwazve rukujo hwavo.
21 Ivona vakavhiswa pakati po vandhu, mwoyo wavo woezana no mwoyo wo cinyama. Ivona vaigara no mbongoyo jo musora, vaiha maushwa inga n’gombe, muviri wavo wakabijwa ngo cando co kumatenga, mbhera vakaguma pakuziva kuti Mwari Mukuru-Kuru ndiyena mutongi mu umambo hwo vandhu, anohupa vaanoda.
22 Asi imwimwi Bherishazari mwana wa Nebhukadhinezari, pikija meciziva zvese izvi, amuzivi kudodokesa mwoyo wenyu.
23 Mukusiyana, imwimwi makazvikuja pamberi pa Mambo wo kumatenga. Makaita kuti kopo jiri mu nyumba yake jitohwe. Imwimwi mambo, vazivi venyu, shindi jenyu no vakaji venyu vamweni makamwiremo vhinyu. Mokuja zvimwari zvo sirivha, zvo goridhi, zvo utare, zvo simbi, zvo matabwa no zvomapuwe. Zvimwari zvicikavoni, zvicikazwi, zvicikazivi ciri cese. Asi imwimwi, amuzivi kukuja Mwari wakamupa mwiha wokufema, mu makwanja enyu ese.
24 Ngo kudaro, ndiyena watumira nyara, masoko aya otahwa.
25 Masoko akatahwa nga aya: MENE, MENE, TEKERI no PARISINI.
26 “Nga iyi revo yo masoko: MENE, Mwari waverenga njiku jo umambo hwenyu, wohupa magumo.
27 “TEKERI, imwimwi makapimwa pa bharansa, movoneka kuti amuremi.
28 “PERESI, umambo hwenyu hwapauhwa, hwopekejwa Vamedhiya no Vapersiya.”
29 Ngo kudaro, Bherishazari wakadira mutemo, vosimija Dhanyeri nguvo yakapsukirikira no mudhariya wo goridhi mu musipa make. Vozivisa kuti iyena, waizova mutongi wocitatu mu umambo.
30 Pa usiku wondhowo, Bherishazari mambo wo Vakaradhiya wakaurawa.
31 Umambo wakazopuwa Dhariyo mu Medhiya, wainga no makumatandhatu o makore na makore maviri.
Masoko o Pasi
^ Kana: “cigabhu-gabhu.”
^ Vonanyi Kudurujihwa ko Magama.
^ Cikwata co vandhu caizvivona kuti cainga nduna co zvokufembera no kuziva ndhondho.
^ Kana: “ponanyi.”
^ Cikwata co vandhu caizvivona kuti cainga nduna co zvokufembera no kuziva ndhondho.
