Ekisodho 24:1-18
24 Perapo Mwari wakati kuna Mosi: “Khwirai pa dundhu kwandiriwari inini Jehovha. Viyai na Aroni na Nadhabhi na Abhihu no 70 o vakuru o Vaiziraeri, mugwadame muri ngo ndhambo.
2 Mosi ndiyena ega anodikana kukhwedera kwandiriwari inini Jehovha. Asi vandhu vamweni avadikani kukhwedera kwandiri. Apana anodikana kukhwira na iyena.”
3 Ngo kudaro, Mosi wakaenda kuno vandhu, wovavhunja masoko ese akanangwa ndi Jehovha no mutemo jake jese. Vandhu vese vakadavira ngo izwi rimwe kuti: “Tinoda kuita zvese zvakanangwa ndi Jehovha.”
4 Ngo kudaro, Mosi wakatara masoko ese akanangwa ndi Jehovha. Perapo wakamuka comangwanani wovaka artari mu mbhiripiri mo dundhu, woimisa njiki jinokwana 12, jinozwirana no majinja 12 o Vaiziraeri.
5 Perapo wakatuma majaha o Vaiziraeri voita zvipo zvokupiswa, vopira mavhuta inga mupiro jokuzwana pamberi pa Jehovha.
6 Mosi wakatora sangi padoko woidira mucibasiya, wotora sangi imweni, woidururira panyezuru po artari.
7 Ngo kudaro, iyena wakatora bhuku rocitenderano, woriverengera vandhu ngo izwi guru. Ivona vakananga kudari: “Tinoda kuita zvese zvakanangwa ndi Jehovha no kuzvizwira.”
8 Ngo kudaro, Mosi wakatora sangi woizuzira panyezuru po vandhu, woti: “Iyi ndiyona sangi yo citenderano ca Jehovha na imwimwi, mukuzwirana no masoko ese aya.”
9 Mosi na Aroni na Nadhabhi na Abhihu no 70 o vakuru vo Vaiziraeri, vakakhwira pa dundhu.
10 Vakavona Mwari wo Vaiziraeri. Pasi po soka jake, paiita inga pakadihwa mapuwe o safira, akacena inga makore.
11 Iyena aazivi kukhuvaza vanarume vano nduma vo Vaiziraeri. Ivona vakava no civoniso ca Mwari wo cokwadi povainga veciha no kumwa.
12 Ngo kudaro, Jehovha wakavhunjazve Mosi kudari: “Viyai kuno kwandiriyari pa nyezuru po dundhu ugarepo. Ndinozokupekeja mapuwe akaita inga tabwa, andakatara mutemo kuti ijijise vandhu.”
13 Mosi no mubeseri wake Joshuwa, vakamuka voenda panyezuru po dundhu painga na Mwari wo cokwadi.
14 Asi Mosi wainga apera kuvhunja vakuru kudari: “Tiimirenyi pano mbhera tiviye. Aroni na Huri vanosara na imwimwi. Ano shwiro inodikana kutongwa, anozoenda kwavari.”
15 Gore porainga rakafukija pa dundhu, Mosi wakakhwirepo.
16 Kun’ganikira kwa Jehovha kwaindogara pa dundhu ro Sinai. Gore rakafukija dundhuro ko njiku ndhandhatu, pa njiku yo cinomwe, Mwari wakabhuya na Mosi naari pakati po gore.
17 Kun’ganikira kwa Jehovha kwaiita inga muriro waibwaka pakati po dundhu, ku Vaiziraeri vainga vecivona.
18 Ngo kudaro, Mosi wakanghwina mu gore paainga ecikhwira dundhu. Iyena wakagara pa dundhu 40 o njiku, usiku no masikati.
