Ekisodho 11:1-10
11 Perapo Jehovha wakavhunja Mosi kuti: “Ndinoviisirazve Faro no Ejipita dambujiko rimweni. Pasure paro iyena anozomupindisa kuvha muno. Paanozomupindisa, iyena anozotomukira kumugogomera.
2 Waro vhunjai vandhu kuti mwanarume wese no mwanakaji wese, anodikana kukumbira vhizinyu wake zviro zvakaithwa ngo sirivha no goridhi.”
3 Jehovha wakaita kuti vandhu vaitihwe unyasha ngo Vaejipita. Asi Mosi wainga ava mundhu anoreremejwa maningi mu nyika yese yo Ejipita pakati po vashandiri va Faro no vandhu vese.
4 Perapo Mosi wakati: “Jehovha wananga kudari: ‘Usiku huno ndinozofamba-famba mu nyika yo Ejipita.
5 Matangwe ese o munyika yo Ejipita anozofa. Kuvhira ku dangwe ra mambo Faro, mbhera ku dangwe ro mushandiri wake wokaji anokwiya ngo gwiyo* no matangwe ese o zvinyama, anozofavo.
6 Mu nyika yese yo Ejipita munozova no ciriro cakakura maningi. Cicito cikaitika. Cikaitika, acizoitikizve.
7 Asi akuna no imbhwa inozoukurira Vaiziraeri. Nee kuukurira vandhu kana zvifuyo zvavo. Kuti muzive kuti Jehovha anokwanisa kusiyanisa Vaejipita no Vaiziraeri.’
8 Vashandiri venyu vese vanozoviya kuzondigwadamira, veciti: ‘Pindanyi, imwimwi no vandhu vese vanomutevera.’ Pasure pazvo, inini ndinozopinda.” Paakapera kunanga izvi iyena wakavha pamberi pa Faro naakanyangajwa maningi.
9 Perapo, Jehovha wakavhunja Mosi kudari: “Faro aazokuzwiri, kuti mushamaiso yangu iengejeke mu nyika yo Ejipita.”
10 Mosi na Aroni vakaita mushamaiso yese iyi pamberi pa Faro. Asi Jehovha wakaita kuti mwoyo wa Faro utindivare kuti atame kupindisa Vaiziraeri kuvha mu nyika yake.
Masoko o Pasi
^ Vonanyi Kudurujihwa ko Magama.
