Ekisodho 21:1-36
21 “Unodikana kuvavhunja mutemo iji:
2 “Kudari iwewe ukatenga muranda wo Cihebheru, iyena anodikana kukushandira makore matandhatu. Asi pa gore ro cinomwe, unodikana kumusujunura acizivi kupagari ciro.
3 Kudari akaguma ari ega, anozopinda ega. Kudari iyena ano mukaji, anozopinda no mukaji wake.
4 Kudari patarau wake akamupekeja mukaji, mukajiwo womubarira vana vorume no vokaji, paanopinda, mukaji no vana vake vanosara na patarau wake. Iyena anopinda ari ega.
5 Asi kudari muranda wiya akananga kuti: ‘Inini ndinoda patarau wangu, ndinoda mukaji wangu no vana vangu, andidi kupinda.’
6 Patarau wake anozomutora woenda naye pamberi pa Mwari wo cokwadi. Iyena anodikana kwenda naye pa musuvo womucamija pa aro, womubovora njeve ngo mundomba. Iyena anozoita muranda wake wo kwenda no kwenda.
7 “Kudari mundhu akatengesa mwana wake wokaji inga muranda, mwanewo, aazovhi kuuranda kwiya ngo njira yakafanana no inoitwa ku muranda wo rume.
8 Kudari patarau wake akatama kumudakarira no kumutora kuti aite mukaji wake umweni, anodikana kumutengesa. Asi aadikani kumutengesera vonyikanja ngokuti wamucengeja.
9 Kudari akamusana kuti arovohwe ngo mwana wake, musikane uwu anodikana kuitihwa zvinoitihwa vana vokaji vo pamuzipo kamare.
10 Kudari iyena akatora mukaji umweni, zviro zvese zvaaipekeja mukaji wokutanga, zvakadari inga zvokusimira, zvokuha no zviro zvese zvinosisira mwanakaji wakarovohwa,* azvivhiri kupunguhwa.
11 Kudari iyena akatama kuita zviro zvitatu izvi, muranda wokaji wiya anozopinda acizivi kupagari ciri cese.
12 “Mundhu anotema mudoni wake wogumira pakufa, iyena anodikanavo kuurawa.
13 Kudari iyena akazviita acikadi, kana kuti, kudari inini Mwari wo cokwadi ndikatendera kuti izvi zviitike, ndinozomupsakira ndau yokuti iyena atizireyo.
14 Kudari mwanarume akanyangajira mudoni wake wogumira pa kumuuraya ngo cabomo,* mwanarume uwu anodikana kufa nee ari pa artari, munodikana kumutora moenda komuuraya.
15 Mundhu anotaka babake na make, anodikana kuurawa.
16 “Kudari mundhu akaba mundhu umweni womutengesa, kana kuti, wowanika anaye, anofanera kuurawa.
17 “Mundhu anotuka baba wake na mai wake anodikana kuurawa.
18 “Kudari mundhu akakhuvaza mudoni wake ngo buwe kana cibhakera* asi mudoniwo wotama kufa, woenda kovata pa bonde, munodikana kuita izvi:
19 Kudari iyena akakwanisa kumuka wofamba-famba pamuzi ecishandisa mucongotero,* wiya wamukhuvaza weya, aadikani kutambujwa. Asi anozomupagari mukuvo wese waanozopeja ecihwaja mbhera wovanga.
20 “Kudari mwanarume akakhuvaza muranda wake worume kana wokaji ngo muponda, mbhera wofira mu nyara jake, mwanarumewo anodikana kutambujwa.
21 Asi kudari akatama kufa mukati mo njiku imwe basi kana mbiri, patarau wake aavhiri kutambujwa, ngokuti iyena wakamutenga ngo mare yake.
22 “Kudari vanarume vakatakana, vokhuvaza mwanakaji ano mimba, vomusvojesa* pacina ngozi imweni, wiya wakazviitaro anodikana kuripa zvese zvaanovangirijwa ngo mwamunake. Anozozviripa zvese pamberi po vatongi.
23 Asi kudari pakafa mundhu, imwimwi munodikana kuripa upenyu ngo upenyu,
24 jiso ngo jiso, zino ngo zino, nyara ngo nyara, soka ngo soka,
25 kupsa ngo kupsa, civonje ngo civonje, kukhuvazwa ngo kukhuvazwa.
26 “Kudari mundhu akakhuvaza muranda wake, worume kana wokaji, woita bofu, uranda hwake unopera ngo ndava yo jiso rake. Ngo kudaro, anodikana kumupindisa.
27 Kudari mundhu akavhisa zino ro muranda wake, wokaji kana worume, uranda hwake unoperavo ngo pamusoro po zino rake. Anodikana kumupindisa.
28 “Kudari n’gombe ikabaya mwanarume kana mwanakaji, mundhuwo wofa, n’gombeyo inodikana kufuhwa ngo mapuwe yofavo. Nyama yayo aidikani kuhiwa, asi mune wo n’gombeyo aazotambujwi.
29 Kudari n’gombe iyi yainga no mukhuva wo* kubaya vandhu, mune wayo wongwajwa ngo pamusoro pazvo, asi iyena wotama kuisungira, kudari ikabaya mwanarume kana mwanakaji wofa, n’gombe iyi inodikana kufuhwa ngo mapuwe yofa. Mune wayo anodikanavo kufa.
30 Kudari akavhunjwa kuti aripe, iyena anozobudisa zvese zvaavhunjwaro, kuti aripire upenyu hwake.
31 Asi kudari n’gombe iyi yakabaya mwana worume kana wokaji, panodikana kushandiswa mutemo wondhowo ku mune wo n’gombeyo.
32 Kudari n’gombe ikabaya muranda umweni, angava wokaji kana worume, mune wo n’gombeyo, anodikana kuripa mutengo wo 30 o mashekeri* ka patarau wo muranda wiya. Perapo, n’gombeyo inodikana kufuhwa ngo mapuwe yofa.
33 “Kudari mundhu akasiya mwimbo* wakashama, kana kuti, kudari akaca mwimbo wotama kuufushira, perapo n’gombe kana mbongoyo yowiremo,
34 mune wo mwimbo* anodikana kuripa mune wo n’gombeyo. Iyena anodikana kuripa ngo mutengo wo cinyameco. Cinyama cafaro cinozova co mune wo mwimbowo.
35 Kudari n’gombe yo mundhu ikataka n’gombe yo mundhu umweni yofa, ivona vanodikana kutengesa n’gombe iri waro penye vokovana mareyo, perapo vanodikana kukovanazve nyama yo n’gombe yafaro.
36 Asi kudari mune wo n’gombe yabayaro n’gombe imweni, ecizviziva kuti iyona ino mukhuva wondhowo,* asi aazivi kuisungira, anozoripa n’gombe ngo n’gombe. N’gombe yafaro inozova yake.
Masoko o Pasi
^ Kana kuti, kuvatana naye.
^ Kana: “cakwenye.”
^ Kana: “soko.”
^ Mucongoti.
^ Kana: “vomurashisa.”
^ Kana: “iyi yaiita basa ro.”
^ Shekeri imwe yairema 11,4 g. Vonanyi Masoko Okuengejera B14.
^ Kana: “dima; sime.”
^ Kana: “dima; sime.”
^ Kana: “iyona i basa rayo.”
