Dhanyeri 9:1-27
9 Mu gore rokutanga ra Dhariyo mwana wa Asuwero wo mubarihwana wo Vamedhiya, uwo wainga wakaithwa mambo mu umambo wo Vakaradhiya,
2 mu gore raakatanga kutonga, inini Dhanyeri ndakazwisisa mu mabhuku makore aizopera Jerusarema riri mathere. Inga zvakanangwa mu soko ra Jehovha, ecishandisa muporofeti Jeremiya, aizova makumanomwe o makore.
3 Ndakasotesa meso angu kuna Jehovha Mwari wo cokwadi, ndecimudeketerera, ndeciita mukumbiro no kuzira ndakasimira mapendera o saku ndiri pamarota.
4 Ndakaita mukumbiro kuna Jehovha Mwari wangu ndodekeca ndeciti:
“Jehovha Mwari wo cokwadi, Mwari Mukuru, anoshamaisa, anongwarira citenderano cake no kukhombija rudo hucikacinji kuna vaya vanomuda na vaya vanoteveja mupango yake.
5 Takashaisha, takaposa, takaita zvakashata topanduka. Takasiya mutemo yenyu no matongero enyu.
6 Atizivi kuzwira vaporofeti vashandiri venyu, avo vakabhuya ngo zina renyu ku majimambo edu, ku nduna jedu, ku majibaba edu no ku vandhu vese vo nyika yedu.
7 Imwimwi Jehovha makarurama. Asi itusu tinogara tecipseruka* inga zvatiri nyamasi. Itusu, vanarume vo Judha, vagari vo Jerusarema no Vaiziraeri vese vari phedo no vari ndhambo, vari mu nyika jese jamakavandhandhanisa, ngo ndava yo kutama kugondeka kwavo kwamuri.
8 “Jehovha, itusu, majimambo edu, nduna jedu no majibaba edu tiri kupseruka* ngokuti takamushaishira.
9 Jehovha Mwari wedu, ndi Mwari ano usizi, anoregerera. Asi itusu takamupandukira.
10 Atizivi kuzwira izwi ra Jehovha Mwari wedu. Atizivi kutevera mutemo yake yaakadira pakati pedu ecishandisa vaporofeti, vashandiri vake.
11 Vaiziraeri vese vakaposa vosiya kuzwira izwi renyu. Imwimwi makadurura pakati pedu zvituko zvakatahwa mu mutemo wa Mosi mushandiri wa Mwari wo cokwadi, ngokuti itusu takamushaishira.
12 Iyena wakakwanirisa masoko aakabhuya ngo pamusoro pedu no vatongi vedu vanotitonga, woviisa dambujiko guru. Zvakaitihwa Jerusarema, azvizivi kumboitikazve pasi po denga.
13 Dambujiko rese iri, ratiwira mukuzwirana no zvakatahwa mu mutemo wa Mosi. Asi itusu atizivi kupsaka kuitihwa unyasha ndi Jehovha Mwari wedu, ngo kusiya kuita zvakashata tokhombija kuti tinozwisisa soko renyu.
14 “Ngo kudaro, Jehovha wakaenderera mberi akasotesesa, wotiviisira dambujiko. Ngokuti Jehovha Mwari wedu, wakarurama mu zvese zvaanoita. Asi itusu, atizivi kuzwira izwi rake.
15 “Itusu takashaisha, toita zvakashata pamberi penyu Jehovha Mwari wedu. Imwimwi makabudisa vandhu venyu mu nyika yo Ejipita ngo mukono wenyu uno simba. Zina renyu riri kutokota mbhera na nyamasi.
16 Jehovha, mukuzwirana no zviito zvenyu zvakarurama, tabata murenje tinokumbira kuti muvhise ushungu hwenyu no kucamwa kwenyu ku dhorobha renyu ro Jerusarema, dundhu renyu rakacena. Ngo ndava yo zvishaishi zvedu no kuposa ko majibaba edu, Jerusarema no vandhu venyu, tiri kusekwa ngo vandhu vese vakatitendeneja.
17 Zvino wari Mwari wedu, izwanyi mukumbiro wo mushandiri wenyu no kudeketera kwake. Ngo ndava yenyu Jehovha itiranyi unyasha ndau yenyu yakacena yakaphwanyiwa.
18 Mwari wangu, sheyamijani njeve jenyu muzwe! Fununguranyi majiso enyu muvone kutambujika kwedu no kuphwanyiwa kwakaita dhorobha rinotora zina renyu. Itusu tiri kumudeketerera, kuciripi ngo zviito zvedu zvakarurama asi ngo ndava yo usizi hwenyu hwakakura.
19 Jehovha izwanyi. Jehovha regereranyi. Jehovha nasanyi kuteya njeve, muvone zvokuita mucikanonoki Mwari wangu. Ngokuti zina renyu, riri pakati po vandhu venyu no dhorobha renyu.
20 Pandainga ndicavereketa, decikumbira no kudekeca cishaishi cangu no cishaishi co vandhu vangu Vaiziraeri, ndecikumbira Jehovha Mwari wangu, ngo pamusoro po dundhu rakacena ra Mwari wangu,
21 pandainga ndicaita mukumbiro, Gabhriyeri mwanarume wandaingaya ndakavona mu civoniso, wakandikhwederera pa nguva yaiithwa mupiro co madeko. Inini ndainga ndaremba maningi.
22 Iyena wakaita kuti ndizwisise ecindivhunja kudari:
“Dhanyeri, wari inini ndaviya kuzokujijisa no kukubesa kuti uzwisise zvinozoitika.
23 Pawainga weciita mukumbiro wo kudeketera, kwakaverekethwa masoko. Inini ndaviya kuzokuvhunja ngokuti iwewe uri mundhu anosisira maningi. Ngo kudaro, rangarijisisai ngo pamusoro po shwiro iyi, uzwisise civoniso.
24 “Pano makumanomwe o sumana* akaimisihwa vandhu vako no dhorobha rako rakacena, kuti kushaisha kupejwe, cishaishi cipfujuhwe, kuposa kuregerehwe, kuti pave no ururami hwo kwenda no kwenda. Civoniso no ciporofeti zvidhindhwe, Ndau Yakacena izojwe.
25 Iwewe unodikana kuziva no kuzwisisa izvi: Pasure pokudihwa mutemo wokuhwirijwa no kuvakiswa ko Jerusarema mbhera kuviya ka Mesiya Mutungamiriri, kunozova no sumana nomwe. Kunozovazve no makumatandhatu o sumana no sumana mbiri. Irona rinozohwirirazve inga zvarainga rakaita kare. Rozovakiswazve no ndau jokugara vandhu pamwepo no mugere jo kumwa. Asi uri mukuvo wo kutambujika.
26 “Pasure po makumatandhatu o sumana no sumana mbiri, Mesiya anozourawa osara acina ciro.
“Vandhu vo mutungamiriri anozoviya, vanozophwanya dhorobha no ndau yakacena. Kupera kwazvo kunozoita inga ko usore.* Panozova no hondo mbhera kumagumo. Mukuzwirana no zwasungwa ndi Mwari, kunozova no kuparajwa.
27 “Citenderano caakaita no vandhu vazinji, anozocisiya cecienderera mberi cecishanda mukati mo sumana imwe. Pakati po sumana yondhoyo, mupiro no zvipo zvinozopera.
“Pa bapiro* po zviro zvinonyangaja panonga pano mundhu anoparaja zviro zvese. Zviro zvakasungwa, zvinozodururihwavo pa wiya anophwanya, mbhera aparajwe.”
Masoko o Pasi
^ Gama ngo Gama: “tino nyowa mumeso.”
^ Gama ngo Gama: “tino nyowa mumeso.”
^ Kana kuti, sumana jo makore.
^ Kana: “ushau.”
^ Kana: “bapa.”
