Ekisodho 10:1-29
10 Ngo kudaro, Jehovha wakavhunja Mosi kudari: “Endai ka Faro. Ngokuti ndatindivarisa mwoyo wake no wo vashandiri vake, kuti ndivonese zvitatijo zvangu pamberi pake.
2 Kuti uvhunje vana vako no vazukuru vako, makhawisire andakaita Vaejipita no zvitatijo zvondakaita pakati pavo. Imwimwi munozoziva kuti ndini Jehovha.”
3 Mosi na Aroni vakapinda kuna Faro vomuvhunja kudari: “Jehovha, Mwari wo Vahebheru ari kunanga kudari: ‘Unozoramba kundizwira mbhera rini? Pindisai vandhu vangu kuti vaende kondishandira.
4 Kudari iwewe ukandoramba kusiya vandhu kuti vapinde, mangwana kunoejari, ndinozoviisa ndere* mu nyika yenyuyo.
5 Ijona jinozofukija pasi pese. Azvizokwanisiki kuvona musanga. Jinozopeja zvese zvakasiiwa ngo nvura yo mapuwe, zvomasara nazvo no kuha miti jese jiri musora.
6 Jinozozaja nyumba jenyu no nyumba jo vashandiri venyu no nyumba jo Vaejipita vese. Izvi azvizivi kumbovoneka ngo majibaba enyu no majicekuru enyu, kuvhira njiku yaakabahwa mbhera na nyamasi.’” Naapera kuvereketa izvi, Mosi wakapinda.
7 Ngo kudaro, vashandiri va Faro vakamuvhunja kudari: “Mundhu uwu anozogara ecitinesa mbhera rini? Vasiyenyi vapinde kuti vashandire Jehovha, Mwari wavo. Imwimwi amuripidi kukwanisa kuvona kuti Ejipita iri kumoshwa?”
8 Ngo kudaro, Mosi na Aroni vakaviiswazve kuna Faro, iyena wovavhunja kudari: “Endanyi mushandire Jehovha, Mwari wenyu. Asi ndiyani anoenda?”
9 Mosi wakamudavira kudari: “Tinozotora majaha edu, no vasharuka, no vana vedu vorume no vokaji, no mavhuta edu no n’gombe jedu. Ngokuti tiri kuda kuitira Jehovha mabuso.”
10 Iyena wakadavira kudari: “Kudari njiku iri yese ndikamusiya mopinda no vana venyu, indava yokuti Jehovha kamare ana imwimwi. Zviri pambhene kuti imwimwi muri kuda kuita zvakashata.
11 Haiwa! Ngavaende vanarume basi koshandira Jehovha. Ndizvona zvomakakumbira.” Ngo kudaro, ivona vakagogomehwa pambeji pa Faro.
12 Jehovha wakavhunja Mosi kudari: “Musai nyara jako panyezuru po Ejipita, kuti udanije ndere,* kuti jiviye mu nyika yo Ejipita. Jihe zvese zvakasimwa mu maminda, no zviro zvakasiiwa ngo nvura yo mapuwe.”
13 Mosi wakamusa ndonga yake pa nyezuru po nyika yo Ejipita. Jehovha wakatuma mbhepo yo kumavhazuva. Iyona yakatakatira no kuejehwa ecivhunguza. Nokwaeja, mbhepo yo kumavhazuva yainga yaima, asi yakaviisa ndere.*
14 Ndere* jakaza mu nyika yese yo Ejipita, jakamata mativi ese o nyika. Ijona jakamosha maningi mu nyika yese yo Ejipita. Ajizivi kumbovonekazve ndere jakadari. Sure kwajo akuzoviizve jimweni.
15 Ijona jakafukija nyika yese yo Ejipita. Iyona yakaita cidima ngo pamusoro pajo. Ijona jakapeja mbeu jese no mucero jese jo mamiti, zvakasiiwa ngo nvura yo mapuwe. Apana no miti yakasara kana zvinomera mu sora mu nyika yese yo Ejipita.
16 Ngo kukasika, Faro wakadanija Mosi na Aroni wovavhunja kudari: “Ndashaishira Jehovha, Mwari wenyu pamwepo na imwimwi.
17 Waro ndapota, ndiregererei zvishaishi zvangu. Deketerai kuna Jehovha, Mwari wako, kuti avhise dambujiko iri kwandiri.”
18 Ngo kudaro, iyena* wakavha pamberi pa Faro, woenda kodeketerera Jehovha.
19 Jehovha wakaita kuti mbhepo iya icinje, yovha ngo kumavirira yokukuta ndere* jese, yojiwisira mu Jombe ro Kupsuka. Apana no ndere imwe yakasara mu nyika yese yo Ejipita.
20 Asi Jehovha wakatindivarisa mwoyo wa Faro. Iyena aazivi kupindisa Vaiziraeri.
21 Perapo, Jehovha wakavhunja Mosi kuti: “Musai nyara jako kudenga kuti mu nyika yese yo Ejipita muve no cidima. Cidima cakakura maningi.”
22 Mosi wakamusa nyara jake kudenga koviya cidima cakakura maningi mu nyika yese yo Ejipita ko njiku ndhatu.
23 Apana na umwe waikwanisa kuvona mudoni wake, nokuti kumuka pa ndau yake pa njiku ndhatu. Asi kwaigara Vaiziraeri kwainga kwakaeja.
24 Ngo kudaro, Faro wakadanija Mosi womuvhunja kudari: “Endanyi moshandira Jehovha. Asi mavhuta no n’gombe jenyu ngazvisare. Vana venyu mungapinda navo.”
25 Asi Mosi wakamuvhunja kudari: “Imwimwi munozotitendera kuti titore zvinyama kuti tiende koita mupiro no zvipo zvo kupiswa kuti tiende kozvipa Jehovha, Mwari wedu.
26 Itusu tinozopinda no zvinyama zvedu. Apana no cinyama cimwe cinozosara. Ngokuti itusu tinozoshandisa zvinyama zvimweni pa kunamata Jehovha, Mwari wedu. Atizvizivi kuti cinyama capi catinozoshandisa pa kunamata Jehovha, Mwari wedu.”
27 Asi Jehovha wakatindivarisazve mwoyo wa Faro. Iyena aazivi kutenderazve kuvapindisa.
28 Faro wakamuvhunja kudari: “Budai pano! Ucaviyazve pano. Njiku yaunozoviya pano, zivai kuti unozofa kamare.”
29 Ngo kudaro, Mosi wakati: “Inga zvomananga, inini andicaviizve pano.”
Masoko o Pasi
^ Kana: “matoto; ndongwe; magadhi.”
^ Kana: “matoto; ndongwe; magadhi.”
^ Kana: “matoto; ndongwe; magadhi.”
^ Kana: “matoto; ndongwe; magadhi.”
^ Kangaije angava Mosi.
^ Kana: “matoto; ndongwe; magadhi.”
