Ekisodho 17:1-16
17 Mbungano yo Vaiziraeri yakavha ku zvipare zvo Sini yecifamba padoko-padoko mukuzwirana no zvainanga Jehovha, voenda koimisa akampamento javo ku Refidhimi. Asi kondhoyo kwainga kucina kumwa kuti vandhu vamwe.
2 Ngo kudaro, vandhu vakavereketera Mosi veciti: “Tipei kumwa kuti timwe.” Mosi wakavadavira eciti: “Ngenyi munondivereketera? Ngenyi munoeja Jehovha?”
3 Asi vandhu vaifa maningi ngo nyota, ivona vaindon’gun’gutira Mosi veciti: “Wakatibudisirenyi mu nyika yo Ejipita? Wakatibudisa mu nyika yo Ejipita kuti utiuraye ngo nyota, itusu pomwe no vana vedu no mushambi jedu?”
4 Pakupejisira, Mosi wakakhuwira* Jehovha kudari: “Ndovaitenyi vandhu ava? Kwasara padoko basi kuti vandifure ngo mapuwe!”
5 Perapo, Jehovha wakavhunja Mosi kuti: “Endai kumbeji ko vandhu, torai vakuru vamweni vo Vaiziraeri no ndonga yowakatakaya ndiyona Murambo wa Niro. Endai wakabata ndongeyo munyara.
6 Inini ndinozova pamberi pako, pa buwe rinowanika mu ndharaundha yo Horebhi. Iwewe unodikana kutaka buwero, irona rinozobuda kumwa, vandhu vanozoimwa.” Mosi wakazviita pamberi po vakuru vo Vaiziraeri.
7 Ngo kudaro, iyena wakadura ndauyo kuti Masa* no Meribha,* ngo ndava yo kuvereketesana kwakaita Vaiziraeri. Ngokuti vakaeja Jehovha ngo kunanga kuti: “Jehovha ari pakati pedu kana aaripi pakati pedu?”
8 Perapo, Vaamareki vakaviya kuzoita hondo no Vaiziraeri mu Refidhimi.
9 Mosi wakavhunja Joshuwa kuti: “Ndisanirei vandhu kuti vaende koita hondo no Vaamareki. Mangwana inini ndinozoima panyezuru po dundhu ndakabata ndonga ya Mwari wo cokwadi mu nyara yangu.”
10 Perapo, Joshuwa wakaita mukuzwirana no zvaakavhunjwa ndi Mosi. Iyena wakahwisana no Vaamareki. Mosi na Aroni na Huri vakakhwira pa nyezuru po dundhu.
11 Mosi paaigara akamusa mukono jake, Vaiziraeri vainyisa. Asi paaitereja mukono jake, Vaamareki vainyisa.
12 Mukono ja Mosi pojakashasha, vakatora buwe voridira pasi, vomugajikepo. Aroni na Huri vakabatirira mukono jake, kuti jigare jakamuswa mbhera kuvira ko zuva, umwe ngo divi rimwe umweni ngo divi rimweni.
13 Ngo kudaro, Joshuwa wakanyisa Amareki no vandhu vake ngo banga.
14 Jehovha wakavhunja Mosi kuti: “Tarai izvi mu bhuku kuti zvizoceukijwe no kuzvivhunjavo Joshuwa kuti ‘ndinozopeja Vaamareki pasi pano, vozotamazve kuceukijwa.’”
15 Mosi wakavaka artari woidura zina rokuti Jehovha-nisi.*
16 Eciti: “Ngokuti nyara yake inohwisana no cigaro co umambo ca Jehovha.* Jehovha anozohwisana na Amareki kuvhira kumubarihwana mbhera kumubarihwana.”
Masoko o Pasi
^ Kana: “wakamima kuna.”
^ Zina iri rinoreva kuti “Kueja; Kunesa.”
^ Zina iri rinoreva kuti “Kuvereketesana.”
^ Zina iri rinoreva kuti “Jehovha i Bandera Rangu; Jehovha ndiyena citiziro cangu.”
^ Gama ngo Gama: “Jah.” Jah, i zina ro kugurisira ra Jehovha.
