Ekisodho 18:1-27
18 Jetro mupiri wo Midhiyani, vatezvara va Mosi, vakazwa zvese zvakaitihwa Mosi no Vaiziraeri ndi Mwari, no mabudisihwe akaitihwa Vaiziraeri ndi Jehovha mu nyika yo Ejipita.
2 Jetro vatezvara va Mosi vainga vaashira Zipora mukaji wa Mosi. Mosi wainga amupindisa kanyi ka babake
3 no vana vake vaviri. Umwe wavo wakadanijwa kuti Gerishomi,* ngokuti Mosi wakati: “Ngokuti ndainga ndiri murendo mu nyika imweni.”
4 Mwana umweni wakamudanija kuti Eriyezeri* ngokuti iyena wakati: “Mwari wa baba wangu ndiyena mubeseri wangu. Wandiponesa mu banga ra Faro.”
5 Ngo kudaro, Jetro, vatezvara va Mosi, vakapinda no vana va Mosi no mukaji wake.* Vakaenda kosongana na Mosi muzvipare, paainga akagara phedo no dundhu ra Mwari wo cokwadi.
6 Ngo kudaro, iyena wakatuma vandhu kuti vaende kovhunja Mosi kudari: “Inini Jetro vatezvara vako, ndiri kuviya kosongana na iwewe. Ndino mukaji wako no vana vako vaviri.”
7 Mosi wakabuda ngo kukasika woenda kosongana naatezvara vake. Wakagwadama pasi wovabhejhari. Ivona vakacungamijana, perapo vonghwina mu tende.
8 Mosi wakavhunja vatezvara vake zvese zvakaitihwa Faro no nyika yo Ejipita ndi Jehovha ngo ndava yo Vaiziraeri. No kumuvhunja matambujiko ese ovakasongana nao mu gwanja no kuponeswa kovakaitwa ndi Jehovha.
9 Jetro wakadakara ngo zviro zvese zvaushoni zvakaitihwa Vaiziraeri ndi Jehovha ngo kuvaponesa mu nyika yo Ejipita.
10 Perapo, Jetro wakati: “Ngaasimbhwe Jehovha wakamuponesaro mu nyika yo Ejipita no mu nyara ja Faro. Ngaasimbhwe wiya wakaponesaya vandhu kuvha muuranda mu nyika yo Ejipita.
11 Wari ndoziva kuti Jehovha wakakura kupinda zvimwari zvimweni, ngo ndava ya vaya vaijikuja pamberi po vandhu vake.”
12 Ngo kudaro, Jetro vatezvara va Mosi, vakaviisa cipo co kupiswa no mupiro kuna Mwari. Aroni no vakuru vo Vaiziraeri, vakaenda koha naatezvara va Mosi pamberi pa Mwari wo cokwadi.
13 Mu njiku yakatevera, Mosi wakagara inga zvocirovejeso kuti atonge vandhu. Vandhu vakagara pambeji pa Mosi kuvhira comangwanani mbhera comadeko.
14 Vatezvara vake povaivona zvese zvaaiitira vandhu, ivona vakamuvhunja kudari: “Zvicinyi zvauri kuitirari vandhu? Ngenyi iwewe uri kugara wega kuti utonge vandhu, kuveni vandhu vari kuimira kuvhira comangwanani mbhera comadeko?”
15 Mosi wakadavira vatezvara vake kudari: “Indava yokuti vandhu vanoviya kwandiri kuti vavhunjise Mwari.
16 Kudari pakabuda shwiro pakati po vandhu vaviri, iyona inoviya kovhunjwa inini kuti ndiitonge. Inini ndinovavhunja zvasunga Mwari wo cokwadi ngo pamusoro po shwiroyo no mutemo jake.”
17 Vatezvara va Mosi vakati: “Zvauri kuitaro azvizivi kunaka.
18 Kunasa kunanga, unozoremba iwewe no vandhu vaunavo waro. Ngokuti muthwaro uwu unorema maningi, aukwanisi kuuthwara wega.
19 Wari izwai! Ndinoda kukupekeja zano. Mwari anozova na iwewe. Iwewe, endererai mberi ucishanda inga muimiriri wo vandhu pa mberi pa Mwari wo cokwadi. Shwiro jese jiendesei ka Mwari wo cokwadi.
20 Iwewe endererai mberi wecivajijisa zvinonga zvasungwa ndi Mwari no mutemo jake no kuvazivisa gwanja rovanodikana kufamba ndirona no basa rovanodikana kuita.
21 Asi unodikana kusana pakati po vandhu, vanarume vanokwanisa, vanothya Mwari, vanothembeka, vacikadi zvokufidhihwa,* wovagaja kuti vave vatungamiriri vo 1.000, vo 100, vo 50 no vo 10.
22 Ivona vanodikana kutonga vandhu pakabuda shwiro. Vanozoviisa kwauri shwiro jese jinonesa. Asi jicikanesi, ivona vanozotonga. Pekejai vamweni basa kuti iwewe urerukihwe.
23 Kudari ukaita izvi, kana kuti, kudari Mwari akatozvitenderaro, iwewe unonga watojirerusira basa. Vandhu vese vanozopinda kanyi vakadakara.”
24 Mosi wakazwa zvakananga vatezvara vake. Ngokukasika wakaita zvese zvovakananga.
25 Mosi wakasana vanarume vanokwanisa pakati po Vaiziraeri wovagaja kuti vavonerere vandhu, kuti vave vatungamiriri wo 1.000, vo 100, vo 50 no vo 10.
26 Ngo kudaro, ivona vaitonga vandhu paibuda shwiro. Ivona vaitonga shwiro jakareruka. Shwiro jainesa vaijiendesa ka Mosi.
27 Perapo, Mosi wakaenekana naatezvara vake. Ivona vopinda kanyi kwavo.
Masoko o Pasi
^ Zina iri rinoreva kuti “Murendo Kondhono.”
^ Zvinoreva kuti “Mwari Ndiyena Mubeseri.”
^ Mukaji wa Mosi.
^ Kana: “kudyekehwa.”
