Dhanyeri 7:1-28
7 Mu gore rokutanga ra mambo wo Bhabhironi Bherishazari, Dhanyeri wakarota wovona zvivoniso mu murangariro wake, paainga akavata pa kama yake. Ngo kudaro, iyena wakatara zvaakarotaro, wotarira zviro zvese kamare zvaakavona.
2 Dhanyeri wakati: “Pa zviro zvandakavoneswa co usiku, inini ndakavona mbhepo murongomuna jo kumatenga jecivhunguza jombe guru.
3 Zvinyama zvirongomuna zvainga zvakakura maningi zvakabuda mu jombe. Cimwe cainga cakasiyana no cimweni.
4 “Cokutanga caiezana no mbhondoro, cainga no mapapiro* o hokotora. Inini ndakacisotesesa mbhera mapapiro aco opera kuumbuhwa. Icona cakamuswa pa nyika coimiswa ngo murenje muviri inga mundhu, copuwa mwoyo wo mundhu.
5 “Ndakavona cinyama cimweni cocipiri, caiezana no ursu. Icona cainga cakaima ngo divi rimwe, pa muromo paco cainga cakaruma mbavhu ndhatu. Covhunjwa kudari: ‘Mukai uhe nyama zinji.’
6 “Pasure pa izvi, ndakaenderera mberi ndecisotesesa, ndakavona cinyama cimweni caiezana no khamba. Icona cainga cino mapapiro* marongomuna pa musana inga o shiri. Cinyama condhoco cainga cino musoro murongomuna. Icona cakapuwa simba kuti citonge.
7 “Pasure pa izvi, ndakaenderera mberi ndecisotesesa mu zvivoniso zvangu co usiku. Ndakavona cinyama cimweni co cirongomuna cinothyisa, cinondhyandhyisa, cino simba maningi. Cainga cino meno o simbi akakura, caiha, caigura-gura no kucika-cika zvaisara. Cainga cakasiyana no zvinyama zvimweni zviya, icona cainga no gumi ro manyanga.
8 Pandainga ndecinasa kusotesesa manyanga ayani, pakabuda nyanga imweni doko, nyanga ndhatu jokutanga jakavhiswa pamberi paco. Pa nyanga yondhoyo painga pano majiso akaezana no majiso o mundhu. Paingazve no muromo waibhuya masoko o kuzvikuja.
9 “Ndakaenderera mberi ndecisotesesa mbhera zvigaro zvo umambo zvipere kudihwa, Dhodha rogara. Nguvo jaro jainga jakacena inga cando. Vhuji ro mumusoro maro rainga rakacena maningi inga manviri. Cigaro caro co umambo cainga co murazvu wo muriro, marodha o cigaro caro co umambo ainga o muriro unobwaka.
10 Muriro wo murambo waipopoma wecivha pamberi pake. Zviuru zvakawanda* zvaimushandira. Mazana o zviuru zvakawanda* zvaiima pamberi pake. Dare rakatanga kutonga, mabhuku akafununguhwa.
11 “Ndakaenderera mberi ndecisotesesa ngo ndava yo mazwi okuzvikuja aibhuiwa ngo nyanga. Ndakasota mbhera cinyama courawa. Muviri waco wofa woenda kopiswa ngo muriro.
12 Asi zvinyama zvimweni zvakatorehwa utongi hwazvo. Upenyu hwazvo hwakaengejehwa mbhera pamukuvo no nguva yakagajwa.
13 “Ndakaenderera mberi ndecivona zvivoniso zvandakavoneswa co usiku. Ndakavona mundhu umweni wakaezana no mwana wo mundhu, eciviya ari mu makore o kumatenga. Iyena wakaenda kuno Dhodha wokhwedera pamberi paro.
14 Iyena wakapuwa utongi, kukujwa no umambo kuti vandhu vese, majinja ese no ndumi jese jimushandire. Utongi hwake, i utongi hucina magumo. Ihwona ahuzovhiswi. Umambo hwake ngo hwo kwenda no kwenda.
15 “Inini Dhanyeri, ndakapera simba ngokuti zvivoniso zvandakakhombijwa zvaindithyisa.
16 Inini ndakaenda phedo po umwe wainga wakaima pondhopo, ndomuvhunjisa revo yo zviro izvi. Iyena wakandidavira wondivhunja zvazvinoreva.
17 “‘Zvinyama izvi zvirongomuna zvakakurari, zvinoimirira majimambo marongomuna anozovoneka pa nyika.
18 Asi vandhu vakasanwa vo Mukuru-Kuru vanozopuwa umambo. Umambo unozova hwavo mbhera narini, hina kwenda no kwenda.’
19 “Ngo kudaro, inini ndaida kuziva zvizinji ngo pamusoro po cinyama co cirongomuna. Icona cainga cakasiyana no zvinyama zvimweni. Caithyisa maningi, cainga no meno o simbi no ndhwara jo utare. Caiha, caigura-gura no kucika-cika zvaisara.
20 Ndaidavo kuziva ngo pamusoro po gumi ro nyanga jainga jiri musoro maco, no nyanga imweni yakabuda pa ndau yo nyanga ndhatu jakawa. Nyanga yainga no majiso no muromo yaibhuyaya masoko o kuzvikuja, yaida kuva yakakura kupinda jimweni.
21 “Ndakaenderera mberi ndecisotesesa nyanga yondhoyo yeciita hondo no vandhu vakasanwa, yecivanyisa.
22 Mbhera Dhodha rakaguma rotonga kuitira kubesera vandhu vakasanwa vo Mukuru-Kuru. Woguma mukuvo wakagajwa kuti vandhu va Mwari vapuwe umambo.
23 “Iyena wakandivhunja kudari: ‘Ngo pamusoro po cinyama co cirongomuna, cinoimirira umambo wo cirongomuna unozova pasi pano. Iwona hwakasiyana no umambo hwese. Hunozoha pasi pese, kucika-cika no kuphwanya-phwanya nyika.
24 Ngo pamusoro po gumi ro nyanga, kunozova no gumi ro majimambo anozobuda pa umambo wondhowo. Sure ko majimambo ondhoo kunozobudazve umambo umweni unozosiyana no majimambo o kutanga. Wozododokesa majimambo matatu.
25 Iyena anozovereketa masoko anotuka Mukuru-Kuru, wozoenderera mberi ecinesa vandhu vakasanwa vo Mukuru-Kuru. Anozoeja kucinja mukuvo no mutemo. Ivona vanozopuwa mu nyara jake ko makore matatu no meya.*
26 Asi Dare rakatanga kutonga, romuvhisira utongi hwake kuti rimuuraye no kumuphwanya-phwanya.
27 “‘Umambo, utongi no ukuru hwo umambo hwainga pasi po kumatenga, hwakapuwa vandhu vakasanwa vo Mukuru-Kuru. Umambo hwavo ahuna magumo. Utongi hwese hunozovashandira no kuvazwira.’
28 “Apa ndipona pano perera shwiro iyi. Asi inini Dhanyeri, ndakaneseka maningi mu murangariro wangu. Kumeso kwangu kwakacinja, asi zviro izvi ndakazviviga mu mwoyo wangu.”
Masoko o Pasi
^ Kana: “mapapa.”
^ Kana: “mapapa.”
^ Gama ngo Gama: “zviuru zvo zviuru.”
^ Gama ngo Gama: “gumi ro zviuru zvakapethwa gumi ro zviuru.”
^ Kana: “mukuvo umwe, mukuvo muviri no meya yo mukuvo umwe.”
