Ekisodho 1:1-22
1 Jakobe, kana kuti Iziraeri, paakaenda ku Ejipita, iyena wakatoravo vana vake. Mwana umwe na umwe wakatoravo mbhuri yake, mazina avo nga aya:
2 Rubheni, Simiyoni, Revhi na Judha;
3 Isakari, Zebhuroni na Bhenjamini;
4 Dhani na Naftari; Gadhi na Azeri.
5 Vandhu vese vakabahwa ndi* Jakobe vaikwana kuita 70, asi Josefa wainga waa ku Ejipita kare.
6 Pejisire, Josefa wakatamika, hama jake jese no mubarihwanewo wese wakatamikavo.
7 Vaiziraeri vakabarana vowanda. Ivona vakaenderera mberi veciengejeka, vova no simba rakakura maningi, zvoita kuti vazaje nyikeyo yese.
8 Pa kufamba ko mukuvo, mu Ejipita makava na mambo mupsa. Mambo uwu aacaizivepi kuti Josefa wainga ani.
9 Ngo kudaro, iyena wakavhunja vandhu kuti: “Vonanyi! Vandhu vo Vaiziraeri vakawanda maningi, vova no simba rakakura kupinda itusu.
10 Ngativaitire ciri cese kuti vatamezve kuwanda. Tikatama kuita kudaro, vanozoenderera mberi veciengejeka. Kudari pakamuka hondo, ivona vanozobatana no vavengi vedu vohwisana na itusu, perapo vobuda munyika muno.”
11 Ngo kudaro, ivona vakagaja vatungamiriri vo varanda kuti vavaitise basa rakavanga. Vakavakira Faro madhorobha o kuunganijira zviro, dhorobha ro Pitomi no ro Raamisesi.
12 Povaivabzinyirira maningi, ivona vaiengejekavo maningi, vondhandhanika, zvoita kuti vathye maningi Vaiziraeri.
13 Pasure pazvo, Vaejipita vakaitisa Vaiziraeri basa rakakura maningi.
14 Vaivatambisa nyatwa ngo mabasa anonesa o kukanya dongo, kuita zvidhina no mabasa ese o mumaminda. Vaivaitisa mushovo wese wo mabasa anonesa o uranda.
15 Pa kufamba ko nguva, mambo wo Ejipita wakabhuya no vanakaji vaviri vaibesera* vanakaji vo Cihebheru vaida kubara. Mazina avo aidanijwa kuti Shifira na Puwa.
16 Iyena wakavavhunja kudari: “Mukabesa vanakaji vo Cihebheru kubara, vonanyi ushoni mwanewo. Kudari ari mwanarume, muurayenyi. Asi kudari ari mwanakaji, mucamuuraya.”
17 Asi vanakaji vaya vaithya Mwari wo cokwadi, ngo kudaro, avazivi kuita zvovakavhunjwaya ndi mambo wo Ejipita. Avazivi kuuraya vana vorume.
18 Pa kufamba ko nguva, mambo wo Ejipita wakadanija vanakaji vaya, wovavhunjisa kuti: “Ngenyi amuzivi kuuraya vana vorume?”
19 Ivona vakadavira Faro kuti: “Vanakaji vo Cihebheru vakasiyana maningi no vanakaji vo Ejipita. Mubeseri* anozoguma, ivona vanonga vabara kare.”
20 Ngo kudaro, Mwari wakataja ushoni vanakaji vaibeseraya vanakaji vaibara. Vandhu vaindoengejeka, vova no simba rakakura.
21 Zvecivoneka kuti vanakaji vaibeseraya* vaithya Mwari, iyena wakazovapavo mbhuri javo.
22 Pakupejisira, Faro wakavhunja vandhu vake kudari: “Khandiranyi mu Murambo wa Niro, mwana wese worume wo Vahebheru anovha kubahwa. Asi mwana wokaji amudikani kumukhandira.”
Masoko o Pasi
^ Gama ngo Gama: “vandhu vese vakavha mu cihunu ca.”
^ Kana: “vaicinga.”
^ Kana: “mucingi; nyamukuta.”
^ Kana: “vaicingaya.”
