Ekisodho 12:1-51
12 Jehovha wakavhunja Mosi na Aroni vari mu Ejipita kuti:
2 “Mweji uwu unozova mweji wokutanga komuri. Iwona unozova mweji wokutanga wo gore komuri.
3 Vhunjai mbungano yese yo Vaiziraeri kuti: ‘Pa njiku yo cigumi yo mweji uwu, mundhu umwe na umwe anodikana kusanira vhuta rimwe mbhuri yake. Muzi umwe nga umwe ngauve no vhuta rawo.
4 Kudari vandhu vo pamuzipo vari vashoma, ivona vanodikana kuha vhuta iri no mavhizinyu avo, mukuzwirana no kuwanda kovakaita. Pomunoda kuriha, munodikana kuziva kuti mundhu umwe na umwe anoha nyama yakawandisa kudini.
5 Rinodikana kuva raushoni, rova rorume rino gore rimwe. Mungasana civhuta corume kana cikoto-koto.
6 Munodikana kuringwarira mbhera njiku yoci 14 yo mweji uno. Mbungano yese yo Vaiziraeri inodikana kuriuraya zuva parinonga ravira.
7 Ivona vanodikana kutora ngazi yaro padoko, voizoja pa cikotamo no mativi maviri o musuvo pa* nyumba yo vandhu vanoriharo.
8 “‘Ivona vanodikana kuha nyama iyi pa usiku hwondhohwo. Vanodika kuikoca ngo muriro, voiha no pau jicina mbijo no saradha inovava.
9 Avadikani kuiha iri mbishi kana yokubikwa, asi vanodikana kuita ngo kuikoca, kubatanija no musoro wayo, no murenje jayo no maura* ayo.
10 Apana divi riri rese rinodikana kuvigwa mbhera njiku inotevera. Divi riri rese ro nyameyo rinosara mbhera co mangwana fumi, munodikana kuripisa ngo muriro.
11 Ihanyi kudari: Munodikana kuiha makasunga bhande, makasimira magwada no ndonga munyara. Munodikana kuiha ngo kukasikira. Iyi i Phasika ya Jehovha.
12 Ndinozofamba-famba mu nyika yo Ejipita, ndouraya matangwe ese o Ejipita kuvhira ku vandhu mbhera ku zvinyama; inini ndinozopseruja zvimwari zvese zvo Ejipita. Ndini Jehovha.
13 Ngazi yakona inozoita citatijo co nyumba yomuri. Inini ndinozovona ngazi iyi, ndomuphuka. Dambujiko iri arizomuurai pondinozotaka nyika yo Ejipita.
14 “‘Njiku iyi munozoiceukijira. Munodikana kuiceukijira inga mabuso amunoitira Jehovha kuvhira ku mubarihwana wenyuwo wese. Munodikana kuiceukijira kuti ive mutemo wo kwenda no kwenda.
15 Imwimwi munozoha pau jicina mbijo njiku nomwe jese. Pa njiku yo kutanga munozovhisa mbijo pamuzi penyu. Ngokuti ari wese anozoha zviro zvakadihwa mbijo kuvhira pa njiku yo kutanga mbhera njiku yocinomwe, anozourawa mu Iziraeri.
16 Pa njiku yo kutanga munozoita gungano rakacena. Pa njiku yocinomwe, munozoitazve gungano rimweni rakacena. Apana basa riri rese rinodikana kuitwa mukati mo njiku iji. Munozonasirira zvomunoda kuha basi.
17 “‘Munodikana kuita Mutambo wo Pau Jicina Mbijo, ngokuti mu njiku iyi kamare, ndinozobudisa mbungano yese mu nyika yo Ejipita. Imwimwi munodikana kuceukija njiku iyi kuvhira ku mubarihwana wenyu wese, kuti uve mutemo wo kwenda no kwenda.
18 Munozoha pau jicina mbijo kutangira madeko o njiku yoci 14 yo mweji wokutanga, mbhera madeko o njiku yoci 21 yo mwejiwo.
19 Mumba mwenyu amudikani kuwanika mbijo mukati mo njiku nomwe. Ngokuti ari wese anoha zvakadihwa mbijo, azvinenyi kuti wakabarihwa ku nyika imweni kana kuti wakabarihwa munyikemo, mundhu endhowo anodikana kuurawa mukati mo mbungano yo Iziraeri.
20 Amudikani kuha ciri cese cakadihwa mbijo. Munodikana kuha pau jicina mbijo mu muzi jenyu jese.’”
21 Mosi wakadanija vakuru vese vo Iziraeri, wovavhunja kuti: “Mbhuri imwe na imwe, ngaisane cinyama cimwe, mouraya cinyama condhoco kuti muite mupiro wo Phasika.
22 Perapo munodikana kubija davi ro hisopi mu ngazi iri mu basiya, moizoja pa cikotamo no mativi maviri o musuvo.* Apana na umwe wenyu anodikana kubuda kunja ko musuvo wo nyumba yake mbhera co mangana fumi.
23 Jehovha paanozofamba ecitambuja Vaejipita, akazovona ngazi pa cikotamo no pamativi maviri o musuvo,* Jehovha anozosiya nyumba jenyu. Aazotenderi kuti dambujiko ro rufu ringhwine mumba mwenyu.
24 “Ceukijanyi ciitiko ici kuti cive mutemo wo kwenda no kwenda komuri no vana venyu.
25 Pamunozonghwina mu nyika yo munozopuwa ndi Jehovha inga zvaakananga, munodikana kuceukija ciitiko ici.
26 Vana venyu pavanozomuvhunjisa kuti: ‘Ciitiko ici cinoda kurevenyi komuri?’
27 Imwimwi munozovavhunja kudari: ‘Uwu ndiwona mupiro wo Phasika wotinoitira Jehovha, wakaregeraya kuviisa dambujiko ku nyumba jo Vaiziraeri mu nyika yo Ejipita paakatambuja Vaejipita, asi wakasiya nyumba jedu.’”
Perapo, vandhu vakagwadama vosikimara.*
28 Ngo kudaro, Vaiziraeri vakapinda, voita mukuzwirana no zvakavhunjwaya Mosi na Aroni ndi Jehovha. Ivona vakaita kudaro kamare.
29 Pakati po usiku, Jehovha wakauraya matangwe ese o mu nyika yo Ejipita. Kuvhira ku dangwe ra mambo Faro mbhera ku dangwe ro musungwi wainga mukadheya no matangwe ese o zvinyama.
30 Faro wakamuka usikuhwo no vashandiri vake no Vaejipita vese. Vaejipita vakatanga kucema* maningi. Ngokuti apana muzi wainga ucikana mundhu wakafa.
31 Ngo kukasika, iyena wakadanija Mosi na Aroni usikuhwo, wovavhunja kuti: “Mukanyi! Budanyi pakati po vandhu vangu, imwimwi no Vaiziraeri. Endanyi koshandira Jehovha inga zvomakanangaya.
32 Toranyizve mavhuta enyu no n’gombe jenyu mupinde, inga zvomakanangaya. Asi ndikomborerenyivo.”
33 Vaejipita vaivangirija vandhu kuti vabude ngo kukasika munyikemo, ngokuti vainanga kuti: “Kunasa kunanga, itusu tese tatopera kufa!”
34 Ngo kudaro, vandhu vakatora upfu hwavo hwakakanywa hwo kuita ndihwona pau hucito hwadihwa mbijo no zvokukanya ndizvona pau, vakazvipukutira pa nguvo, vozvidira pamapfuji.*
35 Vaiziraeri vakaita zvovakavhunjwa ndi Mosi, vokumbira Vaejipita zviro zvakaitwa ngo sirivha, ngo goridhi no nguvo.
36 Jehovha wakaita kuti vandhu vaitihwe unyasha ngo Vaejipita. Ngo kudaro, ivona vaivapa zvese zvovaivakumbira, ivona votuta zviro zvo Vaejipita.
37 Perapo Vaiziraeri vakavha Raamisesi voenda Sukoti. Vanarume vaifamba ngo soka, vanokwana kuita 600.000, ticikaverengi vana vadoko.
38 Cikwata co vandhu vakasiyana-siyana* cakaendavo navo, kubatanijavo no mavhuta no n’gombe jakawanda.
39 Ivona vakatanga kuita pau jicina mbijo ngo upfu hwakakanywa hwo vakatoraya mu Ejipita. Ijona ajicaenga no mbijo, ngokuti vakagogomehwa ngo civhumbu mu Ejipita, vokonehwa kunasirira zvovaizofamba vaciha.
40 Vaiziraeri vakagara mu nyika yo Ejipita makore anokwana kuita 430.
41 Pa njiku yakapera makore anokwana kuita 430, mbungano ya* Jehovha yakabuda mu nyika yo Ejipita.
42 Uhu ndihwona usiku hwavanozoceukija kubudiswa kovakaitwa ndi Jehovha kuvha mu nyika yo Ejipita. Usiku uhu, hunozoceukijwa ngo vandhu vese vo Vaiziraeri ku mubarihwana wavo wese vecikuja Jehovha.
43 Perapo, Jehovha wakavhunja Mosi na Aroni kuti: “Mutemo wo Phasika nga uwu: Akuna mundhu wo nyikanja anodikana kuiha.
44 Kudari mundhu ari wese akava no mushandiri wake waakatenga ngo mare, anodikana kumusoka.* Akazopera kusokwa* angahavo Phasika.
45 Mundhu wakavha ku nyika imweni woviya kogara munyikemo no mundhu wakazira muphakamiso, avadikani kuiha.
46 Nyama iyi inodikana kuhiwa ngo vandhu vo pamuzi umwe basi. Amudikani kutora nyama yo kuvha ku muzi umweni, nee amudikanizve kugura maphondo ayo.
47 Mbungano yese yo Vaiziraeri inodikana kuceukija Phasika iyi.
48 Kudari munyikanja ari wese ari pakati penyu, wodavo kuceukija Phasika iyi inoitihwari Jehovha, mwanarume wese anodikana kusokwa.* Akapera kusokwa,* angakhwedera kuti aihevo, iyena anozoita inga mundhu wakabarihwa munyikemo. Asi akuna mwanarume acikazivi kusokwa* anodikana kuiha.
49 Mutemo umwe uwu, unozoshanda ku vandhu vakabarihwa munyikemo no vonyikanja vari pakati penyu.”
50 Ngo kudaro, Vaiziraeri vakaita zvakavhunjwa Mosi na Aroni ndi Jehovha. Ivona vakaita kudaro kamare.
51 Pa njiku yondhoyo kamare, Jehovha wakabudisa Vaiziraeri mu nyika yo Ejipita no mbungano yavo.*
Masoko o Pasi
^ Kana: “voizoja kutenderekera musuvo wese wo.”
^ Kana: “matumbu.”
^ Kana: “moizoja kutenderekera musuvowo wese.”
^ Kana: “ngazi kutenderekera musuvowo wese.”
^ Kana: “vokhodomara.”
^ Kana: “kurira.”
^ Kana: “pamakhaja.”
^ Kana kuti, cikwata co vandhu vacaingepi Vaiziraeri, kubatanijavo no Vaejipita.
^ Gama ngo Gama: “zvikwata zvo masoca a.”
^ Kana: “kumuceka suna.”
^ Kana: “kucekwa suna.”
^ Kana: “kucekwa suna.”
^ Kana: “kucekwa suna.”
^ Kana: “kucekwa suna.”
^ Kana: “no zvikwata zvo masoca avo.”
