Ekisodho 23:1-33
23 “Ucandhandhanisa masoko o kunyepa. Pa ndava, ucabesera mundhu waunoziva kuti wakashaisha, woita ucapupu hwokunyepa.
2 Ucaita zvakashata ngo kuda kutevejera vandhu vakawanda. Ucaita kuti ndava ishaishe kutongwa ngokuita ucapupu hwo kunyepa wecitevejera vandhu vazinji.
3 Paunotonga ndava yo murombo, ucamupekeja razau ngokuti murombo.
4 “Paunosongana no mbongoyo kana n’gombe yo mudoni wako yecipepa,* unodikana kuikumba* kuti ihwirire ku munewayo.
5 Paunovona mbongoyo yo muvengi wako yakacikinijwa ngo mujiyo, audikani kuisiya wopinda. Asi unodikana kumubesera kuvhisa mbongoyoyo.
6 “Ucashaisha kutonga ndava yo murombo ari pakati penyu.
7 “Ucanghwinira mu shwiro jo kupumbha umweni zvokunyepejera. Ucauraya mundhu acina ndava no mururami. Andizonangi kuti mundhu anoita zvakashata aana ndava.
8 “Ucatendera kufidhihwa, ngokuti kufidhihwa kunopofumaja mundhu wakangwara. Koita kuti mundhu wakarurama acinje zvaaidikana kuita.
9 “Ucabzinyirira munyikanja.* Imwimwi munozviziva kuti kuva munyikanja zvinonesa maningi. Ngokuti maingavo vandhu vo nyikanja mu nyika yo Ejipita.
10 “Unodikana kusima* mbeu mu maminda mako no kukotora mukati mo makore matandhatu.
11 Asi pagore ro cinomwe audikani kurima munda wako. Unodikana kuusiya kuti uzorore. Varombo vari pakati po vandhu vako vanozoha zvinomeremo waro. Zvavanozosiyaro zvinozohiwa ngo nyama jo musora. Ngo zvaunodikana kuita no munda wako wo muuvha no wo muorivhe.
12 “Unodikana kuita basa rako mukati mo njiku ndhandhatu. Asi pa njiku yo cinomwe unodikana kuzorora, kuti n’gombe yako no mbongoyo yako zvizorore. No munyikanja* anodikana kuzororavo.
13 “Ivai no cokwadi kuti uri kuita zvese zvandakakuvhunja. Audikani kunanga zina ro zvimwari zvimweni. Izvona azvidikani kuzika pa muromo pako.
14 “Unodikana kundiitira mabuso katatu pagore.
15 Unodikana kuita Mutambo wo Pau Jicina Mbijo. Unozoha pau jicina mbijo mukati mo njiku nomwe pa nguva yakagajwa yo mweji wa Abhibhi inga zvandakakuvhunja.* Ngokuti wakabudiswa mu nyika yo Ejipita pa mukuvo wondhowo. Apana na umwe wenyu anodikana kuviya kwandiri acina ciro.
16 Unodikanazve kuita Mutambo wo Kukotora* pa mucero jaunotanga kukotora jo zviro zvawakasima* mu maminda. Unodikana kuitazve Mutambo wo Kuunganija* pa kupera ko gore paunopera kukotora zvawakasima.*
17 Pa gore, vanarume vese vanodikana kwenda katatu pamberi pa Jehovha, Mambo wo cokwadi.
18 “Amudikani kuita mupiro jangu mecishandisa sangi pamwepo no zviri zvese zvino mbijo. Mabembhe amunoita mupiro pa mutambo jangu, aadikani kuejehwa usiku hwese mbhera comangwanani.
19 “Unodikana kuviisa mucero jaushoni jinotanga kuivha mu maminda ako, ku nyumba ya Jehovha, Mwari wako.
“Audikani kubika cimwana combuji* ciciri kumwa mukaka.*
20 “Ndiri kutuma ngirozi kuti iyende kumbeji kwako kuti ikutungamirire no kukuseseja kuti uende kundau yandakanasirira.
21 Nasai kuipurutana,* uizwire zvainonanga. Ucaipandukira ngo kuti iyona airegereri kuposa kwenyu. Zvese zvainoita inozviita ngo zina rangu.
22 Asi kudari ukanasa kuzwira zvainonanga woita zvese zvandinonanga, inini ndinozova muvengi wo vavengi vako ndozonda vanokuzonda.
23 Ngokuti ngirozi yangu inozokutungamirira, no kukuendesa ku Vaamori, Vahiti, Vaperezi, Vakhanani, Vahivhi no Vajebhusi. Inini ndinozovauraya.
24 Audikani kugwadamira zvimwari zvavo nee kuzvishandira. Audikani kutevejera zvavanoita. Asi unodikana kuzviphwanya-phwanya, no kuphwanya-phwanya njiki javo jakaceneswa.
25 Munodikana kushandira Jehovha, Mwari wenyu. Iyena anozokomborera zvokuha zvenyu no kumwa yenyu. Inini ndinozovhisa ndhendha pakati penyu.
26 Mimba jo vanakaji vo mu nyika yenyu ajizovhi* nee avazoiti shenje.* Inini ndinozoita kuti mugare njiku jakawanda.
27 “Ndinozoita kuti ivona vandithye mucito maguma. Ndinozoitisazve kuti vamunozohwisanaro navo vatame kuzwana. Ndinozoitazve kuti vavengi venyu vanyiswe perapo votiza.
28 Ndinozoita kuti vandhu vapere simba mucito maguma. Ndinozogogomera Vahivhi, Vakhanani no Vahiti pamberi penyu.
29 Andizovagogomeri pamberi penyu pa gore rimwe basi kuti nyikeyo itame kugara icina vandhu, zvinyama zvomusora zvitame kuengejeka perapo zvoviya kuzohwisana na imwimwi.
30 Ndinozovagogomera pamberi penyu padoko ngo padoko, mbhera mowanda, motora nyikeyo yese.
31 “Ndinozodira mugano wenyu kuvhira ku Jombe ro Kupsuka mbhera ku jombe ro Vafiristi, kuvhira ku zvipare mbhera ku Murambo.* Ndinozomupekeja nyika iyi munyara jenyu kuti iite utaka hwenyu. Imwimwi munozovagogomera pamberi penyu.
32 Audikani kuita citenderano navo nee kuita citenderano no zvimwari zvavo.
33 Ivona avadikani kugara mu nyika yenyu kuti vatame kuzomuitisa kuti mundishaishire. Kudari mukashandira zvimwari zvavo zvinozova murau* kwamuri.”
Masoko o Pasi
^ Kana: “iciherereka.”
^ Kana: “kuihusha.”
^ Kana: “mushavha.”
^ Kana: “Kupandira.”
^ Kana: “mushavha.”
^ Vonanyi Masoko Okuengejera B15.
^ Mutambo uwu unozivikazve inga Mutambo wo Mucaca (Tabhernake).
^ Zvawakapandira.
^ Kana: “Zvawakapandira.”
^ Rinozivikazve ngokuti Mabuso o Sumana kana Pentekoste.
^ Kana: “kubika cirengana.”
^ Kana: “mahe.”
^ Kana: “kuipurukira.”
^ Kurasha; kusvoja.
^ Kana: “nee avazotami kubara.”
^ Kana kuti, Eufrati.
^ muravo.
