Ekisodho 16:1-36
16 Pavakavha ku Erimi, mbungano yese yo Vaiziraeri yakazoguma ku Sini, mu njiku yoci 15 yo mweji wo cipiri pa sure po kuvha ku nyika yo Ejipita. Sini, inowanika pakati po Erimi no Sinai.
2 Mbungano yese yo Vaiziraeri, yakatanga ku n’gun’gutira Mosi na Aroni mu zvipare.
3 Vaiziraeri vaivavhunja kudari: “Zvainga zviri nane kudari Jehovha wakatotiuraira hake ku nyika yo Ejipita, kwatainga takagara hedu teciha saja no nyama teciguta. Asi imwimwi makativiisa mu zvipare muno kuti tife ngo njara.”
4 Jehovha wakavhunja Mosi kudari: “Ndiri kuda kunisa zvokuha. Mundhu umwe na umwe anodikana kuunganija mutengo waanodikana kuha njiku ngo njiku. Ngo kudaro, ndinozovadira pa muejo kuti ndivone kuti ivona vanozozwira mutemo jangu kana kuti haiwa.
5 Mu njiku yo citandhatu, pavanonga vecinasirira zvavaunganija, izvona zvinodikana kuita mutengo wo zvavanodikana kuha pa njiku mbiri.”
6 Mosi na Aroni vakavhunja Vaiziraeri vese kudari: “Usiku huno imwimwi munozonasa kuziva kamare kuti ndi Jehovha wakamubudisa mu nyika yo Ejipita.
7 Comangwanani imwimwi munozovona kun’ganikira kwa Jehovha. Ngokuti Jehovha wakazwa kun’gun’guta kwamaimuitira. Tiri ani itusu kuti mutin’gun’gutire?”
8 Asi Mosi wakaenderera mberi ecinanga kudari: “Jehovha paanozomupa nyama co usiku, no zvokuha comangwanani, kuti mugute, imwimwi munozovona kuti Jehovha wakazwa kun’gun’guta kwamakamuitira. Tiri ani itusu? Imwimwi amucain’gun’gutirepi itusu. Asi main’gun’gutira Jehovha.”
9 Tevere, Mosi wakavhunja Aroni kuti: “Vhunjai mbungano yese yo Vaiziraeri kudari: ‘Khwederanyi phedo na Jehovha, ngokuti iyena wazwa kun’gun’guta kwenyu.’”
10 Aroni paakandovereketa, mbungano yese yo Vaiziraeri yakasika, yosota mu zvipare. Ivona vakavona kun’ganikira kwa Jehovha kweciviya mu makore.
11 Jehovha wakavhunjazve Mosi kudari:
12 “Inini ndazwa kun’gun’guta ko Vaiziraeri. Vavhunjei kudari: ‘Zuva parinonga rovira imwimwi munozoha nyama. Comangwanani munozoguta ngo zvokuha. Munozonasa kuziva kamare kuti inini ndini Jehovha, Mwari wenyu.’”
13 Ngo kudaro, cousiku zvibhathya zvakaviya zvofukija akampamentoyo yese. Comangwanani, veto rakafukija mu akampamento mwese.
14 Muzvipare makasara muno zviro zvakacena zvinobemuka, zvakatojana no cando.
15 Vaiziraeri pavakazvivona, vakatanga kuvhunjisana veciti: “Zvicinyi izvi?” Ngokuti ivona avacaizvizivepi kuti zvainga zvicinyi. Mosi wakavavhunja kudari: “Izvi izviro zvokuha zvamuri kupuwa ndi Jehovha kuti muhe.
16 Jehovha wainga akananga kudari: ‘Umwe na umwe wenyu anodikana kubojera mutengo waanodikana kuha. Mundhu umwe na umwe anodikana kubojera mutengo wo gomeri* rimwe; mutengo wo vandhu vari mu tende yake.’”
17 Vaiziraeri vakatanga kuita zvondhozvo. Vakatanga kuzvibojera. Vamweni vakabojera zvakawanda, vamweni vobojera zvishoma.
18 Pavakazvipima ngo gomeri rimwe, wiyana waingaya abojera zvakawanda, azvizivi kusara. Waingaya abojera zvishoma azvizivi kumucotera. Ivona vakabojera mutengo wavaidikana kuha.
19 Tevere Mosi wakavavhunja kudari: “Akuna mundhu anodikana kuzviviga kuti azozvihe mangwana.”
20 Asi ivona avazivi kuita zvakananga Mosi. Vamweni pavakaviga zvimweni mbhera mangwana, izvona zvakabuda honye, zvonuha. Ngo kudaro, Mosi wakanyangajwa maningi ngo pamusoro pavo.
21 Ivona vaizvibojera mangwanani ese. Umwe na umwe waibojera mutengo waaidikana kuha. Zuva paraibuda izvona zvainyunguruka.
22 Mu njiku yo citandhatu, ivona vakabojera mutengo wakapethwa ruviri. Magomeri maviri kada mundhu. Ngo kudaro, madhodha o mbungano yo Vaiziraeri, akaenda koozvivhunja Mosi.
23 Iyena wakavavhunja kudari: “Jehovha wananga kudari: ‘Mangwana i njiku yo kuzorora* kamare, Sabudu ra Jehovha. Itanyi pau zvamunoda kuita pau. Bikanyi zvamunoda kubika. Zviri zvese zvinosara, zvivigenyi mbhera mangwana.’”
24 Ivona vakazviviga mbhera mangwana inga zvaingaya zvakananga Mosi. Pikija zvakadaro, izvona azvizivi kunuha, nee kubuda honye.
25 Perapo Mosi wakati: “Zvihenyi nyamasi. Ngokuti nyamasi i Sabudu ra Jehovha. Nyamasi azvizombhweri kunjeyo.
26 Imwimwi munozozvibojera mukati mo njiku ndhandhatu. Asi munjiku yo cinomwe, ngo Musabudu, izvona azvizowaniki.”
27 Pikija zvakadaro, vandhu vamweni vakaenda kozvipsaka ngo Musabudu, asi apana cavakawana.
28 Ngo kudaro, Jehovha wakavhunja Mosi kudari: “Imwimwi munozoramba kuzwira mupango jangu no mutemo jangu mbhera rini?
29 Vonanyi kuti Jehovha wakamupekeja njiku yo Sabudu. Ndizvona zvakamuitisa kuti mu njiku yo citandhatu iyena amupekeje zvokuha zvo mutengo wo njiku mbiri. Mu njiku yo cinomwe, mundhu umwe na umwe aavhiri kubuda paariwaro. Ngaagare ari pondhopo.”
30 Ngo kudaro, vandhu vakazorora ngo Musabudu, mu njiku yocinomwe.
31 Vaiziraeri vakazvidaninja kuti “manaa.”* Izvona zvaiita inga zvimbeu zvidoko, zvakacena. Izvona zvaitapira inga madosi akadihwa uci.
32 Tevere Mosi wakati: “Jehovha wananga kuti bojeranyi mutengo wo gomeri rimwe. Kuti muzvivige kuvha kumubarihwana mbhera ku mubarihwana. Kuti ivona vavone zvokuha zvandaimupekeja pandainga ndecimubudisa kuvha mu nyika yo Ejipita.”
33 Ngo kudaro, Mosi wakavhunja Aroni kudari: “Torai juvi,* urizaje ngo gomeri rimwe ro manaa. Ridirei pamberi pa Jehovha, urivige mbhera kumubarihwana yese.”
34 Aroni wakazvidira pamberi po bhokiso ro Ucapupu* kuti rivigwepo, inga zvainga zvakananga Jehovha ecivhunja Mosi.
35 Vaiziraeri vakaha manaa mukati mo 40 o makore mbhera vagume ku nyika yainga no vandhu. Ivona vakaha manaa mbhera vagume pa muganwa wo nyika yo Khanani.
36 Gumi ro magomeri anozaja efa imwe.*
Masoko o Pasi
^ Mutengo unokwedera 2,2 ritru. Vonanyi Masoko Okuengejera B14.
^ Kana: “kuceukija sabudu.”
^ Zina iri, kangaije rinovha ku magama o Cihebheru anoreva kuti “Zvicinyi izvi?”
^ Vonanyi Kudurujihwa ko Magama.
^ Mubokiso umu maivigwa maphepha anosisira.
^ Efa imwe inongwina ritru jinokwana kuita 22. Vonanyi Masoko Okuengejera B14.
