Ekisodho 19:1-25
19 Mu mweji wo citatu, Vaiziraeri pavakavha ku nyika yo Ejipita, voguma ku zvipare zvo Sinai.*
2 Ivona vakavha ku Refidhimi voguma ku zvipare zvo Sinai, vozororemo. Vaiziraeri vakagara phedo no dundhu.
3 Tevere Mosi wakakhwira pa dundhu kuti aende ka Mwari wo cokwadi. Perapo Jehovha wakabhuya naye ari ngo padundhupo eciti: “Unodikana kuvhunja vo pamuzi pa Jakobe no Vaiziraeri vese kuti:
4 ‘Imwimwi makazvivona ngo meso enyu zvandakaitira Vaejipita kuti ndimuthware ngo mapapiro* angu inga hokotora, ndomuviisa muno.
5 Wari kudari mukanasa kuzwira zvandinonanga, monasa kuita mukuzwirana no citenderano cangu, imwimwi kamare munozova vandhu vangu vanosisira* pakati po vandhu vese. Ngokuti pasi pese ngo pangu.
6 Imwimwi munozova jinja rakaceneswa no vapiri vanotonga inga majimambo kwandiri.’ Izvi, ndizvona zvaunodikana kuvhunja Vaiziraeri.”
7 Mosi wakaenda kodanija vakuru vo vandhu vese, wovavhunja zviro zvese zvaainga avhunjwa ndi Jehovha.
8 Pasure pazvo, vandhu vese vakadavira kudari: “Zviro zvese zvanangwaro ndi Jehovha, tinoda kuzviita.” Pondhopo kamare, Mosi wakaenda koovhunja Jehovha zvaingari zvadavihwa ngo vandhu.
9 Jehovha wakavhunja Mosi kudari: “Vonai! Inini ndinozokugumira mu makore akasvipa. Kuti pandinonga ndecibhuya na iwewe, ivona vazvizwevo. Ngo kudaro, vanozokutenda njiku jese.” Tevere Mosi wakavhunja Jehovha mupinguro wo Vaiziraeri.
10 Tevere Jehovha wakavhunja Mosi kudari: “Endai ku Vaiziraeri, uvacenese nyamasi na mangwana. Ivona vanodikana kupaja nguvo javo.
11 Vanodikana kugara vakanasirira mbhera mungwanuno. Ngokuti mungwanuno, Jehovha anozoviya pa dundhu ro Sinai pamberi po vandhu vese.
12 Unodikana kudirira vandhu mugano kutenderera dundhuro rese. Perapo wovavhunja kudari: ‘Ngwariranyi! Amudikani kukhwira pa dundhu iri. Nee amudikani kuribata. Ngokuti mundhu wese anozoribata, anozourawa kamare.
13 Akuna anodikana kubata mundhu ano ndava. Asi anozviita, anodikana kufuhwa kana kubaiwa ngo mupasha. Kudari cinyama kana mundhu ari wese anokhwira pa dundhu iri, anodikana kufa kamare.’ Asi kudari mbhayapaya yo nyanga yo vhuta ikarira, vangakhwira havo pa dundhupo.”
14 Mosi wakabzuka pa dundhu woenda ku Vaiziraeri, wotanga kuvacenesa. Ivona vakapaja nguvo javo.
15 Wakavhunja vandhu kudari: “Jinasirirenyi mbhera mungwanuno. Mucaita ruvatano.”
16 Mu njiku yo citatu, mbheni yakapaja no kurazva. Makore akasvipa, akafukija panyezuru po dundhu, kozika kurira ko mbhayapaya. Ngo kudaro, vandhu vese vainga vari pondhopo, vakathya maningi.
17 Mosi wakabudisa vandhu mu akampamento mavo kuti vaende ka Mwari wo cokwadi. Ivona vakaima mu ndau javo mumbhiripiri mo dundhuro.
18 Dundhu rese ro Sinai raibuda usi ngokuti Jehovha wainga ari panyezuru po dundhupo ngo pakati po muriro. Usi hwaro hwakakhwira inga usi hwo forno. Dundhuro rese rakazungunyika zvokuti izanyi muzovona.
19 Kurira ko mbhayapaya kwaiengejeka padoko nga padoko. Izvi pazvaiitika, Mosi waivereketa, Mwari wo cokwadi ecimudavira.
20 Jehovha wakaviyazve panyezuru po dundhu ro Sinai. Tevere Jehovha wakadanija Mosi kuti akhwire panyezuru po dundhupo. Ngo kudaro, Mosi wakakhwirepo.
21 Jehovha wakavhunja Mosi kudari: “Bzukai, endai kongwaja vandhu kuti vatame kukhwedera pa muganwa vecipsaka kuvona Jehovha. Ngokuti vakambhera ngo kuita kudaro, vazinji vavo vanopera kufa.
22 Vapiri vanokhwedera kuna Jehovha mukuvo wese, vanodikana kujicenesa kuti Jehovha atame kuvauraya.”
23 Mosi wakavhunja Jehovha kudari: “Vaiziraeri avakhwiri pa dundhu ro Sinai ngokuti imwimwi mapera kutingwaja kare mecinanga kudari: ‘Unodikana kudirira vandhu muganwa kutenderera dundhuro rese. Perapo ricenesei.’”
24 Ngo kudaro, Jehovha wakamudavira kudari: “Endai! Bzukai! Ukapera woviyazve na Aroni. Asi ucatendera kuti vapiri no Vaiziraeri vaviye kwandiri inini Jehovha, kuti nditame kuvauraya.”
25 Mosi wakabzuka woenda ku Vaiziraeri wovavhunja zvondhozvo.
Masoko o Pasi
^ Ku Cihebheu kunoenderera mbheri kweciti: “Munjiku yondhoyo.” Magama aya kangaije ari kuda kunangira njiku yondhoyo yavakavharo ndiyona ku Refidhimi.
^ Kana: “mapapa.”
^ Kana: “munozova upfumi hwangu hunosisira.”
