Ekisodho 15:1-27
15 Pa nguva yondhoyo, Mosi no Vaiziraeri, vakaimbira Jehovha ndumbo iyi:
“Ndinoimbira Jehovha ngokuti nduma yake yaguma kwese.
Iyena wakauraya haci no vapakiri vajo mu jombe.
2 Kuvanga kwangu no simba rangu zvinovha ka Jehovha.* Ngokuti iyena wakandiponesa.
Uwu ndiyena Mwari wangu. Inini ndinozomusimba. Mwari wo majicekuru angu! Inini ndinozomukuja.
3 Jehovha ndiyena musoca wakavanga. Jehovha ndirona zina rake.
4 Mwari wakauraya ngoro* ja Faro no masoca ake mu jombe.Mwari wakandondomeja masoca ake aaithemba mu Jombe ro Kupsuka.
5 Mavimbi akavafukija. Ivona vakandondomera inga mapuwe.
6 Jehovha! Mukono wenyu wo muho uno simba rakakura;Jehovha! Mukono wenyu wo muho unopeja vavengi.
7 Ngo ukuru hwenyu, munowisira pasi vaya vanomupandukira;Munoviisa ushungu hwenyu hunobwaka, ihwona hunovapeja inga mauswa.
8 Kumwa yakaungana pondhopo ngo kufema ko miro jenyu;Kumwa yakawanda yakaita biravira;Kumwa yakawanda yakaungana pakati po jombe.
9 Muvengi wakati: ‘Ndinozovatevera ndovabata! Ndinozovatorera zviro zvavo zvese!
Ndinozotora zviro zvese zvandinoda!
Ndinozovhomora banga rangu! Nyara yangu inozovanyisa!’
10 Makafurija* ngo mwiha wenyu, jombe rovafukija;Vakandondomera inga mutovhe, mukumwa yakawanda.
11 Jehovha! Ndi mwari wapi wakaezana na imwimwi? Ndiyani wakaezana na imwimwi mu uceni hwenyu?
Imwimwi munofanera kureremejwa ngo ndumbo jo kusimba. Imwimwi munoita zviro zvinoshamaisa.
12 Makamusa mukono wenyu wo muho, nyika yovamija.
13 Ngo rudo hucikacinji, mwakaseseja vandhu venyu;Ngo simba renyu, mwakavatungamirira kwenda ku ndau yenyu yakacena yovaidikana kugara.
14 Vandhu vanozozwa votetemera;Vandhu vo Firistiya vanozohwajihwa maningi.
15 Pamukuvo wondhowo, vatungamiriri vo Edhomi, vanozothya.Vatongi vano simba vo Mowabhi vanozotetemera.
Vese vanogara Khanani vanozosvipa mwoyo.
16 Ivona vanozozara ngo kuthya no kutetemera.
Jehovha! Ngo pamusoro po simba renyu, ivona avazocakanuki inga buwe.Mbhera vandhu venyu vapinde ngo mundharaundha javo.Mbhera vandhu venyu vomakaita vakhirire.
17 Jehovha! Imwimwi munozovatora movasima pa dundhu ro ndhaka yenyu.Jehovha! Iyi i ndau yomakanasirira kuti igahwe.Ndau yakacenesesa yakaimiswa ngo nyara jenyu.
18 Jehovha anozotonga mukuvo ucikaperi, kwenda no kwenda.
19 Haci no ngoro* jo hondo ja Faro no vapakiri vajo, vakangwhina mu jombe.Jehovha wakaita kuti kumwa yo mujombe ibatanezve, yoboboja vese.Asi Vaiziraeri vakafamba pakati po jombe rakaoma.”
20 Ngo kudaro, Mariyamu muporofita wokaji, hambzaji ya Aroni, wakatora cingoma, no vanakaji vese vakatoravo zvingoma vomutevera vecirija no kutamba.
21 Mariyamu waitetemba ecidavira vanarume kuti:
“Imbiranyi Jehovha ngokuti iyena wakakujwa maningi.
Wakakhandira mujombe haci no vapakiri vajo.”
22 Pakufamba ko nguva, Mosi wakabudisa Vaiziraeri kuvha mu Jombe ro Kupsuka vopinda muzvipare zvo Shuri, vopeja njiku ndhatu vecifamba muzvipare. Asi avazivi kuwana kumwa.
23 Vakaguma ku ndau yaidanijwa Mara.* Asi avazivi kukwanisa kumwa kumwa yo Mara ngokuti yaivava. Ndizvona zvakaitisa kuti iyena adanije ndauyo kuti Mara.
24 Ngo kudaro, vandhu vakatanga kun’gun’gutira Mosi veciti: “Tinozomwenyi?”
25 Iyena wakadeketerera Jehovha. Jehovha wakamukhombija muti mudoko. Mosi paakavhita* mutiwo woukhandira mukumwa, kumweyo yakatapira.
Mwari wakaita kuti ici cive cijijo no mutemo. Perapo, wakavaeja kuti avone kuti vaizozviita kana kuti haiwa.
26 Mwari wakati: “Kudari imwimwi mukanasa kuzwa izwi rangu, inini Jehovha, Mwari wenyu, moita zvakanaka pamberi pangu no kuita mukuzwirana no zvinonanga mutemo jangu no ndhungamiriro jangu, andizomuviisiri ndhendha jondakaviisira Vaejipita, ngokuti inini Jehovha ndinomurapa.”
27 Perapo, ivona vakaguma ku ndau inodanijwa Erimi, kwainga no mwimbo* jinokwana kuita 12 no 70 o mucindu. Ngo kudaro, ivona vakagara pa ndauyo phedo no kumwa.
Masoko o Pasi
^ Gama ngo Gama: “Jah.” Jah izina ro kugurisira ra Jehovha.
^ Kareta.
^ Makafutija.
^ Kareta.
^ Zina iri rinoreva kuti “Kuvava.”
^ Paakabzura.
^ Kana: “no madima; no masime.”
