Ekisodho 20:1-26
20 Perapo Mwari wakananga masoko ese aya o kuti:
2 “Ndini Jehovha Mwari wako, wakakubudisaya mu nyika yo Ejipita, ku nyika yo uranda.
3 Audikani kuvazve na mwari umweni kunja kwangu.
4 “Audikani kujiitira cithombe cakavezwa, kana mukhaindi wo ciri cese cakatojana no ciri kumatenga, ciri pasi kana cakatojana no ciri mukumwa.
5 Audikani kuzvinamata nee kuzvishandira. Ngokuti inini Jehovha, Mwari wako, ndiri Mwari anoda kunamathwa ega basi. Ndinotambuja vana ngo ndava yo ushaishi hwo majibaba no mubarihwana wo citatu no wocirongomuna hwa vaya vanoramba kundishandira.
6 Asi ndinoitira rudo hucikacinji ku zviuru zvo mubarihwana wa vaya vanondida no kuita zvandinonanga.
7 “Audikani kushaisha kushandisa zina ra Jehovha, Mwari wako, ngokuti Jehovha aazoregeri kutambuja vaya vanoshaisha kushandisa zina rake.
8 “Rangarirai njiku yo Sabudu kuti igare yakacena.
9 Unozoshanda no kuita mabasa ako ese mukati mo njiku ndhandhatu.
10 Asi njiku yocinomwe ndiyona Sabudu ra Jehovha, Mwari wako. Audikani kuita basa riri rese. Nee iwewe, nee mwana wako wo rume, nee mwana wako wokaji, nee muranda wako worume, nee muranda wako wokaji, nee zvifuyo zvako nee murendu wo kuvha nyikanja nee anogara mukati mo madhorobha ako.*
11 Ngokuti Jehovha wakaita matenga, pasi pese, jombe no zvese zviri mukati mazvo, mukati mo njiku ndhandhatu, wozorora mu njiku yocinomwe. Ngo zvakaitisa kuti Jehovha akomborere njiku yo Sabudu no kuicenesa.
12 “Kujai baba wako na mai wako kuti ugare makore akawanda mu nyika yauri kupuwari ndi Jehovha, Mwari wako.
13 “Ucauraya.
14 “Ucaita upombo.
15 “Ucaba.
16 “Paunoitira ucapupu mudoni wako, ucamuitira ucapupu hwo kunyepa.
17 “Ucaemura muzi wo mudoni wako. Ucaemura mukaji wo mudoni wako, nee muranda wake wokaji, nee muranda wake worume nee n’gombe yake, nee mbongoyo yake kana ciri cese haco co mudoni wako.”
18 Vandhu vese, vakavona kupaja no kurazva ko mbheni, kurira ko mbhayapaya no usi hwaibuda pa dundhu. Pavaivona izvi, vese vakatetemera voima ngo ndhambo.
19 Ngo kudaro, vakavhunja Mosi kuti: “Iwewe vereketai na itusu, itusu tinozokupurukira. Asi ucatendera kuti Mwari averekete na itusu ngokuti tinothya kuti tingazofa.”
20 Ngo kudaro, Mosi wakavhunja vandhu kuti: “Mucathya! Ngokuti Mwari waviya kuzomueja kuti mugare mecimuthya, kuti mutame kushaisha.”
21 Ngo kudaro, vandhu vaindoima ngo ndhambo. Asi Mosi wakakhwedera ku gore rakasvipa kwaingaya na Mwari wo cokwadi.
22 Jehovha wakavhunja Mosi kudari: “Vhunjai Vaiziraeri kuti Mwari wananga kudari: ‘Mavona mega kuti inini ndabhuya na imwimwi ndiri kudenga.
23 Mucajiitira zvimwari zvo sirivha kunja kwangu nee cimwari co goridhi.
24 Munodikana kundiitira artari yo mavhu kuti mundiitirepo mupiro jenyu jo kupiswa, mupiro jenyu jo kuzwana, jo mavhuta enyu no mupiro jo n’gombe jenyu. Inini ndinozoviya kwamuri ndomukomborera mundau jese jondinozoita kuti zina rangu riceukijihwemo.
25 Kudari mukandivakira artari yo mapuwe, amudikani kuivaka ngo mapuwe akavezwa. Ngokuti kudari mukashandisa mapuwe akavezwa ngo ciri cese, munoisvipisa.
26 Amudikani kukhwira artari yangu ngo sikada ngokuti munozoitatija umitu hwenyu.’
Masoko o Pasi
^ Gama ngo Gama: “Musuvo jako.”
