Ekisodho 14:1-31
14 Perapo Jehovha wakavhunja Mosi kuti:
2 “Vhunjai Vaiziraeri kuti vanodikana kuhwirira sure vaende kodira akampamento javo pamberi po Pihairoti, pakati po Migidhori no jombe, vakasota Bhaari-zefoni. Vanodikana kuimisa akampamento javo mumbhiripiri mo jombe, vakasota Bhaari-zefoni.
3 Perapo, Faro anozonanga ngo pamusoro po Vaiziraeri kuti: ‘Vari kupepa no nyika. Vafungihwa mu zvipare.’
4 Ndinozotendera kuti mwoyo wa Faro utindivare. Iyena anozovatevera. Inini ndinozokujwa ngo pamusoro pa Faro no cikwata cake co masoca. Vaejipita vanozoziva kuti inini ndini Jehovha.” Ngo kudaro, Vaiziraeri vakaita zvondhozvo.
5 Pakufamba ko nguva, mambo wo Ejipita wakavhunjwa kuti vandhu vaya vatiza. Ngo kukasika Faro no vashandiri vake, vakacinja murangariro wavo ngo pamusoro po vandhu ava, vonanga kuti: “Ngenyi takaita izvi, toregera Vaiziraeri, varanda vedu vecipinda?”
6 Ngo kudaro, iyena wakanasirira ngoro* jake jo hondo, wotora vandhu vake wopinda navo.
7 Iyena wakatora 600 o ngoro* jakanakisisa jo hondo no ngoro jimweni jo Ejipita. Ngoro imwe na imwe yainga no masoca.
8 Jehovha wakatendera kuti mwoyo wa Faro, mambo wo Ejipita utindivare. Iyena wakatevera Vaiziraeri, kuveni Vaiziraeri vaipinda vacikathyi.
9 Vaiziraeri pavainga vakazorora mumbhiripiri mo jombe phedo no Pihairoti vakasotana no Bhaari-zefoni, Faro no ngoro* jake jo hondo, no vapakiri vo haci no cikwata co masoca ake, vaienderera mberi vecivatevera, vecikhwedera phedo navo.
10 Faro paakakhwedera, Vaiziraeri vakavona Vaejipita vecivatevera, Vaiziraeri vakatanga kuthya no kukhuwira* Jehovha.
11 Ivona vakavhunja Mosi kuti: “Wakatibudisirenyi mu nyika yo Ejipita kuti tiviye kuzofira muzvipare muno? Kureva kuti kondhono kwainga kucina makuva? Watibudisirenyi mu nyika yo Ejipita?
12 Andizvopi zvataikuvhunjaya izvi, potainangaya kudari: ‘Tisiyei tishandire Vaejipita’? Ngokuti zviri nane kwatiri kushandira Vaejipita kuciripi kufira muzvipare muno.”
13 Perapo, Mosi wakavhunja vandhu kuti: “Mucathya. Ivanyi makavanga, muvone kuponeswa kwamuri kuda kuithwa ndi Jehovha nyamasi. Ngokuti Vaejipita vamuri kuvonari nyamasi, amucazovavonizve.
14 Jehovha ndiyena anozohwa kuciripi imwimwi. Imwimwi munozogara makanyararisa.”
15 Jehovha wakavhunja Mosi kuti: “Uri kukhuwenyi?* Vhunjai Vaiziraeri kuti vapinde.
16 Asi iwewe musai ndonga iri mu nyara mwakomo, panyezuru po jombe kuti uriparajanise, kuti Vaiziraeri vapinde ngo pakati po jombe pakaoma.
17 Inini ndinozotendera kuti mwoyo wo Vaejipita utindivare, kuti ivona vavatevere mujombemo. Inini ndinozojikuja ngo ndava ya Faro, no cikwata cake cese co masoca, no ngoro* jake jese jo hondo no vapakiri vake vo haci.
18 Vaejipita vanozoziva kuti ndini Jehovha, ndinozozvikuja ngo ndava ya Faro, no ngoro* jake jo hondo no vapakiri vake vo haci.”
19 Ngirozi ya Mwari wo cokwadi, yainga ngo kumbeji ko Vaiziraeri, yakaenda ngo sure kwavo. Gore raingaya ngo kumbeji kwavo rakaendavo sure kwavo, rogara ngo sure kwavo.
20 Ngo kudaro, gore riya rakava pakati po mbungano yo Vaejipita no mbungano yo Vaiziraeri. Sure kwaro raiitisa cidima cakakura. Kumbeji kwaro raivhenekera. Ngo kudaro, mbungano imwe aizivi kukhwedera ku mbungano imweni.
21 Mosi wakamusa mukono wake panyezuru po jombe, Jehovha wofundurusa* kumwa yo jombe riya ngo mbhepo yo kumavhazuva usikuhwo hwese, woita kuti kumwa yo mujombemo iparajane, mova no pasi pakaoma.
22 Ngo kudaro, Vaiziraeri vakapinda ngo pakati po jombe rakaoma, kuveni kumwa yaiita biravira ku mukono muho no ku mukono boshwe.
23 Vaejipita vakavatevera. Haci jese ja Faro, ngoro jake jo hondo no vapakiri vake vo haci vakavatevera mbhera pakati po jombe.
24 Pa maambakueja,* Jehovha wakasota mbungano yo Vaiziraeri ari pakati po murazvu wo muriro no gore. Iyena wakaita kuti Vaejipita vadhiringane.
25 Iyena waifunungura marodha o ngoro* javo kuti atame kufamba ushoni. Vaejipita vainanga kuti: “Ngatitize Vaiziraeri ngokuti Jehovha ari kuhwa na itusu pa ndau pavo.”
26 Perapo Jehovha wakavhunja Mosi kuti: “Musai mukono wako panyezuru po jombe kuti kumwa ifukije Vaejipita, no ngoro* javo jo hondo no haci.”
27 Mosi wakamusa mukono wake ngo kukasika panyezuru po jombe. Kunja no kwaeja, jombe rakaviyazve kova magariro oraiita. Vaejipita povaitiza, Jehovha wakavauraira pakati po jombe.
28 Kumwa iya yakafukija ngoro* javo jo hondo, no vapakiri vo haci no cikwata cese co masoca a Faro akateveraya Vaiziraeri. Apana na umwe wavo wakapona.
29 Asi Vaiziraeri vakafamba pakati po jombe rakaoma. Kumwa, yainga yakaita biravira ku mukono wavo wo muho no mukono boshwe.
30 Ngo kudaro, Jehovha wakaponesa Vaiziraeri mu nyara jo Vaejipita pa njiku iyi. Vaiziraeri vakavona Vaejipita vakafa mumbhiripiri mo jombe.
31 Vaiziraeri vakavona kukura ko simba rakashandiswa ndi Jehovha kuti ahwisane no Vaejipita. Vandhu vakatanga kuthya Jehovha no kutenda Jehovha no mushandiri wake Mosi.
Masoko o Pasi
^ Kareta.
^ Kareta.
^ Kareta.
^ Kumima kuna.
^ Kumimenyi.
^ Kareta.
^ Kareta.
^ Woreesa.
^ Kana kuti, nguva jinokwana kuita 2 mbhera 6 jomangwanani.
^ Kareta.
^ Kareta.
^ Kareta.
