Ekisodho 22:1-31
22 “Kudari mundhu akaba n’gombe kana vhuta wozviuraya kana kuzvitengesa, iyena anodikana kuripa n’gombe imwe ngo n’gombe shanu, woripa vhuta rimwe ngo mavhuta marongomuna.
2 (“Kudari mbavha ikabatika yeciphwanya musuvo yotakwa mbhera yofa, waitakaro aana ndava yo sangi.
3 Asi kudari zvikaitika zuva rabuda, wamuurayaro ano ndava yo sangi.)
“Mbavheyo inodikana kuripa. Kudari acina caanaco, anodikana kujitengesa kuti aripe zviro zvaabaro.
4 Kudari zvaakabaro akawanika anazvo zviri penye, dangani i n’gombe, dangani i mbongoyo, dangani i vhuta, iyena anodikana kuzviripa zviviri kada cinyama.
5 “Kudari mundhu akatora mushambi wake, woenda kouhavisa asi wouregera wecihava kumahavo kana ku munda wo muuvha wo mundhu umweni, anodikana kuripa ngo mahavo ake kamare. Munda wo muuvha uwu no mahavo aya, zvinodikana kuva zvaushoni kamare.
6 “Kudari muriro ukabwaka, iwona wopinda ngo papfiba ro muzwa, woenda koopisa mbeu jainga japera kukotohwa, kana kupisa mundewo wese, mundhu wabwakijaro muriro anodikana kuripa zviro zvaperaro kupiswa.
7 “Kudari mundhu akaenda kovigisa mare kana zviri zvese ku mundhu umweni, zvobiwa zviri pamuzi pake, kudari mbavheyo ikawanika, inodikana kuripa ngo mutengo wakapetwa kaviri.
8 Kudari mbavheyo ikatama kuwanika, mune wo muziwo anodikana kuenda pamberi pa Mwari wo cokwadi kuti zviyende koovoniwa kuti iyena wakaba zviro zvo mudoni wake kana kuti haiwa.
9 Kudari pakawanika mundhu ano zviro zviciripi zvake, zvakadari inga n’gombe, mbongoyo, vhuta, nguvo, kana ciri cese haco cinonga casvejeka, asi pano mundhu anonanga kuti, ‘Ici iciro cangu!’ vovaviri vanodikana kuenda pamberi pa Mwari wo cokwadi. Mundhu anozovhunjwa ndi Mwari kuti ano ndava, iyena anodikana kuripa mudoni wake mutengo wakapetwa kaviri.
10 “Kudari mundhu akapekeja mudoni wake, mbongoyo, n’gombe, vhuta kana cinyama ciri cese haco kuti acivige, perapo cofa kana kuti kuremara, kana kutohwa ngo mundhu pacina anozvivona,
11 vovaviri vanodikana kuita mbhiko pamberi pa Jehovha, inovonesa kuti wabihwaya aazivi kutora zviro zvo mudoni wake. Mune wazvo anodikana kuzvitendera. Wabihwaya aazoripi ciri cese.
12 Kudari cinyameco cikabiwa ciri mu nyara make, iyena anodikana kuciripira mune waco.
13 Kudari cakarumwa ngo cinyama co musora, iyena anodikana kutora cinyama carumwaro, woenda koocitatija mune waco. Aadikani kuripa mune waco ngo pamusoro po cinyama carumwa ngo cinyama co musora.
14 “Asi kudari mundhu akashonga cinyama kuno mudoni wake, asi cofa kana kukhuvazika mune waco acipo, mundhu washongaya anodikana kuripa mune waco.
15 Kudari cikafa mune waco aripo, aadikani kuripihwa. Kudari cainga cakarugahwi, anozoripihwa ngo mare yo kurugariyo.
16 “Kudari mundhu akavangirija mbhandwe icito yabatihwa, wovatana nayo, iyena anozoripa mutengo wokurovora kuti aite mukaji wake.
17 Kudari babake vakaramba kumupekeja, iyena anodikana kuripa mare yokurovora.
18 “Mucaregera muroi* ari penye.
19 “Mundhu wese anovatana no cinyama anodikana kuurawa.
20 “Mundhu wiya anoitira mupiro zvimwari zvimweni, kuciripi Jehovha basi, iyena anodikana kuurawa.
21 “Mucashaisha kutaja vo nyikanja, nee mucavatambuja ngokuti imwimwi maingavo vo nyikanja mu nyika yo Ejipita.
22 “Amudikani kutambuja noni no ndherera.*
23 Asi kudari mukamutambuja ngo njira iri yese, iyena wokhuwa* kwandiri, inini ndinozozwa kukhuwa kwake kamare.
24 Inini ndinozonyangajwa maningi ndokuuraya ngo banga. Vakaji vako vanozosara vari noni, vana vako vosara vari ndherera.*
25 “Kudari ukafiyarisi murombo ari pakati po vandhu vangu, anogara na iwewe, ucazviita wecida kuwana rukru. Ucamukumbira kuti abarise mare yako.
26 “Kudari ukatora bhurangeti ro mudoni wako kuti riite cibatiso, unodikana kurihwirija zuva ricito rabira.
27 Ngokuti ndirona rega raanofuka, nguvo yaanoshandisa kuti afuke muviri wake. Waro ukamutorera bhurangeti rake, anozofukenyi kudari akavata? Iyena akakhuwa* kwandiri, ndinozozvizwa ngokuti ndiri Mwari ano unyasha.
28 “Audikani kutuka Mwari, nee audikani kutuka madhodha ari* pakati po vandhu vako.
29 “Ucathimwa-thimwa paunonga wecida kundiitira mupiro yo mbeu jakawanda jaunonga wakotora no zvinofashukira maunosviniraro vhinyu. Unodikana kuzviita no matangwe o vana vako.
30 Ku n’gombe yako no vhuta rako unodikana kuita izvi: Zvivana zvinovha kubahwa mbhera pa njiku yocinomwe ngazvigare na mai wazvo. Asi mu njiku yocisere unodikana kundipekeja.
31 “Imwimwi munodikana kuva vandhu vakaceneswa kwandiri, amudikani kuha mukhaindi wese wo cinyama cakarumwa ngo zvinyama zvo musora. Imwimwi munodikana kuzvikhandirira imbhwa zvinyama zvondhozvo.
Masoko o Pasi
^ Ku Cihebheru gama iri riri kunangira muroi wo mwanakaji.
^ Kana: “vana vakafihwa.”
^ Womimira.
^ Kana: “vanozosara vacina baba.”
^ Kana: “akamima.”
^ Kana: “vatongi vari.”
