Ekisodho 2:1-25
2 Pa mukuvo uwo, mwanarume umweni waigara pamuzi pa Revhi, wakarovora mwana wa Revhi.
2 Mwanakaji wiya wakaita mimba, wobara mwana. Paakavona kuti mwana uwu wainga wakaseja* maningi, iyena wakamuviga mukati mo mweji mutatu.
3 Wakazoguma mukuvo wokuti aacaikwanisepizve kumuviga. Ngo kudaro, wakaruka cibhokiso co ndhokwe,* wocinama kunja no mukati ngo thara* no namo. Iyena wakatora mwana wiya womudira mukatimo. Perapo wakaenda kocidira pakati po njanga mu mbhiripiri mo Murambo wa Niro.
4 Asi hambzaji yake* yakaima ngo ndhambo yecida kuvona zvaida kuitika no mwanewo.
5 Mwana wokaji wa Faro paakaenda kosamba mu Murambo wa Niro, vashandiri vake vokaji vaifamba-famba ngo mumbhiripiri mo murambomo. Iyena wakavona cibhokiso cainga ciri pakati po njanga. Ngo kudaro, wakatuma mushandiri wake ngo kukasika kuti aende kocitora.
6 Paakafunungura cibhokiso ciya, wakavona cimwana cainga mukatimo, cecicema.* Iyena wakacizwira pena, wonanga kudari: “Uwu, mwana wo Vahebheru.”
7 Hambzaji yake* yakavhunja mwana wa Faro kudari: “Imwimwi mwaida kuti ndiende kopsaka mwanakaji wo Cihebheru ari kumwisa kuti aviye kuzomubesa kurera mwana uwu here?”
8 Mwana wokaji wa Faro wakamudavira kudari: “Endai!” Iyena wakaenda kodanija mai wo mwana wiya kamare.
9 Mwana wa Faro wakananga kudari: “Torai mwana uwu undibese kurera, inini ndinozokupagari.” Ngo kudaro, mwanakaji wiya wakatora mwana wiya, womurera.
10 Mwana wiya paakakura, iyena wakamutora woenda naye ku mwana wokaji wa Faro, wova mwana wake. Mwana wa Faro wakamudura zina ro kuti, Mosi,* wonanga kuti: “Indava yo kuti ndakamuvhisa mu kumwa.”
11 Mosi paakakura, wakaenda ku hama jake, kwenda koovona kushandiswa ngo simba kwavainga veciithwa. Paakasotesesa, wakavona mu Ejipita ecitaka hama yake yainga Muhebheru.
12 Iyena paakaringa-ringa, wakavona kuti painga pacina mundhu waizvivona. Ngo kudaro, wakauraya mu Ejipita wiya, womuviga mu musanga.
13 Paakaendazve mu njiku yakatevera, iyena wakavona Vahebheru vaviri vecitakana. Ngo kudaro, iyena wakavhunja wiyani waingaya ashaisha kuti: “Uri kutakirenyi mudoni wako?”
14 Ngo kudaro, iyena wakadavira kudari: “Ndiyani wakugaja kuti uite mambo no mutongi pakati pedu? Uri kudazve kundiuraya inga zvawakaitaya no Muejipita wiyani?” Mosi wakathya maningi wonanga kuti: “Zvokadi zvandakaitaya, zvakazivika kamare!”
15 Faro paakazwa ngo pamusoro pazvo, iyena wakapsaka kuuraya Mosi. Asi Mosi wakatiza pamberi pa Faro, woenda kogara ku nyika yo Midhiyani. Iyena wakagara pasi phedo no mwimbo.*
16 Mupiri wo Midhiyani wainga ano vana vanomwe. Ivona vakaenda kocera kumwa ku mwimbo* no mujiyo javo. Vaida kuzaja mujiyo iji kuti vamwise kumwa mushambi wa baba wavo.
17 Inga zvocirovejeso, vahavisi pavakaviya, vakavagogomera. Ngo kudaro, Mosi wakabesera vanakaji ava kuti vamwise mavhuta avo.
18 Ivona pavakaguma kumuzi, baba wavo Reuweri* wakakahamara eciti: “Nyamasi mazviitisa kudini kuti mukasike kuviya?”
19 Ivona vakadavira kudari: “Muejipita umweni watibesera, vahavisi pavaihwisana na itusu. Iyena waticerera kumwa yo kuti timwe no kumwisa mushambi wedu.”
20 Reuweri wakavhunja vana vake kudari: “Waro iyena ari kwapi? Mamusiirenyi? Mudanijenyi kuti aviye kuzoha na itusu.”
21 Pasure pazvo Mosi wakatendera kugara pamuzi pa Reuweri. Ngo kudaro, Reuweri wakazomupekeja mwana wake anodanijwa kuti Zipora kuti aite mukaji wake.
22 Pakufamba ko nguva, Zipora wakazobara mwana. Mosi wakamudura zina ro kuti Gerishomi.* Ngokuti wainanga kudari: “Inini ndainga ndiri murendo munyika muno.”
23 Sure ko mukuvo wakareba, mambo wo Ejipita wakafa. Asi Vaiziraeri vaienderera mberi vecigomera no kun’gun’guta ngo pamusoro po kushuphwa. Asi kucema* kwavo kwaienderera mberi kwecizika kuna Mwari wo cokwadi.
24 Mwari wakazwa kugomera kwavo. Iyena wakaceukija citenderano caakaita na Abhirahama, Izaki na Jakobe.
25 Ngo kudaro, Mwari wakavona vana vo Vaiziraeri. Iyena wakavarangarira.
Masoko o Pasi
^ Kana: “wakanyara.”
^ Kana: “nduyu.”
^ Kana: “ukapa; katarau.”
^ Kana: “hama yake yokaji.”
^ Kana: “cicirira.”
^ Kana: “hama yake yokaji.”
^ Zina iri rinoreva kuti “Kuvhiswa.” Izvi zvinoreva kuti, kuponeswa mu kumwa.
^ Kana: “dima; sime.”
^ Kana: “dima; sime.”
^ Kana kuti, Jetro.
^ Zina iri rinoreva kuti “Murendu kondhono.”
^ Kana: “kurira.”
