Ekisodho 13:1-22
13 Jehovha wakavhunjazve Mosi kudari:
2 “Ndisanirei matangwe ese o rume anobahwa pakati po va Iziraeri. Matangwe ese ngo angu. Kuvhira ku matangwe o vandhu no o zvinyama.”
3 Perapo Mosi wakavhunja vandhu kudari: “Imwimwi munodikana kuzoceukija njiku iyi yamabudiswari mu Ejipita mwamainga mu uranda. Jehovha washandisa simba rake kuti amubudise mu Ejipita. Ngo kudaro, amudikani kuha ciri cese cino mbijo.
4 Imwimwi muri kubudiswa nyamasi mu mweji wa Abhibhi.*
5 Mwari wakagondesa majibaba enyu kuvapekeja nyika yaigahwa ngo Vakhanani, Vahiti, Vaamori, Vahivhi, no Vajebhusi. Nyika iyi, inopopoma mukaka* no uci. Jehovha anozomunghwinisa mu nyika iyi. Munodikana kuita ciceukijo ici mu mweji wa Abhibhi.
6 Imwimwi munozoha pau jicina mbijo mukati mo njiku nomwe. Asi pa njiku yo cinomwe, inozova njiku yo mutambo wo kukuja Jehovha.
7 Pau jicina mbijo jinodikana kuhiwa mukati mo njiku nomwe. Asi apana ciro cino mbijo cinodikana kuwanika pakati penyu. Nee mbijo aivhiri kuwanika pakati penyu kutenderera nyika yenyuyo yese.
8 Imwimwi munodikana kuvhunja vana venyu kudari: ‘Inini ndiri kuita izvi ngo ndava yo zvatakaitihwa ndi Jehovha paakatibudisa kuvha ku Ejipita.’
9 Mutambo uwu unozoshanda inga citatijo munyara jenyu. Inga ciceukijo pa huma yenyu. Kuti mutemo wa Jehovha uve pa muromo penyu. Ngokuti Jehovha wakamubudisa kuvha mu Ejipita ngo simba rake guru.
10 Pa gore ngo gore, imwimwi munodikana kuceukija mutambo uwu pa nguva kwayo.
11 “Jehovha paanozomunghwinisa mu nyika yo Vakhanani yaakapikaya kuti waizomupekeja no kupekejavo majibaba enyu,
12 imwimwi munodikana kusanira Jehovha matangwe ese orume no matangwe ese o zvinyama zvamakawana. Izvona ngo zva Jehovha.
13 Munodikana kuripira dangwe riri rese ro mbongoyo. Munodikana kuriripira mecishandisa vhuta kuti rigare pa ndau yo mbongoyo. Kudari mukatama kuita mupiro wo vhuta, munodikana kugura musipa wo mbongoyo. Vana vese vo dangwe, vorume, vari pa mbhuri yenyu, vanodikana kuripihwavo.
14 “Kudari mwana wenyu akavhunjisa kuti: ‘Zviri kuda kunangenyi izvi?’ Imwimwi munodikana kumudavira kudari: ‘Jehovha ecishandisa simba rake, iyena wakatibudisa kuvha mu Ejipita, kwatainga mu uranda.
15 Faro paakatindivarisa mwoyo wake wotama kutipindisa, Jehovha wakauraya matangwe ese mu nyika yo Ejipita. Kuvhira ku matangwe o vandhu no matangwe o zvinyama. Ndizvona zviri kutiitisa kuti tipire Jehovha matangwe ese orume. Tinopirazve matangwe ese o vana vedu.’
16 Ici cinodikana kuva citatijo munyara menyu no pahuma penyu. Ngokuti ngo simba ra Jehovha takabudiswa kuvha mu Ejipita.”
17 Faro paakapindisa Vaiziraeri, Mwari aazivi kuvaendesa ngo ku nyika yo Vafiristi pikija kuti kwainga kuri phedo. Ngokuti Mwari wakarangarira kuti: “Vaiziraeri vangazocinja mwoyo yavo pavanozosongana no hondo, vorangarira kuhwirirazve ku Ejipita.”
18 Ngo kudaro, Mwari wakaitisa kuti Vaiziraeri vapote ngo gwanja rinopinda ngo muzvipare zviri mu mbhiripiri mo Jombe ro Kupsuka. Asi Vaiziraeri vainga vakarongeka inga zvikwata zvo hondo pavakabuda mu nyika yo Ejipita.
19 Mosi wakatora maphondo a Josefa ngokuti Josefa wakaitisa kuti Vaiziraeri vapike kwaari eciti: “Zvokadi kamare Mwari anozomubesera. Iyena paanozomubesera kuti mubude munyika ino, toranyi maphondo angu mupinde nawo.”
20 Ivona vakabuda mu Sukoti voenda kozorora ku Ethami mumbhiripiri mo zvipare.
21 Jehovha waitungamira kumbeji kwavo. Comasikati waishandisa gore kuti avatungamirire. Cousiku waishandisa murazvu wo muriro kuti uvavhenekere. Ngo kudaro, ivona vaikwanisa kufamba usiku no masikati.
22 Gore iri, aricaibudepi pambeji pavo comasikati. Nee murazvu wo muriro aucaibudepi pambeji pavo cousiku.
